البيوت أسرار
الحب والمفك:-
في أمريكا في تكساس.. صحت ماري من النوم.. بعد الضهر.. لقت راجلها ما جهّز ليها الفطور.. نضمو وهرجو مع بعض.. في النهاية اتناولت ليها مفك.. وطعنتو بالمفك.. مما سبب ليهو اذى جثيم.. اشتكى لي ناس البوليس وقبضو المرا.. اها دا كلام عاد؟.. لكن تفسيري للحادث الشنيع دا.. انو المرا دي نامت سكرانة وصبحت السكرة بايتة معاها.. مرا تنوم لي بعد الضهر باقي لكم دي نصيحة؟.. وبعيدن هو زاااااتو غلتان.. المفكات والمفاتيح والشواكيش.. والحاجات الزي دي.. بيسو ليها شنطة حديد.. ويقفلوها فيها.. والمفتاح يدسوهو! وبعدين في زول عاقل في الدنيا دي، يعرس ليهو مرا من “تكساس”؟.. تكساس دي، في افلام الكاوبويات كعبة وناسها شر!!
…. … … … … …
نيولووك:-
جلست قبالته.. بي شلفوتها الفوقانية الوارمة.. من قرصة حشرة
كان يقرأ.. ويتمعّن في صورة.. في صحيفة.. الخبر” الفنانة هيفاء وهبي تستقبل العام الجديد بنيو لووك.. يكلفها قرابة الخمسة آلاف دولار”
نظر إلى صاحبته..
ونظر إلى هيفاء..
ثم قام وصلى ركعتين شكرا لله.. أن جعل لزوجته نيولووك لا قرش لا تعريفة!!!!
………. .. . .
استئصال نخرة:-
الزول النضمو كتير دائما نهدده باننا ح نقطع ليهو لسانو.. أو نخيط ليهو خشمو.. وبعد مرات نكون قنعانين منو.. وإننا حتى لو خيطتنا ليهو خشمو ح ينضم ونقول ليهو” لو خيطو ليك خشمك تنضم بي محل تاني”.. ونعني بمحل تاني ممكن ينضم باضنيهو.. بي نخرتو.. أو أي مكان آخر يقع عليه الاختيار.. وردت الانباء من افغانستان هذه المرة ما زول فجّر نفسو.. لكن ان زوج قطع نخرة وشلاليف زوجته إثر نقاش في مصاريف البيت.. ما يثير الحنق.. النخرة دي قاطعها لي شنو؟.. الشلاليف ممكن نقول عشان ما تنضم!!..
…. … … …
عشان تاني ينقنق:-
المرة دي من باكستان.. المرا مسيكينة النهار كلو تقع و تقوم.. و متحشرة في المتبخ تسوي في الأكل.. جابت الغدا ختتو ليهو قدامو.. ضاق منو لقمتين.. وقعد ينقنق “أصلك ما بتعرفي تطبخي.. من جدعت فوقك الحبل دا ما سوتي تبيخ سمح.. دا تبيخ شنو دا حسي.. الشرووورة دا.. عايني حسي القرع دا مطفح كيفن؟.. ملح ملح مافي ؟.. مالو مسيخ وممصمص كدي؟.. انتي ما بتتعلمي من جاراتك ديل؟.. والله داك الليلة اتغديت مع (خان) جارنا دا.. مرتو ايدها طاااااااعمة طعومية.. ونفسها سمح في اللكل.. واكلت سماحة اكل عندها.. لكن التبيخ زاااااتو قِسم. زي ما النسوان قِسم” وقام.. شالت الصينية ودتها المتبخ.. لحقها في المتبخ وشبّح ايديهو في خشم باب المتبخ وقعد برضو ينقنق.. في التبيخ.. المرا اتغاظت اتناولت ليها فأس مركونة في ركن المتبخ.. وهوّت بها فوق رويسو.. المارقة منو النقنقة دي.. وفارق الحياة وفارق التبيخ!!
الباب البجيب الريح- صحيفة اليوم التالي
