للبيع.. زوجة موديل 1959

غايتو الخواجات ديل يمحنو الما بيتمحن.. كل يوم كُبّة جديدة.. خبر تناقلته المواقع الاسفيرية في النت.. القصة كالآتي:-

البريطاني بوب عندو موتر طول النهار قاعد جنبو ويمسح فيهو ويربّط فيهو..

مرتو زهجت وغارت قالت ليهو: “هوووي يا بوب.. يا أنا يا الموتر دا.. وانا والموتر دا ما بنقعد في بيت واحد”.. قال ليها (عوجة مافي تب).. عمل اعلان في موقع اليكتروني عرضهم الاتنين للبيع.. فوق كم الاتنين أبيعكم واريح دماغي..

كانت مواصفات الموتر:

نوع: هارلي ديفيدسون

موديل: سبورتستر XL1200L.. 2006.. بحالة ممتازة.. وكان طوالي تحت الصيانة.. أصلو ما قاعد ألعب فيهو.

مواصفات الزوجة:

موديل 1959.. برضو “كانت تحظى بصيانة مهمة” أعتقد كانت تحظى بصيانة مهمة دي إنو عمل ليها عمليات علي حسابو: عمليات تجميل، شفط دهون.. وكان مكشبها زي الموتور وزي ما الجماعة قاعدين يكشبو الركشات عندنا ويكون كاتب علي ضهر المرا ال للبيع دي: “دي ما شغلتنا إلا الظروف جبرتنا”..

التسليم للمنازل.. متاح وفوري!!!!!..

آخر سعر وصلو: 5900 دولار.. لكن ما عارف للموتر واللا للمرا؟.. واللا ليهم الاتنين؟.. حسب كلامو..

مرفقة صورة في الموقع.. للبضاعة.. “المرا واقفة تتبسّم جنب الموتر” وشكلها راضياااااااانة ومبسووووطة..

أها الناس ديل، الراجل والمرا ديل.. وقت اصلهم زهجانين من بعض البيع لزومو شنو؟.. كل زول يمشي أهلو وخلاص انتهينا.. شيل الحال لزومو شنو؟.. وبقو نضم وونسة للكلب وفايت الدرب.. أكتر من عشرة مواقع اسفيرية جايبة صورة البضاعة.. وقال وقال وقال.. غايتو نحن ناس كويسين وحاة الله.. المرا إن زعلت تلفح شافعها في صفحتا.. وتشيل دلاقينها في كيس وتمشي تحرد في بيت ابوها كم يوم.. راجلها يلحقها ويمشي يقعد في طرف اقرب عنقريب ويقعد يطقطق في أصابعيهو يتعضّر. ويجو راجعين سوا.. هو يكون خامي الشافع في كتفو وهي شايلة كيس الهدوم.. وبعد تسعة شهور من الحادثة تلقى الراجل يتجارى كايس يتديّن حق السماية.

وبعدين بوب ما ورانا المرا دي عندها وليدات واللاّ لا؟.. وكان عندها داخلين في البيعة واللا داير يبيعهم بالقطاعي، قطع غيار؟..

الخواجات من حقارتهم حقهم سمح تب وحق الناس كعب.. حسي النضم دا لو بقى عندنا هنا الدنيا تقوم وما تقعد وناس حقوق الإنسان يطلعوا بيان استنكار وآخر السنة يسووا تقرير ويوم النتائج يجيبوا السودان الطيش عديل مش تالت الطيش.. وناس حقوق المرأة يوسعوا دارتهم ويقعدوا يردحوا فوقنا.. وناس محاربة الاتجار بالبشر يشيلوا طارهم ويلفوا بيهو الدنيا.. والسوداني لما يفلس ببيع مرتو ووليداتو.. ويفصلوا لينا قانون قاطعنوا من راسهم.. والبند التاسع من ميثاق الامم المتحدة “يحق للأمم المتحدة في حالة عرض زوج زوجتو للبيع يحق لها التدخل السريع وفركشة البيعة.. وبيع الزوج وأبوهو هوادة.. بدلا عن الزوجة”!!