بخــور البـطُن
ما في بني آدم ما بحب يسمع نضم سمح.. أو يتعامل معاملة سمحة.. وخصوصا التعامل بين الجنسين.. والمرأة أكتر ميلا وترحيب بالنضم السمح.. وبصورة عامة المساخة واللداحة ما سمحة.. وما مشكورة.. والزول النضمو مر ودراب دا زول كعب.. مهما كان فيهو من خصال تانية سمحة.. لكن الحمد لله.. بدت الناس تكون لطيفة وظريفة أحسن من أول لكن برضو المساخة في.. التعبير عن المشاعر عندنا فيها اشكال كبير.. الزوج لو عبر عن مشاعرو لي زوجتو.. بيعتقد انو دا بقلل من قيمتو.. والزوجة لو راجلا حاول يعبر عن مشاعرو يدخلها شك فيهو.. وخصوصا لو مطولين مع بعض وجا قال ليها يا فلانة (أحبك).. تتخلع وتتبهط وتقعد تعاين لو.. وتمشي تقعد في طرف أول عنقريب وتتمحن وتطنطن في سرها “علي الخلا.. الراجل دا اظنو جنا؟.. اها كان جنا.. الوليدات ديل البيصرف عليهم منو؟ ” وممكن تستشير صاحبتها بالتلفون وديك تواسيها في الحب الوقع عليها فجأة دا “انتي عارفة ما تشيلي هم ما بيكون جنا.. وحات الله زولك دا يكون شارب لو شي.. كدي سوي ليهو ليمون مع جردقة.. وخليهو ينوم شوية وبيصحا طيب.. وبيخلي نضمو دا.. سعد الله راجلي دا شفتيهو كان وقت يجي شارب ديمة يقول لي كدي.. من خشم الباب يكورك لي يا سلمى أحبك.. طوالي اعرفو سكران.. لكن الحمد لله ربنا هداهو وخلى الشراب ليهو خمس سنين.. اها تاني يطرشني فيها”..
الرومانسية في العالم أصبحت شغل شاغل كل الناس.. ويظهر بقت فيها مشكلة لدرجة أنو بقى يو ليها مسابقات ومنو أكتر راجل رومانسي في العالم، كشف موقع سي إن إن.. عن أكثر الرجال رومانسية في العالم وكانت النتيجة للعشرة مراكز الأولى:-
المركز العاشر الفيتناميون
المركز التاسع الايرلنديون
المركز الثامن السويديون
المركز السابع الامريكيون
المركز السادس اللبنانيون
المركز الخامس البرازيلون
المركز الرابع الفرنسيون
المركز الثالث الايطاليون
المركز الثاني الارجنتينيون
أما أكثر الراجل رومانسية في العالم حسب السي إن إن فهم الاسبان.. قالو الأسباني إن مرق من البيت وماشي الدكان والدكان لصق البيت وجا راجع يجيب لي مرتو وردة تعبيرا عن حبو.. أما ناس أسد الخشش.. يجيب الفول في كيس والرغيف.. ويرزعن في التكل ويقول لها “قومي سوي العشا دا، خلينا نسمم”.. وهي تكون راقدة ترضِع في الشافع .. يعاين لهم “الشافع دا أصلو ما بيشبع؟! اليوم كلو.. جغ جغ جغ.. جغ”..
بصراحة يا أسد الخشش انتو الطيش مافيها نضم!. أنا عارف الظروف صعبة.. علا ما يبقن اتنين عدم أكل سمح وعدم نضم سمح..
الباب البجيب الريح- صحيفة اليوم التالي
