أفطمونا
في وقت أصبحت الهموم والمعاناة والضيق تجري منا مجرى الدم (لو كان فضل فينا دم) وعلى الرغم من شظف العيش والحياه القاسية التي يكابدها معظم أفراد الشعب السوداني الفضل .. على الرغم من كل ذلك يخرج علينا بعض الساده المسؤلين أطال الله بقاءهم أكتر من كده (علشان يطلعو عين الخلفونا) بتصريحات ما أنزل الله بها من سلطان تتعدي مرحلة (الإستغراش) إلى مرحلة (الإستفشاش) والذي هو نوع من إصابة الفشفاش بالتمزق الميترالي المزمن !
أنظروا سادتي ونحن نعيش في هذه الأيام الحوالك نشكي من سوء الحال والخوف من المآل
وما يحيق بنا من مسغبة و فقر و(فلس) لا يبارح جيوبنا أنظروا ما صرح به السيد مصطفى عثمان إسماعيل وزير الإستثمار (حيث لا إستثمار) قال لا فض فوه وهو يتحدث عن قرار رفع الدعم عن السلع الأساسية المرتقب (الشعب السوداني تعود على الرخاء ويصعب عليه الفطام منه) !!
بعد قراءتي للتصريح وضعت نظارة القراءة على (منضدة المامبو) التي أمامي وتفرست في مياه (المسبح) الزرقاء وانا أرتشف من كوب (الكباتشينو) وأمسك بـ(السيكارالكوبي) بعد أن أخذت جرعة من عصير البرتقال قائلاً لنفسي :
– بالله الوزير ده مش بيبالغ ؟ يفطموا لينا شنو ؟ هسه (الرخاء ده وينو) ؟ حاسدنا على شوية النعمة دي !
قمت بأخذ (غطسة) في المسبح وخرجت وأنا أصيح للمدلك طالباً منه الحضور فوراً لعمل حصة (المساج) الصباحية قبل أن أرتدي بدلتي متوجهاً إلى العمل .
وأنا في طريقي إلى العمل طلبت من السائق أن (يغشى) جارنا (عباس سخانة) وبعد التحية والسلام سألته إن كان سوف يتنازل عن بعض الرفاهية التى يعيشها هو وأطفاله الخمسة وزوجته ..
– يا أستاذ والله ناس الحكومة ديل حاسدننا الظاهر على شوية النعمة دي .. شنو يعني لما المواطن مننا يفطر ليهو بشوية شوربة مع سلطة خضروات معاها كم قطعة جبنه (فلمنك) وسمكة سمكتين مقليات؟ (مواصلاً) أنا غايتو يا أستاذ ممكن (أخفض) ليهم في وجبة العشاء شوية يعني ممكن أبطل (أفخاذ الدجاج) المشوي وآخد بدلاً عنهم (ريشة ريشتين (كستليتة ضأن) وقطعة سمك مقلي وكمان (أبطل) ليهم (الفيليه المشوي) خالص عشان قالوا بيزيد نسبة الكلسترول .. لكن على بالطلاق تاني كل حاجه في مكانا .. الغداء كباب و كفتة وسكالوب بانيه وشيش طاووق، والتحليه كريم شانتيه مع شوية لوز وحبه مكسرات !! (مواصلاً) الجماعة ديل عاوزين (يفطمونا) أصلو وللا شنو؟
– طيب يا عوض والإجازات !
– لا .. لا .. لا كل شئ ولا الإجازات دي أنا ليا خمسة وعشرين سنة كل إجازه قاعد أسوق الأولاد منتجع (لوكابرون) في السويد يعني الوزير ده عاوزني أبقي زي باقي المواطنين الكحيانين وأصيف في (موناكو) !
– طين هسه باقي ليك يا عوض إنتو المواطنين ديل الحكومة ح تقدر تفطمكم وتقلل من الرفاهية و(النغنغة) العايشين فيها دي شوية؟
– والله بيني وبينك نحنا شعب (منغنغ) شوية .. ممكن يعملوا لينا شوية (فطمة) .. يعني الواحد تاني بدل ما يقري أولادو في مدرسة فرنسية فيها داخليات يقريهم مثلاً في مدرسة إنجليزية فيها (ترحيل) ويوفر (فرق السعر) وحق الداخلية و(الوجبات) وكده وبدل ما يقضي هو وأولادو الإجازاه في أوروبا الغالية دي يغيروا شوية ويمشوا يقضوها في أمريكا اللاتينية عشان رخيصة والإجازات فيها ما مكلفة !
