بدون تعليق !!
< شيخ عبدالباقي ..تبوأ مواقع شتى في الحارة ....اصبح رئيس اللجنة الشعبية وامام الجامع وكبير الحلة وحكيمها الاوحد وسيد الدكان وعنده تحويل رصيد.
< أي زول عاوز ليه (شهادة سكن) ..بمشي لي شيخ عبدالباقي يجيب منو الشهادة ويرجع.
< يضع توقيعا (كركترى) على الشهادات التى يخرجها لابناء الحي...توقيعه يشبه اغنية النور الجيلاني ...(كدراوية).
< لا اعرف ما وجه الشبه ..لكن احس في التوقيع وفي الاغنية بالرهق والتعب والمشوار الطويل.
< تحس ثمة (نفس مقطوع).
< شيخ عبدالباقي متزوج منذ اكثر من 40 سنة من الحاجة رقية ...ولدو الكبير اصبح اخصائي جراحة ..وبناته السبعة اتزوجن.
< يوم الجمعة من كل اسبوع يصبح بيت الشيخ عبدالباقي متل (منتزه المقرن) مليان بالشفع والاسكريم.
< وشجرة الليمون المزروعة في الحوش ..بحتوا ليمونها كلو.
< ما بخلوا فيها (ليمونة).
< ذلك كان يحدث لسبب بسيط جدا ..هو ان بناته السبعة كانن يسجلن زيارة اسبوعية لوالدهن والدتهم يوم الجمعة من كل اسبوع.
< فيصبح البيت من جراء هذه الزيارة متل (جنة الاطفال).
< كل واحدة ..بتجي بي شفعها.
< شيخ عبدالباقي رغم مضي اكثر من اربعين سنة على زواجه من الحاجة رقية ورغم ولده الطبيب وبناته السبعة ...مازال كلما نادي حاجة رقية وطلب (الشاي) يذكرها بقول ظل يردده اربعين عاما ...يا ولية اعملي لي ملعقة سكر واحدة في كباية الشاي.
< يكافح السكري بـ (ملعقة سكر) واحدة.
< مازال شيخ عبدالباقي الي وقتنا هذا يقول لحاجة رقية ..(القراصة) ما تكتري ليها (الملح)...كلما اعلنت اذاعة ام درمان عن موعد حلول (عالم الرياضة) وقامت حاجة رقية على (الصاج) شايلها (بستلة) العجين ..عشان ترمي (القراصة).
< اصلا كانت الحاجة رقية من تسمع شعار عالم الرياضة في الاذاعة بتقوم على المطبخ.
< ترمي (القراصة)..وتقطع السلطة ..وتتم (الصينية) كلام.
< مثل شيخ عبدالباقى ...(مختار ود الناظر).
< مختار هذا ...منذ اربعين سنة تانية ..بشكي من (النضارة).
< لو لاقك في عرس او لاقك في المقابر ..بمسكك ويشكي ليك من (نضارتو).
< النضارة بقت كعبة يا ولدي.
< نقول ليه : يا مختار ...كعبة (عيونك)...شوفهم الافتراضي انتهى ..انت قايل نفسك صغير.
< عيونك بقن متل (اورنيك) تمانية ..برضو السنوات ليها احكام.
< لكن مع ذلك مختار ود الناظر بشكي من (النضارة).
< تقول ليه (اليرموك) قصفوها ...بخلى (اسرائيل) وبقعد يشكي ليك من (النضارة).
< 40 سنة مختار ود الناظر بشكي من (النضارة) ..زي شكيتنا نحن من التحكيم الافريقي وارضية الملعب الكعبة.
< اربعين سنة بنشكي.
< زي عباس رأس السنة.
< عباس رأس السنة دا كمان السنة كلها ..ما رأس السنة براها.
< عباس رأس السنة ..السنة كلها بشكي من (ضروسو).
< تقول ليه : يا عباس الضرس دا (اقلعو)...لو ما قلعتو ما بترتاح.
< القرنفل والمسكنات دي ما بتحلك.
< يقول ليك انا بخاف من (الخلع)...جني وجن يقلعو لي (ضرسو).
< والله قلع (الضروس) دا مفروض يمسكوه (المحليات).
< ما في زول بقلع زيهم.
< دكاترة الزمن ديل الواحد تمشي ليه عشان يقلع ليك (ضرسك) ...يقلع (المرتب).
< وما في نتيجة ظاهرة.
< يشيلوا المرتب ..ووجع الضرس في حتتو.
< طيب يا عباس رأس السنة ...(اكتل) الجذور لو ما عاوز (تخلع) الضرس.
< كلو ولا كتل الجذور.
< كتل الجذور انا في الافلام الاجنبية ما بحبو.
< كتل الجذور دا عاوز ليه طولة بال ..وانا ما بقدر بعد العمر دا ..اكتل لي (نملة)..ناهيك عن الجذور.
< طيب يا عباس ...(احشي) الضرس.
< احشيوه شنو (سلطة اسود)...الحشي ما بنفع ..اليوم والتاني ...الحشوة تقع.
< بعدين شفع المدارس ديل خلوا لينا (حشوة).
< من الصباح بقوموا على (التلاجة)..ويدورو حشو.
< أي حاجة عباس رأس السنة بشكي منها.
< نحن هنا برضو بنشكي.
< مرة من التدريب ..ومرة من المحترفين ..ومرة من اللاعب الوطنى.
< ووقت خلاص نتفلسف بنقول : (الدوري مقلوب).
< الدوري دا (قميص).
< كمال شداد قلب الدوري ..ومشي قعد في بيتو ..وناس معتصم جعفر ديل ..رأسهم ضرب.
< مقلوب من لا مقلوب ما فاهمين فيه حاجة.
< لقوه كدا ..بشتغلوا بيه الي ان تقوم الساعة.
< وبرضو بنشكي في كل سنة ..في هذا التوقيت ..عن (الارضية).
< يعملوا ليكم شنو؟.
< يجيبوا ليكم (ارضية) من سويسرا.
< تقول بنلعب في (ابيي).
< ولسع شماعة التحكيم ظالم شغالة.
< عندنا ضربة جزاء ما حسبوها لينا.
< والحكم دا قاصدنا ..اي بطولة لاقنا فيها ..طلعنا منها.
< حكم زي (الكشة).
< نحن اتعودنا على هذه الظروف.
< لو الكلام دا صحيح.
< بالمنطق كدا ..يعني لو بنلعب في ارضية كعبة (40) سنة متواصلة ..مفروض نكون هسع اتعودنا على الارضية دي.
< ومفروض كمان وقت نلعب في ارضية كويسة ..رأسنا يضرب.
< يا ناس الهلال انتوا بتتكلموا عن الارضية (الكعبة).
< انتوا ارضية استادكم زي (الملوخية) المفرومة..في نص الصينية.
< وناس المريخ ارضيتهم عندها نفسيات عديل كدا ..يوم كويسة..ويوم بتلقاها زي (الكلمات المتقاطعة)..حفرة ..حفرة.
< مفروض الظروف دي نكون اتعودنا عليها ..وبقت بالنسبة لينا عادية ..المطر والبرد والتحكيم الظالم.
< لكن نحن تقول (جبنة لباشكري).
< طالعين من (علبنا).
< اخر (حنكشة).
< لو الميدان (مبلول)..رأسنا بضرب ...لو الحكم صرف لينا ضربة جزاء ..رأسنا بضرب.
< لو لعبنا عصر ..(الكشافات) بتفرق معانا.
< لو (الجو) فيه رطوبة عالية او ما عالية ..خلاص لقينا لينا عذر.
< لو الجمهور (كثيف)...نتغلب عادي ونرجع.
< عملوا لينا (حرب نفسية).
< والله نحن برانا بنغلب في نفسنا.
< انتوا عاوزين تلعبوا وين؟.
< في (حوش) بيوتكم.
< عاوزين تلعبوا في (الصالون).
< قالوا ليكم البطولات دي بجيبوها من (الصيدلية).
< الموضوع دا عاوز تعب وجهد واستقرار وفهم عالي.
< اتعودنا.
< عثمان ختم الكل ...من التسعينات هو ممتحن للشهادة السودانية.
< تشوفو كدا تقول (تحتمس).
< كمل القراية دي عديل كدا.
< امتحن عشرين مرة ..وكل مرة تلاقيهو راجع من الامتحان يقول ليك ..والله انا الليلة جضمت الشغل.
< غلطة واحدة ما عندي.
< دا حنكو كل سنة.
< اشتغلت ليك شغل نضيف.
< تظهر النتيجة يطلع (قادي) رياضيات.
< تاني يعيد ويدخل المدرسة ويمتحن ويجتهد.
< اخر السنة يدخل الامتحانات يقول ليك ما في أي مشكلة.
< تظهر النتيجة تلقاه (قادي) رياضيات.
< البشوفو في (المذاكرة) يقول الولد دا بدخل هندسة الخرطوم.
< اقل حاجة الزول دا بطلع (البرت اينشتين).
< مجتهد ..وما بقيف في الشارع ...من المدرسة الي البيت ..وشعرو ما بطلعو ..مع ذلك في كل سنة بقد رياضيات.
< دا حال الهلال والمريخ.
< بنقد في الشهادة...ونطلع من دور الاربعة.
< نحن كل مرة بنقد رياضيات ..وتاني نقعد في السنة الجديدة للامتحانات ..معسكرات..وتسجيلات ..وتصريحات وكلام جرايد.
< فترنا من الحاجات دي ..وعضمنا سوس.
