رأي ومقالات
نور الدين عثمان : يعني يا ناس المؤتمر الوطني قولوا كلامكم ده لي شعب ما مسلم وما بعرف يصلي وما عندو ( حديدة ) على قول شبابنا .. توجه اسلامي كيف يعني ؟
* يعني يا ناس المؤتمر الوطني قولوا كلامكم ده لي شعب ما مسلم وما بعرف يصلي وما عندو ( حديدة ) على قول شبابنا ، الحمد لله الناس بتعرف الاسلام كويس وبتعرف الشريعة وبتعرف يعني شنو حرية الانسان ويعني شنو عدل وامانة وصدق ويعني شنو أمان ويعني شنو انتخابات حرة ونزيهه وبعرف تعاليم لاسلام البتقول من غشنا ليس منا ، فمافي داعي تعيدوا وتكرروا في كلام وتصريحات ما عندها معنى زي كلام متمسكون بالشريعة وانتوا مطبقين قانون التحلل وفقه السترة ، يعني مابعيد تجوا ترفعوا شعار ناكل مما نزرع ونلبس مما نصنع تاااااااني طالما بديتوا تقولوا متمسكين وماضين في التاصيل .. الخ ، الشعب السوداني شبع هتافات وشعارات وشبع شريعة ومشروع حضاري ، بالله عليكم امشوا اعملوا انتخاباتكم وفوزوا واحتفلوا وغنوا وارقصوا بس براكم براكم وخلوا (حليمة) دي في حالها لانها ما فاضية الفيها مكفيها من أزمة غاز لي أزمة خبز لي أزمة ادوية لي أزمة غسيل كلى لي أزمة مواصلات لي أزمة بنزين لي أزمة لحوم الحمير ولي أزمة دقيق يعني كل يوم من ازمة لي ازمة ومبروووووووووك الفوز مقدماً في الانتخابات بس نرجوكم ما تفقعوا مرارتنا اكتر من كده .. !!
مع كل الود
صحيفة الجريدة [/JUSTIFY]
