د/ عادل الصادق المكي

اللجوء لقانون حمورابي “2”


[JUSTIFY]
اللجوء لقانون حمورابي “2”

أمبارح اتكلمت عن قوانين حمورابي التي وضعت حول العام 1750 (قبل الميلاد) يعني قبل 3763 سنة.. ووريت العجبني فيها والما عجبني فيها.
ومواصلة للمواد العجبتني: المادة (33)، من قوانين حمورابي والتي منطوقها: (إذا رئيس أو حاكم سعى أو وافق على تخلف جندي عن حملة الملك وأرسل شخصا نيابة عنه فإن هذا الحاكم أو الرئيس يعدم).. يعني بالواضح والواضح ما فاضح مافي واسطة.. أي زول يمشي الحرب.. يعني الحاكم ما يقعد يكورك “الحرب الحرب” ويلقط وليدات الناس من الشوارع وهو يدس وليداتو ووليدات اخوانو ووليدات أخواتو.. يودي وليدات الناس الحرب.. وبعد الانتصار يجي يكورك.. ” انتصرنا انتصرنا”.. ويبقوا هو و وليداتو أسياد الجلد والراس..
أعتقد أن المادة دي فيها عدالة شديدة..
أما المادة (10) فتقول: (إذا سرق سيد ثروة تعود للإله أو للقصر فإن ذلك السيد يعدم كذلك يعدم من يتقبل المسروقات منه).. يعني لو في زول سرق أموال الدولة يعدموهو.. نان باقي لكم تاني في ود مقنعّة بمد ايدو على المال العام؟.. إحقاقا للحق ” ود مقنّعة” من المفردات البي يستعملها حسين خوجلي.. شفتو نحن بنعرف الحقوق الادبية كيف؟
ومن يستولي على حقوق الآخرين مهما كان شكلها قطعاً ليس جديرا بأن يتحدث عن هضم الحقوق.. لكن نسوي شنو الدنيا بقت قلبوتا..
أما المادة (25).. فتقول (إذا شبت النار في دار سيد وذهب سيد لإطفائها، فحط عينو على اموال صاحب البيت فإن هذا الرجل يلقى في النار هذه).. شفتوا النضم دا؟.. يعني هو شايل جركانتو وبيطفي في النار.. ونفسو حدستو يشيل شي أو شال ليهو غويشاية دهب واللا خويتم دهب وحشرو في جيبو.. والناس شافوهو.. يدوهو النار طوالي.. ولا يشاورو الحاكم.. الحريق هنا رمزي لأي كارثة تحصل.. زي السيل.. بيت وقع.. عربية اتقلبت أو عملت حادث في شارع دولي.. وخصوصا لو أصحاب العربية أسرة جاية من الخليج.. والمرا مليانة دهب.. وجا زول قبال يبلغ ملص الدهيبات من المرا الميتة.. وشال القريشات.. وحفضن سمح وبعد داك بلّغ.. وقعد يرفع في الميتين.. مع أهل الخير.. ورجع محل دسا القريشات والدهيبات.. وهو مبسوط ويغني ” الميت مسولب والعجاج يكتح”..
زي دا لو اتقبض زمن حمورابي بيعدموهو.. مافي نضم.. وياما فيكي لفح يا حوادث الشوارع الدولية.. واحدين بقى اكل عيشهم فيها يصنقر ويشوف عربية جايه من بعيد جارية جري شديد، يرفع إيديهو ويشحد في الله ويدعو دعاء الانقلاب: “يا رب لستك يضرب.. وتتقلب بس جنبي هنا”.. وممكن بعد شوية لو الحكاية قطت.. هو براهو يبقى سبب في الحادث بأي أسلوب.. والعربية تتقلب ويجري يلقّط الفيها النصيب.. شاحد الله أي زول يشيل دهب من حادث.. لما يمشي يصرفو يلقاهو دهب صيني!
انتهى..
لكن إن شاء الله يجيب مريسة تام زين!

[/JUSTIFY]

الباب البجيب الريح- صحيفة اليوم التالي