د. ناهد قرناص : استراحة الجمعة .. يوم الاستقالة
يوم في يوم غريب ..فيهو الشمس لمت غروبها وهاجرت …كانت سمانثا كاميرون ..زوجة ديفيد كاميرون ..جالسة في امان الله في الهول ..معاها الحنانة (سونيا شيفلد) ..والجبنة مدورة ..والونسة في قمتها ..يرن جرس الهاتف
سمانثا: اهلين يا ماما ..كيفك ؟
الام : كر علي يا بتي ..حتعملي شنو ؟
سمانثا : اعمل شنو في شنو ؟
الام : في الاستقالة بتاعة راجلك دا
سمانثا: استقال؟ متين ؟ تقصدي من الحزب ولا شنو ؟؟ يا زولة ارتحنا من العواجيز ديل
الام : حزب شنو.. .الترابة في خشمك …راجلك استقال من الحكومة ..من رئاسة الوزراء عديل …
سمانثا: اجي ؟؟ خبر الشوم وخبر الروم ..دا جبتي من وين يا امي
الليلة ووووب وتاني وووب
يا الاستقلت وما اتمهلت
يا الاتمقلبت وما شاورت
الليلة وووب وتاني وووب
الما سويت شركات
و المرقت بدون تركات
الام : الليلة ووووب وتاني ..وووب
يا الدقسوك وما وجهوك
يا الجهجوك وبهدلوك
سمانثا: الليلة يا حليل 10 داوننغ ستريت
الليلة يا حليل حلمي من يوم ربيت
الام بعد تنهيدة طويلة : استغفرتك يا مالك روحي ..اسمعي يا بتي ..كدي اصبري شوية ..وركزي معاي ..اها لما يرجع اسأليهو براحة ..ما عمل ليكم شركة كدي ..ولا اشترى ليكم اراضي ولا حتى مزرعة يعيش فيها معتزلا السياسة ؟
سمانثا: والله ما ظنيت يا امي ..ديفيد البعرفو دا …ما ظنيت ..وووب علي يا شماتة ناس ميركل فينا
الام : طيب انتي ما عملتي ليك جمعية تطوعية ..ولا منظمة خيرية ..اي شئ كدي تستفيدي منو ..
سمانثا: يا امي ما عملنا شئ ..بي وين؟؟ ..الراجل الفقر دا .ما بخليني اسوي شئ ..ياخ .العربية الاشتراها لي ..ما شفتيها قديمة كيف ؟؟؟
الام : ما في شئ ماغسني قدر عربيتك الخبرها ملأ الدنيا دي ..لكن كنت بصبر قلبي أقول يكون خاتي شئ للزمن ..لكن كدي النسألك كان ما عمل ليهو شيء ..الشلاقة العليهو شنو ؟؟..في زول قال ليهو استقيل؟؟ الناس يطلعوا فيهم السبعة وذمتها ..والجرايد تكتب والحسابة تحسب ..وبعد داك يقول بكل ثقة (ما بستقيل من التكليف) …
سمانثا : يا امي اصلوا كدا كدا كان حينزل من المنصب …لكن كان يمهلني شوية ..وما يشمت فيني نسوان الجبنة
الام : طيب وكت اصلو مفارق ..الخفة واللفة والاستقالة البلا عرفة ..لزومها؟؟ ..المهم هسه لازم تعرفي حتعملي شنو ..ما تقعدي تسكلي ..ساي ..كدي تعالي نوديك لي الفكي بتاع (ريدنق) ..يمكن يعمل ليك حاجة ..ولا يشوف ليك حل في المصيبة دي
سمانثا: خلاص ..بس انتهي من الحنة واتصل عليك
تنتبه فجاة سمانثا الى ان الحنانة قد توقفت عن رسم الحنة ..ولملمت أشياءها ..
سمانثا: شنو مالك ؟ ما تكملي الحنة
سونيا شيفلد: معليش يا بت امي ..رسلوا لي قالوا تريزا ماي رئيسة الوزراء الجديدة عايزاني مستعجلة عشان دايرة حنة تلاقي بيها الملكة ..لازم امشي ..انت حنتك تميها براك ….يلا باي
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة