اليوم العالمي للحمامات

الأمم المتحدة.. أُنشئت عام 1942.. وأنشأها الحلفاء بقيادة الولايات المتحدة.. الاتحالفو ضد دول المحور.. بقيادة( ألمانيا إيطاليا اليابان).. وسموها الأمم المتحدة إشارة ليهم بس.. النضم دا ايام الحرب العالمية التانية.. انتهت الحرب.. وانتصرت دول الأمم المتحدة.. قامو عملوها لكل دول العالم.. عشان يقدرو يسيطرو على الحروب وإشاعة السلام في العالم والتعاون الاقتصادي والاجتماعي في العالم.. تقريبا كل دول العالم المستقلة أعضاء في الأمم المتحدة.. انبثقت منها منظمات “الانبثاق دا اتاريهو من الأمم المتحدة بادي ما عندنا هنا برانا.. لكن حقنا انبثاق السرور انبثاق بمتوالية عددية هبة من رب العالمين، لجنة واحدة تنبثق منها لجنتين واللجنتين تنبثق من كل واحدة لجنتين يعني آخر الشهر يكون عندنا أربعة وستين لجنة لموضوع واحد.. وكل عضو ياخد حافز انبثاق.. وأعضاء اللجنة رقم 64 يكونو نسو الموضوع الأساسي ينط واحد ويسعال يا جماعة نحن حسي منبثقين فوق شنو؟.. يقرصو ويسكتو واحد جنبو يا زول انت مش قاعدين يدوك حافز؟.. خلاص امسك شلاليفك ديل عليك”.. المحيرني ناس البلد دي جنو في اجتماعات.. تضرب لي أي زول تلفون مايرد تجيك رسالة يقول ليك أنا في اجتماع.. اجتماعات فوق كم؟ اقتصاد منتهي، صحة منتهية، وتعليم منتهي، وأمن منتهي، وثقافة منتهية، وزراعة منتهية.. قلت انبثقت من الامم المتحدة منظمات صحة وتعليم وزراعة وثقافة.. دي نبذة صغيرونة ومختصرة عن الأمم المتحدة.. الجايطة العالم. وبقت تدخّل قدومها في أي شي في الدنيا.. .وبقت تسوي ايام واحتفالات فوق عينا.. منها السمح.. ومنها اليدخّل الزول في ضفورو.. وان نضم ووب.. وإن سكت تراها دي الحالة.. مؤخرا قررت الأمم المتحدة ان يكون يوم 19 نوفمبر يوما عالميا للاحتفال بـ(الادبخانات).. وقال بان كي مون الأمين العام للأمم المتحدة.. إنه وللأسف الشديد يموت كل سنة 800 ألف طفل بالاسهالات.. أي بمعدل أكتر من طفل في الدقيقة.. يا ربي الاحتفال بي الحمامات بي يوقف الإسهال؟ يمكن!!.. وخصوصا لو كانت الحمامات مسكونة.. ولو شاف زول بيقرو ليهو قرآن عشان يمرقو منو الجن.. الجن يقول الزول دا عفص وليداتي في الادبخانة عشان كدي ركبتو.. نان انت ما تأدب وليداتك وتلمهم من تحت كرعين الناس ..
خلاص الأمم المتحدة حلت كل مشاكل العالم وكل زول علي ضهر الدنيا ماكل أكل سمح وشبعااااان وباقي علي الحمام عشان كدي وجب الاحتفال بالادبخانات.. عشان ما نتمرد علي الشرعية الدولية اتمنى ناس الادبخانات العامة عندنا أن يكون هذا اليوم مجاني.. احتفالا واحتفاء.. وعشان ما يقولو نحن مكاجرين النظام العالمي الجديد.. وضد حقوق الإنسان.. وعدم احتفالنا بما يخرج من السبيلين دليل واضح.. وضوح الشمش في عز نهار الصيف.. ويستوجب عقوبات ويمنعو مننا القمح.. !!!!.. (يا اخوانا الأمم المتحدة دي، دايرة تسوي علينا كيفن؟.. حتى الادبخانة دايرة تدخل معانا؟ يبقن علينا اتنين، جن وامم متحدة)!!