< لو مشيت ..لي ناس خالتك ثريا ..بتلقى الديوان فاتح ..والمروحة شغالة ..وزول ما في البيت.
< تقعد شوية..بجيبوا ليكم (كباية ليمون) سخنة.
< عندهم الكبابي الطويلة ومشخطة ديك ..من سنة حفروا البحر ..الكبابي دي عندهم.
< ناس قديمين.
< حاجة ثريا بتعتذر ليك عن (سخانة) عصير الليمون دا ..وبتقول ليك كهربتنا قاطعة من امس.
< عندنا سلك ضرب.
< الكلام دا حفظناه.
< المشهد دا كل ما مشيت لي خالتك ثريا بتشوفو.
< عذر واحد...وعصير واحد ..وكبابي واحدة.
< ديل نحن ....الهلال والمريخ ..والخروج من دور الاربعة.
< عم جاد الرب ..من سنة 71 ..هو بي حالتو دي.
< الواطة بتعصر بشيل (الكرسي) يمشي يقعد برة البيت.
< الواطة بتغيب ..بشيل الكرسي ويدخل البيت.
< كلمة ما بقولها.
< من سنة 71 هو في الحالة.
< ونحن هنا حالتنا كدا ..هلال مريخ بالصورة دي ..بشيلوا الكرسي يقعدوا برة ..يصلوا دور الاربعة ..بشيلوا الكرسي ويرجعو البيت.
< وندور في التسجيلات.
< حاجاتكم دي حفظناها.
< العجب ناس المريخ في نهاية أي موسم ..هم بطلعوا من دور الاربعة (مرات من التمهيدي).
< والدوري الممتاز بكونوا فيه (الوصيف).
< اخير نحن ..الدوري الممتاز دا ما بنتغلب فيه.
< نلعب في الحصاحيصا ..نلعب في الكاملين ..نلعب في كادوقلي ..بنغلب عديل كدا.
< ما عندنا حاجة اسمها الاوضاع غير مستقرة.
< لكن ناس المريخ تعالوا شوفوا العجب.
< مسرحيات بدوروا فيها من قبل الاسبوع الاخير للدوري الممتاز.
< حاجات حفظناها حفظ.
< اقالة الجهاز الفني للمريخ.
< كل سنة ..ينتهي الدوري ..يشيلوا المدرب ..ويجيبوا مدرب جديد.
< يشيلوا (ريكاردو)..ويجيبوا (الكوكي).
< سمعتوا الكلام السمح والغزل (الجاهلي) الكان بقولوه في ريكاردو السنة الفاتت في نفس هذا التوقيت.
< الكلام القالوه في ريكاردو السنة الفاتت..هسع ترجموه ..وبقوا يقولوا ليه في (الكوكي).
< اقلب الشريط بس.
< حاجاتكم دي بقت محفوظة.
< بقت ما بتجر فينا.
< كل سنة ..بقولوا جمال الوالي ح يستقيل.
< وهاك يا استقالة.
< ولا بستقيل ولا حاجة.
< جمال الوالي المرة دي مصر ..ح يفسح المجال لوجوه جديدة.
< كلام كل مرة.
< وعشان جمال الوالي زول جنب ..وما ساهل ..ح يواصل دعمو للمريخ من خارج المجلس.
< صدقناكم.
< كلام كل سنة.
< جمال الوالي يرفض كل الرجاءات ..خلاص نفسو مرقت ..عشر سنوات بحنس في ناس بلة جابر.
< جمال ماشي.
< جمال استقال.
< المرة دي جمال الوالي ح يطبق استقالتو.
< والمجلس طبعا زي مرافق المريض.
< جمال يسقيل ..هم بستقيلوا ..وما بقعدوا.
< نحن ما بنقعد بعد جمال.
< فجأة كدا ..يقولوا ليك عملوا اجتماع.
< مجلس الشوري اصر على جمال الوالي.
< حنسوه.
< بالله.
< الكلام دا ..نحن سمعناه عشر مرات.
< فكونا منو.
< حكاية جمال الوالي دا استقال ..تاني ما تقولوه لينا.
< ما تقعدوا تتحنسوا فينا في (الجرايد) ساكت.
< انتوا جمال الوالي دا لو استقال من المريخ ..كلموه يشيل (المفاتيح) معاه.
< يقفل نادي المريخ ويمشي.
< وحوّلوا ناس مزمل ابوالقاسم وسلك لي (اهلي شندي).
< لو استقال جمال الوالي وفات ...ح يكون ما في حاجة اسمها (مريخ).
< الموضوع دا ح ينتهي.
< وبلة جابر ذاتو بمشي يلعب في الميرغني كسلا.
< كلام مكرر ..ومعيود.
< المريخ يقرر التخلص من كل المحترفين.
