سمعت النقاش اللآتى …
ـ إنتن يا نسوان …مسئولات من الخير …فاطنة عملت شنو مع راجلا المطرطش دة ؟
ـ هى صحى ..مقطوع الطارى دة لسة بجيها سكران وش الصباح ؟
ـ السكر براهو ..؟ الكلام الدق …
ـ أجى يا يمة ؟ كمان فاطنة المرة البدقوها ؟
ـ هيا يمة بدقها دق العيش الراجل الناقص المتباقص دة ..شكيتو على الذى ما خلقو ..
ـ دة كلو كوم ..كمان بكسر العدة ..التقع نحت يدو كلها غضب الله جاها..
ـ دة كان نصيح أطير طيّار أمى ديك …!!!
ـ حسة يعنى نسوى شنو ؟ نخليها للحمار دة لامن يكتلا ؟
ـ والله يا اخوانا قالوا من الواطة تصبح ..يشيل الورقة والقلم ..يسجل أى شىء كسرو بالحتة …وآخر النهار يجيها الولد شايل العدة جديدة فوق راسو ما ناقصة ولا ملاحة ..
ـ يعنى شنو ؟ خلاص مرق من اللوم ؟لما يسل ليها عينا ..كمان بجيب ليها واحدة جديدة ؟
ـ ولا وشها البقى اسود من كترة الضرب شوف عينى زى الدوكة ..أها ماشى يجيب ليها جلد بدل الدبغو بالضرب دة ؟
ـ أنا بس قلت إمكن هى بتنرفزو ..يعنى تقول ليه مشيت وين ؟الأخرك شنو ؟
ـيعنى لو سألتو السؤال حرم …
ـ المهم نسوى شنو ؟نخليها كدى ؟
ـ لا..لا…نمشى ليها ..ونقول ليها ..إنتى يا فاطنة ..لو الراجل جا وانتى صاحية ..طوالى إتدمدمى بتوبك ..وأعملى روحك فى سابع نومة ..ومهما عمل ما تسأليهو …
بعد يومين جاتنا الجارة نفسها …أمى سألتا ..أها فاطنة حصل ليها سنو ؟سمعت كلامنا وعملت بيهو ؟
ـ آى بالحيييل ..بس برضو دقاها …!
ـ أجى يا يمة عيب الشوم ..ليه ؟
ـ قال ليها ..ما بتعبرينى ؟كلب أنا ؟ ما زول ؟ ما سائلة فينى ؟
قالت ليهو ما سمعتك ..قام أداها كف ..وقال ليها ..ليه فار أنا ؟ طيب دة كلو عرفنا ..العدة ما سمعتيها بتتكسر ؟ على الطلاق ما أجيب ليك بدلا تاني !!
( من ابداعات الروائية / الاستاذة / #عفاف عدنان)..
تهاني عوض[/SIZE]
مقالات ذات صلة
-
-
-
-
-
-
-
-
