د/ عادل الصادق المكي

العين بي حسين


[JUSTIFY]
العين بي حسين

من ضمن المتحلقين علي برنامج (مع حسين) الذي يقدمه الأستاذ حسين خوجلي في قناة أمدرمان الفضائية.. حضرت معظم الحلقات.. وبكل اهتمام بكوّع.. واقعد اصنّت.. لي نضم حسين.. ما شدني إلى البرنامج بدايةً الجراءة التي كانت في الحلقات الأولى.. واعتقد أن هذا هو ما شدّ معظم المشاهدين.. ما في شك أن الأستاذ حسين منضمّة.. وممكن ينضم من حسي لي باكر.. ما شاء الله عليهو.. ويحكي ليك عشرات الحكاوي.. لكن ظانيتو شيخ حسين ما قاعد يعد للبرنامج.. غايتو بيجي شايل وريقتو دي.. ويقرا منها شوية.. وبعد شوية يسرح ويسرح بنا.. يدخلنا بي حمد ويمرق بنا في خوجلي.. ويعدي بينا على أمدرمان.. من فتيح للخور للمغالق.. وبيت المال وودنوباوي.. وفجأة لا نحرا لا ندرا نلقى نفسنا نتلفّت في الشَرفة.. غايتو شلهتنا جنس شلهتة في الدنيا دي.. .. لكن برضو البرنامج من ناحية ونسة، برنامج سمح.. علا النضم الفيهو التاني أن مسكناهو وقعدنا ندقق فيهو.. فيهو إنّ .. وإنّات كتاااار.. شيخ حسين لي حسي كم مرة يقول لنا السودان مليون ميل مربع .. ما بعرفو ناسي انفصال الجنوب واللا لي حسي ما عندو خبر؟.. وما عارف انو السودان إترم.. ونقص؟؟.. الغريبة في نفس الحلقة يقول الجنوب دا خلوهو ما خلاص انفصل!!.. وبقى دولة براهو.. غايتو هو مجتهد يقدم شي للناس.. علا اقتراحاتو بعد مرات اقتراحات زول تريااااااااان.. وقايل خلق الله دي، كلها تريانة.. اقترح مرة انو العاصمة دي تتزرع جت شًدر.. وما اظنو عارف انو قدر الشًدر المزروع عروقو قاعدة تدخل وتقفل مواسير الموية.. والشوارع كلها محفرة. حد ومد يسللو في العروق من المواسير.. استوقفتني حلقة يوم الاتنين 10 ديسمبر.. .. قال فيها وهو بيقرا في الصحف “الفين واربعمائة متشرد في الخرطوم”.. وعلق على الخبر ” خلاص حزب السودانيين.. من باكر دي دايرين الفين وأربعمائة أسرة.. كل اسرة تتبنى متشرد وااااااحد”.. صراحة كنت متوقع طوالي يدق سدرو ويقول أنا أول واحد.. ويمشي يغشى جنب سينما كلوزيوم ويشيل واحد يوديهو اهلو ويطلقو وسط وليداتو!! “الشي قايلم جريوات”؟.. يا شيخ حسين .. داير رب الأسرة المتبنية يزيد همومو مع الأكل والشراب يبقى كمان في سلسيون؟.. وبعد يومين يجي يلقى البيت كلو، كل واحد عاضي لهيو دلقان في خشمو.. وواحد من وليداتو مسطول واقف يعاين لي امو و متمحّن ومتحيّر ويسأل في نفسو “المرا دي ما غريبة عليّ.. يا ربي المرا دي، أنا شايفها وين؟”.. وين مؤسسات الرعاية الاجتماعية والإصلاحية ؟.. يا شيخ حسين نضمك من ناحية انسانية سمح تب.. علا داير شوية مراجعة.. اها تاني نضم القطرين اللات السكة حديد.. زعلان كيفن يودوهن اتبرا؟ يودوهن مدني.. يا ربي يكون شيخ حسين قايل اتبرا دي “لينينغراد”؟!!.. اتبرا في السودان ومدني في السودان.. قول يجيبو قطرين لمدني برضو.. لكن ما يقلعو اللات اتبرا يودوهن مدني.. أفو يا شيخ العرب!! نحن نقعد عُمرنا كلو نتقالع..!! وتقول برضو في مؤامرة علي السودان؟.. جنس نضمك دا مؤامرة.. نحن قاعدين نتأمر علي نفسنا.. ونبهّت أمريكا!!

[/JUSTIFY]

الباب البجيب الريح- صحيفة اليوم التالي