واسعة شوية

لو كنت مكان (الحكومة) لقمت بإستغلال كل أدوات (الإعلام) من أجل عكس صورة زاهية لما هو عليه الحال بعد (الإحتجاجات) الملتهبة الأخيرة ولحاولت بشتي الطرق أن أوضح للمواطنين و(الناس عموما) بأن الأمن بعد تلك الموجة قد إستتب وإنو السلع موجوووده والمواصلات فضيييياه ..
ولكن بعد أن شاهدت أحدى القنوات الفضائية الحكومية وهي تقوم بإجراء إستطلاع (قال عفوي) مع المواطنين في أحد الأسواق تأكد لي تماما ًبان هذا الإستغلال لم يكن (أميناً) وأن (الإعلام الحكومى) ممثلاً في تلك القناة لا يحترم (عقل) المشاهد البته ويبث ما يود أن تكون عليه الأشياء وليس كما هي عليه الآن وتعالوا لنعرض بعض مما جاء في ذلك البرنامج مع بعض الخيال (وبراكم أحكموا)
المشهد (نهاري) .. أحد الأسواق .. مسؤول من المحلية ومعه بعض الموظفين يجوبون السوق .. الكاميرا تتابع المذيع وهو يتوقف أمام بائع موز وهو يمسك بالمايك :
– معانا المواطن منو؟
– معاكم المواطن عبدالفضيل
– طيب يا عبدالفضيل .. الوضع هسه كيف في أي تخريب أو حاجه زي دي
– لا والله الأمن مستتب وقاعدين نرجع بيوتنا الساعة تسعة بالليل ومافيش حد بيتعرض لينا
– وقاعدين تلاقوا مواصلات ؟
– أيوه المواصلات قاعده والحمدلله وما فيها أي صعوبة (ياخي المواصلات بالليل معدومة)
– طيب البيع كيف؟
– والله قاعدين نبيع الحمدلله والزبائن كتااار (ليس هنالك زبائن على الشاشة)
– وبعد رفع الدعم ده الأسعار إتأثرت؟
– لا لا .. لا إتأثرت لا حاجة .. الأسعار نزلت (شوفوا جنس الكضب ده) !
– ممكن تورينا الأسعا كانت كم وهسه كم ؟
– كيلو الموز كان بى خمسة جنيه .. هسه بنبيعو بي تلاته جنيه وبالليل ممكن نبيع الكيلو بإتنين جنيه
(من الخيال) : بعد أن تنتقل الكاميرا لمكان آخر يتجه أحد المواطنين الذين كانو يستمعون للحوار
– بالله أديني 2 كيلو موز
– (عبدالفضيل يتفرس في القروش) : ديل ستة جنيه !
– مالهم مش قلتا الموز الكيلو بي 3 جنيه
– تلاته جنيه شنو يا زول إنتا جنيت ؟ إنتا ما سمعتا بالزيادات دي ؟ والله ولا راسمالو !!
(المذيع يمسك بالمايك ويلتقى بإحدي المواطنات)
– ممكن تعرفينا بى نفسك؟
– المواطنة ست النفر أحمد
– يا ست النفر هل لاحظتي أى زيادات في السوق؟
– والله الحاجات أسعارا ياها ذاااتا وفي حاجات كده كمان سعرها نزل (واااااسعة مش كده؟)
– يعني ما إتأثرتو بالقرارات دي؟
– لا ما إتأثرنا الحمدلله .. قاعدين نجي نشتري مستلزماتنا في أمان الله والقروش موفره وفايضة (شفتو كيف؟) !
– عندك أي رسالة يا حاجة ممكن توجهيها للمواطنين
– بالحيل .. عاوزه أقول ليهم ما تسمعو كلام الناس الطابور خامس ديل .. رفع الدعم ده ما أثر في أي حاجة والأسعار ياها الأسعار !
– (خيالي) : طيب يا ست النفر لو قلنا ليكي معانا سعادة المسؤول عن المحلية أهو قدامك تطلبي منو شنو؟
– (على الشاشة صورة المسؤول هو ينتظر طلب ست النفر)
– (متفاجئة وهي تخرج من النص) : والله بطلب منو يديني تصديق حته أبيع فيها الشاي في البرندات ديك عشان الحياه يا ولدي بعد الزيادات دي بقت صعبة وما محتملة والسوق بقى نااااار.