قوووووون

*قلت تطربني سميرة دنيا حد الثمالة.. والطشيش.. سميرة صوتها رائع.. هدوء وعدم شلهتة.. وتقعّد الغنا كل نغمة في محلها كركرب.. وصدقت المرحومة حواء الطقطاقة لما قالت عنها ام كلثوم السودان.. وغنا عثمان حسين يخلوهو لسميرة.. مافي زول تاني يفتح خشمو بي غنية.. ولو كنت من ورثة عثمان حسين كنت اباري الحفلات .. واي واحدة واللا واحد يغني لعثمان.. اضرب للتلاتة تسعات تجي تخمو.. الا سميرة تغني زي ما دايرة.. للأسف كل المنابر تلملم في ناس من وين ما بعرفهم ويفرضوهم علينا فوق عينا نسمعهم.. والبينضم وا سجمو ووا رامدو.. ناس المنابر والقنوات والإذاعات عليكم الله ضايرو الناس ديل لي سميرة دي شوية.. خلوها تقعد.. في محلها الطبيعي..
*يا سلام.. يا سلام.. ومليون سلام للاخوان (خنساء – يسين).. وديشليون سلام لمختار دفع الله.. مختار انت اريت ربي يخدِّر ضراعك.. ويضرّبك ياها بيضا محل ما تقبل ويعدلها عليك.. يا الداير تعدل غنانا.. وقناة قون بالبرنامج دا غلبت باقي القنوات كل قناة غلبتا عشرة صفر.. عشرة قينان نضيفاااااات.. خنساء ويسين يستحقو العناية والرعاية والتشجيع. ما شاء الله عليهم.. وربنا يحفظهم ويكفيهم شر حاسد اذا حسد.. بيغنو الحقيبة لو سمعوهم ناس سرور وكرومة يحردو الغنا.. ويقولو طالما البلابل ديل بيغنو نحن الغنا ختينا ليهو القدرو.. وشلاليفن ولساناتن تاني تغني معاهم تتقطع.. ولو سمعوهم ناس العبادي وابوصلاح وسيد عبد العزيز كان كل يوم يكتبو قصيدة عشان يغنوها ليهم “يسين واخيتو خنساء” ولو سمعنهم نسوان زمان وهم بيغنو كانن لي يوم الليلة يرقصّن ويوزعن في الشبالات طربا وفنجرة.. ويحلّفن ما يمرقّن من الدارة كان الوطا أطبقت على السما.. غايتو جيد للساحة الفنية وللأضان السودانية بيهم، وقبالها جيد لوالديهم.. أدعو أي زول بيقرا في النضم يسمعهم في قناة قون.. شخصيا لما يغنو بدخل في حالة وجد.. وغيبوبة وظاني ان قرصتني عقرب ما بشعر بها.. عقرب شنو؟ إن سو لي عملية زايدة ما بشعر بها.. قبال كدي قلت برنامج بنات حواء برنامج سمح مافيهو نضم واتمنى يمشي بنفس الطريقة.. والله يهدي بنات حواء ما يتفلهمَّن ويكترَّن المحلبية والصبغة.. علي كل قناة قون ماشة بخطوات منتظمة وماهلة ومدروسة للأحسن والأجود.. مع حوجتهم لمراجعة شوية برامج!
*الأستاذ أحمد هاشم (العطبراوي).. المطرب الشعبي القادم من عطبرة .. أداؤك رائع.. وممتاز.. استايلك جلاكسي.. فنان استعراضي بصورة مدهشة.. الكورس اكتر دهشة.. تناغم فريد بينك وبين كورسك.. ون تو.. منسقة.. علا يا اخوي قبل يومين سمعتك وشهادتك على احدى القنوات الفضائية السودانية بتغني في غنية الكحلاوي”قالو علي شقي ومجنون”.. انت قلت “إن شاء الله أجن”.. نط الكورس قال لك إن شاء الله.. وشايفهم كانو مستقبلين القبلة.. انت عارف النضم الزي دا كعب.. افرض حسي (إن شاء الله) دي صادفة ساعة استجابة دعاء.. من حفلتك دي وتركب القصبة.. اقترح ودرءاً للجن.. لما تقول إن شاء الله اجن (ما دام اصلك مُصِّر).. هم يقولو ليك “سلااااااامتك” ولو اتبعوها بي “برية” يكون خير وبركة!!