(مواصلاً) وإنتا يا استاذ ح تخفض المنصرفات كيف؟
– والله يا عوض أنا عن نفسي ح أوقف (الكافيار) وأقلل الكاباتشينو وأبطل (المساج) !
كسرة ثابتة (قديمة) : أخبار ملف خط هيثرو العند النائب العام شنو(وووو وووو وووو وووو وووو)+و+و؟ كسرة ثابتة (جديدة) : أخبار تنفيذ توجيهات السيد الرئيس بخصوص ملف خط هيثرو شنو(وووو)+و+و؟
[/JUSTIFY]
الفاتح جبرا
ساخر سبيل
[email]gabra-media@hotmail.com[/email]
[CENTER]الفطام بعد الرضاع شيتن صعب[/CENTER]
بتقول رضاع ؟!
بتقول رخاء؟
يا دكتور ده كلام [B]عجب[/B]
ماك عارف شن تقول
وبس ترمي الكلام [B]دلدلب[/B]
ناشف شديد زي [B]الحطب[/B]
فاكرة دي السويد ؟
ولا دي الكويت
أو باقي الخليج
والنفط كاب فيها [B]كب[/B]
ماتقول كم بريميلن صغير
ما فات مقاسات [B]العلب[/B]
وناس زعيط لقفوها[B] جب[/B]
والباقي عايشين في [B]تعب[/B]
بس النظام
الليلة واقع في [B]مطب[/B]
عدمان الكلام
بس يلبخ
مامعترف إنه [B]انغلب[/B]
الدنيا قامت
والبلد هاصت
وبعد داك قام [B]انسحب[/B]
يا حليل شعبا مسيكين
حد ماصبر وحد ما [B]انكرب[/B]
قايل بكرة يكون أخير
بس يا أسف حقه [B]انسلب[/B]
قال ننفطم !!
من شنو نحن بننفطم ؟!
من المغص ؟ من الدغس ؟
وتتوالى علينا أنواع [B]الكرب[/B] ؟!
من الهروب ؟ من الضياع ؟
وبلدنا الباقية للريح في[B] مهب[/B] ؟
لو كان كده
ما ببنفطم ما بننفطم
مافي غير تودونا [B]الترب[/B]
لكن رغم الظروف
رغم العسير
الناس ليها[B] رب[/B]
ماقنعنا وما بي نقنع
من رحمته والله [B]تب[/B]
ينزل علينا الخير مطر
سبحان من [B]وهب[/B]
[B]يا أستاذ أهو رئيس الجمهورية وجه بحل كل مشاكل الولية الكوركت في وشو في قاعة الصداقة… ودا بيؤكد حاجات مهمة:
1- الداير يحل مشاكلو يا يشيل السلاح يا يكورك في وش الرئيس!
2- الدولة ما فيها مؤسسات خدمية زي المحليات والزكاة والإسكان، أو فيها لاكين ماشايفين شغلم وما فاضين من اللغف!!
3- توجيهات السيد الرئيس بخصوص (الصرف) بتلقي استجابة سريعة جدا جدا قبال ما يغير رأيو طبعن! وأكيد مستند الصرف لو طلع بي مليار مثلا حيكون مستند الإستلام بي مليونين تلاتة … دا لو فيها مستندات أصلا!!!
4- أما توجيهات الرئيس (النادرة) بخصوص استرداد اللغف فيكون مصيرها التلكؤ والتعويم والصهينة علي أساس إنو ما عايزين يمنعوا الرزق الذي ساقه الله إلي اللاغف!!!!
5- إنو ريسنا زول مسكين ساي وعاطفي وطييييب أوي وحنيِّن زي عش العصفور!!!!!
كسرة: عشان ما تقولوا حاجة يا عوازل … أهي مرة شيييييييينة!!!!!![/B]
[SIZE=4]جنينه و غفيرها خرف[/SIZE]