أغلى ضُرُس في العالم
فرقة البيتلز.. الخنافس فرقة موسيقية عالمية كانت ليها شنّة ورنّة في الستينيات.. نجمها الانجليزي جون لينون.. كان مالك قلوب العذارى.. ومجنن بنات حواء علي مدار الكرة الأرضية.. مؤلف اغاني ومغني وعازف جيتار.. يساري ناشط و من غباهو مشى يتنشط في أمريكا.. أغتيل وعمره أربعين سنة (1980).. وقصة اغتيالو طويلة عريضة.. فيها السر والجهر الزول القتلو قال “بيجيني زول يوسوس لي في اضاني يقول لي اقتل جون لينون دا.. وقلت ما اكسر خاترو.. قتلتو ليهو”.. جون لينون قلع ضرسو المسوس في المتبخ عند اهلو.. أداهو لي مديرة منزلو قال ليها الضريس دا هدية لي بنتك.. البنية حفضت الضرس.. قبل يومين عرضت ضرس المغني الشهير في المزاد.. تكون فلست وما لقت شي غير الضرس دا(الضرس المسوس ينجد الزول المفلس).. اشتراهو طبيب اسنان كندي بمبلغ 61 الف دولار.. هذا الضرس المسوس الغالي.. ذكرني قصة اخونا احد زملاء التغرب والغربة في السعودية.. شاكل هندي في الغربة وضربو بونية قلع ليهو ضرس.. الحكاية بقت محاكم.. الهندي لافي الضرس في قطينة وكل جلسة يمرقو من جيبو ويوريهو للقاضي.. في النهاية حكمت المحكمة بان يعوّض الهندي بمبلغ خمسة الف ريال.. الهندي قبض القريشات.. هندي تاني سمع بالقصة وبقى يجي يكاوي زولنا ودايرو يدهو بونية.. عشان يقلع ليهو ضرس.. ويعوضو خمسة الف ريال ويمشي اجازة لي اهلو.. صاحبنا بقى ينهزرو ساكت يوم سالو”صديق.. انت بس قِر قِر ِقر.. مافي بونية؟” يعني انت بس تهرج مافي بونية؟.. قلت لهذا الهندي الانتهازي يا زول الاقربون اولى بالمعروف.. وخشمنا دا مليااااان ضروس وقاعدات ساكت.. اعتقد ان الاستاذ السر قدور في برنامج اغاني واغاني ينادي طه سليمان بــ(طه ابضرس).. استبصارا للمستقبل.. وان ضرس طه سوف يكون له شأن في دنيا المزادات.. كما كان لضرس المغني البريطاني جون لينون.. ونحن في ديك الساعة لما يكون عندنا فنان ضرسو يبيعوهو في المزاد.. اوصي اي فنان يلقع ضرسو يحفضو.. الظروف ما معروفة يجي يوم يجيب سعر يحل ليهو زنقة مزنوق.. كنت استغرب في اطباء الاسنان.. لما يقلعو للزول ضرسو يدوهو ليهو في يدو ملفوف في قطنة.. اتاريهم عندهم فهم.. برضو الجراحين.. يمرقو حصوة.. يختوها في عليبة عند راس الزول.. والزوار يجو يتفرجو فيها.. وكل زائر لازم يبدي استغرابو”يا زول الحكاية شنو؟ لا حولااااااا.. النصيبة دي كلها كانت متحكرة في كلوتك؟ يا زول انت اتاريك كنت ممكون، مكنة نصيحة” وبعض الموسوسين تلقاهو قعد يعصر في جنباتو .. وخايف تكون قامت ليهو حصوة قدر النصيبة القدامو دي.. وبعضهم يشيلها معاهو البيت ويفرج فيها الناس.. وأي زائر لو ما ختا ايدو في نص راسو وقال “لا حولاااااا”.. بيعتبر زول كعب وقلبو اسود وداير الحصوة دي تقعد في كِلوة الزول دا ويموت بها!!!
[/JUSTIFY]الباب البجيب الريح- صحيفة اليوم التالي
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة