قول ماشاء الله.. ديل جضوم ساااااااااكت

حكى الباش مهندس/ عثمان ميرغني في عموده المقروء.. حكايته مع تزوير الشهادات الجامعية.. وانو كل زول ممكن يحصل على شهادة جامعية.. بي قروشو.. يعني تلقى مزوراتي.. تديهو القريشات ويجيب ليك الشهادة.. “بس ما عرفت درجة الشهادة مقبول جيد جيد جدا ممتاز)؟.. ما علينا.. وقال إنو الشهادة رسمية.. ومختومة وموقعة وما تخرش المية.. يا هندسة.. هي جات على الشهادات؟.. من تقش عينك من النوم.. كل شي قدامك مزوّر.. من الأكل والشراب لحدي الغنا كلو تزوير في تزوير.. تمشي تشتري نعلات.. تلقاها مكتوب عليها إيطالية.. ويدوك ليها بسعر الإيطالي.. ويشكروها ليك شكر ما بتستحقو شكر نعلات إيطالية.. تلبسن.. بعد يومين تلقى النعال فتحت خشما.. مع فتحة خشمك من الخلعة.. حتى في الأكل.. بتيخ في الشتاء؟.. وأحمر وحلو.. من الله خلق البتيخ وخلقنا ناكلو بيمرق في الصيف. زوروهو وبقى يمرق في الشتاء.. المنقة والبرتكان.. البرتكان الاخدر بيضيفو ليهو مادة عشان يبقى اصفر يسر الناظرين.. ونحن ننقرف وناكل ومبسوطين.. أما تزوير الوشوش عند البشر.داك خليهو ساكت.. يزورو في وشوشم.. ضكور علي اناتي.. الضكور وحسب ما ورد في احد الصجف.. بيمشو سوق ليبيا. بي خمسة جنيهات فقطتن.. ويزورو علامة الصلاة في الجبهة.. كبيرة في الجبهة “وياناس بريدو.. اب غُرة فوق مسيدو” لما سالوهم يا أولاد بتسو كدي لي شنو؟ قالو عشان نشتغل.. ونلقى وظيفة.. تقول لي تزوير شهادات؟.. هن بيكلن عيش؟.. الشغل تزوير ايمان.. ويمشي أب غُرة.. ويقدم لي وظيفة ويشغلوهو.. بناءً على ما يحمله في جبهته من غُرة.. ويبقى مدير ويريح ماما وبابا في السرير.. أما أصحاب الشهادات يبلوها ويشربو مويتها محاية من العين.. ويشلهتو ماما وبابا في الشوارع.. أما الأناتي فحدث ولا حرج.. ممكن القى ليهم عذر.. كايسات للسماحة ومن حقهن.. وكايسات للعرس.. حتى الجضوم دي.. بقو يزوروها.. الواحدة تلقاها رقيقونة وعندها جضوم، غير الجضوم دي تاني يخربا.. تسالها يا بت مالك؟ ضرسك موجعك؟.. تعاين ليك شذرا وتقول ليك “قول ما شاء الله.. ديل جضوم ساااااااااكت” وتقعد تقرا في سورة الفلق في سرها.. أما تزوير اللون.. يبدوها من قلب لون الوشي.. ما جاب نتيجة يقلبو اللون كلو.. الواحدة تشوفا الليلة بي لون باكر تصبح تلقاها بلون تاني تكون بقت صفراء واتفلهمت كمان.. يا كافي البلا زمان يداعو الواحدة يقولو ليها “الله يقلب لونك”.. تزعل.. حسي تداعيها تتبسط وتقول ليك “أنا لاقية؟”.. يعني ممكن واحد يعرس واحدة على أساس أنها صفراء فاقع لونها.. بعد شهر تسهّك.. ويتقلب لونها بيجي.. “اللون البيج برضو ما بطال”.. ويسالها العريس دا شنو ؟ تقول ليهو “بري.. امدرمان دي واطاتا كعبة.. بتقلب الزول أزرق”.. يعني الداير يعرس.. قبال العرس يجيب العروس وتحلف مصحف “انو اللون والشحم دا والجضوم ديل وتوابعها.. أصل بلادو.. وكان كضابة إن شاء الله انسخّت واتقلب نسناس”!!