< المريخ يتقاعد مع نجوم كبيرة ..قادرة على تحقيق بطولات خارجية.
< والمحترف وصل.
< والوكيل اتفق مع جمال الوالي.
< ها ...كلامك دا بقى ما بقسم مع زول.
< كل نهاية موسم ..شابكننا في نفس الاسطوانة.
< بالطريقة دي ..ما بتمشوا لي قدام.
< عشان حاجات السنة الفاتت ..بتكرووا فيها في السنة دي.
< الغريبة ناس المريخ بصدقوا.
< يا حليل كلتشي.
< عاوزين يطفشوه للصين.
< يا جماعة الحاجات دي اكسروه بي ( سفن اب).
< جددوا شوية.
< ملحوظة : يجددوا وين مع ناس بلة جابر ديل.
هوامش
< الغريبة ..ناس المريخ ..بقوا ما بجيبوا سيرة للسور.
< وخلوا حكاية (الطابق التاني).
< هسع بقوا يركزوا في اقالة الجهاز الفني ..واستقالة جمال ..وعودته.
< استقالة بقدموها في الجرايد..وبسحبوها في الجرايد.
< استقالة (شكلية) بس.
< الظاهر كدا الاستقالة دي بخوفوا بيها ناس عصام الحاج.
< ناس سلك طبعا من يسمعوا باستقالة جمال الوالي بقولوا المريخ تاني ح يمسكوا فنيا ناس محمد الطيب.
< مطلوب من مجلس الهلال التجديد ..والمحافظة على سادومبا.
< لو ذهب سادومبا الي اهلي شندي ..تبقى (فضيحة) في حق الامين البرير.
< مباراة القمة ..يوم الاربعاء ..تحتاج الي تركيز خاص.
< الهلال مطلوب منه كليا الاتجاه نحو الجمع بين الدوري والكأس.
< اعملوه ..وعوضوا الناس شوية عن الخروج المؤلم من الكونفدرالية.
< المريخ سوف يدخل مباراة الاربعاء ..وتشكيلته كلها سوف تشطب.
< لذلك وجب التركيز على هذا العامل.
< الجهاز الفني ..شالوه واتعاقدوا مع الكوكي.
< طيب يا جماعة ريكاردو دا ح يشتغل المباراة دي كيف؟.
< والمحترفون جميعا ..قرروا التخلص منهم.
< ربما يبقى فقط (الحضري).
< وبلة جبار وموسي الزومة وراجي وسعيد السعودي والشغيل كلهم عايشين في (هلع)..وخوف.
< لذلك الفرصة مؤاتية ان شاءالله لان يحقق الهلال انتصار كبير على المريخ.
< العبوا على هذه العوامل ...المريخ يخسر خسارة كبيرة من الهلال.
< الهلال يجب ان يجد بصورة عملية في كسب مالك وفارس وباسيرو لاعبي الاهلي شندي.
< صلاح ادريس مهما كان الاختلاف يمكن ان يدعم الهلال بهذا الثلاثي.
< واظن ان هذا الشيء يمكن ان يكون اختبار للامين البرير ...ولصلاح ادريس.
< ما تشاكلوا وتصارعوا في قيم الهلال وثوابته.
< اختلافوا ..واتصارعوا ..زي ما عاوزين ..لكن خلوا مصلحة الهلال هى الاولى.
< ليوبار حقق كأس الكونفدرالية.
< يعني غارزيتو كان محق عندما فضل دجوليبا.
< لكن المشكلة ان دجوليبا بتواضعه هذا اخرج الهلال.
< فرصة وراحت.
< فرصة زي دي عشرة سنوات ما بنلقاها تاني.
< والسبب المشاكل والصراعات.
< مجلس ادارة نادي الهلال الحالي ..اضاع من الهلال كأس الكونفدرالية.
< مشاكل وصراعات ..وشلليات بين اللاعبين ..وحوافز ومرتبات مافي.
< اضاعوا فرصة العمر.
< في المريخ ..الحضري ضيّع الفرصة.
< جابوه فزع...بقى وجع.
< مع ذلك الحضري ربما يبقى المحترف الوحيد المستمر مع المريخ.
< عشان يطلعهم تاني.
< يا ناس الهلال في مباراة الكأس ..ركزوا على الحضري.
< الحضري هو نقطة ضعف المريخ.
< وعندما تركزوا على الحضري ..يعني هذا ان الهلال سوف يلعب ضاغط ومهاجم 90 دقيقة.
< الهلال اذا حافظ على قوامه هذا ..وجهازه الفني ..ورمم الدفاع والاطراف يمكن ان يحقق في الموسم الجديد بطولة الاندية الافريقية.
< اصبروا بس.
< وخليكم على الباب.
عاجل : استقالة يا جمال الوالي بقت زي عكسية موسي الزومة.
[/SIZE]وإن طال السفر - صحيفة قوون
