الريد اختلط بالدم

وَلَقَد ذَكَرتُكِ والرِّماحُ نَواهِلٌ
مِنّي وبِيضُ الهِندِ تَقطُرُ مِن دَمي
فَوَدَدتُ تَقبيلَ السُيوفِ
لأَنَّها لَمَعَت كَبارِقِ ثَغرِكِ المُتَبَسِّمِ
عنتر بن شداد العبسي.. فارس الفوارس.. كان زول فارس وجنب “تنطق زي كعب”.. جنب يعني يجتنبوهو الفرسان.. وجنباً يقلب البيعة.. يعني مافي شي بيقيف قدامو.. وفي عاميتنا السودانية يقولو ليك “يا زول.. الزول دا اتجنبو”.. يعني اختاهو.. أي اجتنبه.. كان هكذا عنتر.. أو كما تروي الرويات.. هو طبعا بيكون كان فارس لكن لمن قصصو وصلتنا يكون اتعمل ليها توم وشمار.. الأبيات الفوق دي بداية لقصيده شهيرة.. ويعتبر بعض النقاد أن البيتين ديل من أغزل ما قالته العرب.. أي اجمل ما قيل في الغزل.. سيوف ورماح ودم يقطِّر وكبسيبة و برضو اغزل ما قالته العرب؟.. عنتر قال لي عبلة أنا اتذكرت يا عبلة والرماح صابة فيني شووووو.. وتقطع من جسمي.. وبيض الهند هي السيوف الهندية الصناعة “الوقت داك الصين ما عرفت تصنع شي.. علا كان كان عرفت كان عنتر واخوانو مسكو مواسير من امها.. السيف ان هزوهو ساكت يتكسر”.. تقطر من دمي.. يعني دمي يقطرمن السيوف الهندية دي.. وودت تقبيل السيوف لانها لمعت كبارق ثغرك المتبسم.. ولو ما خفت اللوم.. قرررررربت ابوس السيوف دي.. هو لو كان بالصح فالح وراجل، ما كان يقبلها؟.. عشان يرجع لي عبلة بلا شلاليف!! على أي حال نقبل ونسة عنتر دي.. وأرجع أقول دي عينة من الأغاني العاطفية الدموية في التاريخ العربي.. أما نحن عندنا مكتبة من الأغاني الدموية.. والبيدخل الدم مكون أساسي فيها.. على سبيل المثال لا الحصر غنية مروي يقول الكابلي “حبيبي السادة خفيف الدم”.. وبرضو غنية صالح الضي” يا جميل يا حلو دمك شربات مكلمو”.. أظن والله اعلم الدم الشربات دا دم سكري ساااااااكت.. يكون سكريهو ضراب في الخُمسميات.. وأحمد المصطفى.. يمن علي من أحبه بقوله “حبيبي حبك زرعتو في قلبي وسقيتو دماي”.. ومن الأغاني التي كان للدم أثر كبير فيها غنية لزيدان إبراهيم “لو الأماني بايدي.. كنت اهديك عيوني واسقيك من وريدي” سقاية وشراب دم راسو عديل.. في مجاعة سنة ستة في ناس شربو الدم لحوجتهم الماسة للبروتين الحيواني (اضطرار غير بغي)…. أما بعض قبائل جنوب السودان الدم وجبه أساسية ورئيسية.. يجرحو البقرة ويجيبو كورية واللا قرعة ويملوها دم ويشربو.. ولو واحد فيهم انت عزيز عليهو وعزمك ممكن يقول ليك “عليك الله بعدين تعال اشرب معانا دم المغرب”.. بدل شاي المغرب في الشمال.. وفي غنية حبييبي تعال نتلم ما دام الريد اختلط بالدم.. اختلاط الريد بالدم ضار بالصحة.. زي السجاير يؤدي الي امراض القلب والشيخوخة المبكرة وتصلب الشريان وسرطان الرئة.. وواحدة اتبرعت لي واحد بدم.. وقبال ما يفتح عيونو عديل من المرض.. اتفرجخت في نص حوش المستشفى وجابت دلوكتها وقعدت تغني “شدة ما بريدك الدم الفي وريدك من دمي يا غالي”..