شنكبة.. عنكبة
أحب الطرب.. والضحك.. ومكجن النكد.. والنكد اريتو حال عدوكم.. علا في السنوات الاخيرة دي.. ظهرو لينا فنانيين وفنانات.. ما بعرفهم بي يجو من وين؟.. فجأة كدا.. تلقى واحد يغني وينطط قدامك.. دا منو؟..
دا ما بتعرفو؟.. لا يا عمك انت برا الشبكة.. دا الفنان فلان.. دا لو داير تجيبو لي حفلة الا تحجز قبال الحفلة بي سنة..
“سنة للحول احارس في النصيبة دا؟.. عشان يجي يغني لي في حفلة؟.. سنة لكن ما بعيدة يا وليداتي؟ ممكن أموت أو يموت هو.. أو.. تموت الحفلة”.
قالو لي إن بقيت مستعجل وما بتقدر تنتظر.. ومزنوق.. أمشي اتحاد الفنانين تلقاهم قاعدين ساااااكت سوق اي واحد بيغني ليك.. سبحان مغيِّر الاحوال.. ومسطِّر الأهوال.
وإن انت صبرت واستنيتو بعد سنة تجيبو و يجي وتشوفو يتقدّل وتتخلع وتقول “دا ما الفنان الحجزتو السنة الفاتت.. داك ضعيفوني وجضيماتو مطفقات ومزعمّط وازيريق.. دا حسي سميييييين وجضوم ما شاء الله.. الجضوم ديل حقاتو؟ واللاّ تركيبة؟.. ولونو فتح”.. لا ياهو زاتو يا عمك.. قول ما شاء الله “ما شاء الله.. أها.. إن شاء الله بعد سِمن كدي، يكون غيّر غناهو وخلى النطيّط؟”.. لا ياهو غناهو زاتو.. علا النطيّط، بقى ينطط وهو واقف في بكانو.. خلى الجري والشهلتة.. ” واها ابان عضلات السُمان المعاهو ديل شيالين؟” شيالين شنو يا عمك؟ انت داقس؟ يا عمك ديل (البوديقارد) الحراس الشخصيين للاستاذ.. اي شنكبة عنكبة.. يكسروك كسر صاح”.. “يا وليداتي انا فضل فيني حيل للشنكبة والعنكبة؟.. وانا زااااتي البشنكبني ويعنكبني معاهو شنو؟.. .اها ديل نعل عشاهم ما علينا؟” لا لا يا عمك ما تشيل هم.. ديل بيغشو السوق و يدخلو اسمح مطعم يتعشو بايدهم وضراعهم ويجو مارقين.. ونوع اكلكم دا ما بينفع معاهم.. “اهاااااا.. كدي؟.. بي عافيتهم”!
والله ما حسادة.. ولا خوفا علي اضني.. اضني بالتقددن.. وان شاء الله السودان دا جت يتلقب غنايين.. وما يتلقي اليسمع الغنا غيري.. علا خايف علي الفنانين والفنانات الجُداد ديل.. الواحد يمسك غنية ويقعد يلااااااااوي فيها.. لمن تنتهي ونحن ايدينا فوق قلبنا.. يا يقوم يتلوم في هدومو.. وتتأثر مسيرتو الفنية.. أو.. يقع ررررررب ميت.. ونبقى في جناية.. وتحقيق.. وجيبو الشاعر وجيبو الملحن.. ويجيبونا شهود.. وسين وجيم.. غايتو شفت واحدة بتغني في غينة فيها جرة طوييييييييلة.. فتحت خشما.. . قعدت اشحد في الله ربنا يقفل الخشم دا برااااااااااحة.. .وما يتقفل غلط!! في احتفالات راس السنة اربعطاشر فنان وفنانة يحنسون البلاّل:-
(البلال زورني مرة.. انا يا بلال زورني مرة)
تلاتة سمعتهم في صالات
اتنين في الحلة
تلاتة سمعتهم في المواصلات
ستة في القنوات الفضائية
السيد/ البلاّل.. اتضح مما لا يدع مجال للشك انك متلوم في ناس كُتاااااااار.. وعلية اصالة عن نفسي ونيابة عن الشعب السوداني ان بقيت قاعد في البلد وما سافرتّ ارجو ان تزور الجماعة ديل .. عشان نرتاح شوية من الكواريك دي!!! وإننا بصدد عمل قرعة عشان تزورهم بالترتيب زيك وزي الختة.. ..
اللجنة القومية المنظمة لبرنامج زيارة “البلاّل” للفنانين والفنانات
الباب البجيب الريح- صحيفة اليوم التالي
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة