د/ عادل الصادق المكي

الريس الفنجري


مما بلغت سن الترشيح والترشح.. لم أقف عند صندوق انتخابات.. ولم أدل بصوتي في أي حاجة.. المرة الوحيدة الحمت فيها على خيمة انتخابات.. تاوقت جوا خيمة استفتاء على الرئيس نميري.. دايرنو واللا ما دايرنو؟.. صندوقين واحد مكتوب فيهو (نعم).. والتاني فيهو (لا).. لو داير نميري ترمي ورقتك في الصندوق المكتوب عليهو (نعم).. لو الله قدر لك وعمى بصيرتك وما دايرو ترمي وريقتك في (لا) وتبقى رقيق..

عاينت لقيت الصندوق المكتوب عليهو (لا) حارسنو ناس.. ويعاينوا للزول في عينو ويعاينوا ليهو من فوق لي تحت.. والصندوق المكتوب فيهو (نعم) جنبو ناس يعاينوا ليك بمودة وتشع الحنية من وجوههم.. الأناشيد شغالة جنب الخيمة بمكرفونات بصوت أبو داود ويقوّل في الشعب نضم ما قالو: “الشعب قسم.. يقولها نعم.. وليك يا القائد الملهم”.. يعني الشعب حااااالف يقول نعم.. طيب ما دام أصلو حالف.. ما في داعي للاستفتاء.. وخسارة قروش وخوتة وجوطة.. يبقى رئيس وخلاص..

طلعت النتيجة والناس القالوا نعم تسعة وتسعين وتسعة من عشرة.. واحتفالات وتنصيب وقصائد وغنا و(يا ريس سودانا بقى كويس).. وأناشيد (يا مايو حبيب زي أمي وابوي زي أختي واخوي.. ناس نفضت واتبرت من أهلها واتشبكت في مايو بقى زي أمها وزي أبوها وزي أخوانا.. وصبح السودان كلو يتهزهز مع نشيد (خليتنا نحس بالعزة تهز كل كيانا).. والما بي يتهوزز واسجمو ووا رمادو..!!!..

في قناة الشروق شاهدت جزءا من حوار مع مرشح رئاسي.. جايي من امريكا قال طوّل في أمريكا وجايي عشان يترشح ويبقى رئيس.. نان مالو؟ مو كعب.. من حقو.. علا من البداية دقس.. أول حاجة قال رمزو الانتخابي “الهلال”.. أها دا من قولة تيت يقنع من نص الناس “المريخاب”!!.. أنا كان محلو أصلو ما برضى بالهلال يكون رمز لي مش لأني مريخابي.. لأني عارف ناس المريخ بعد مرات في هلال رمضان قاعدين ينقنقو.. وشاهدت أحد المريخاب المتعصبين في عرسو حلف ما يربطوا ليهو الهلال في راسو.. أها نوع دا باقي لكم بيدي صوتو لي زول رمزو الهلال؟..

الراجل المترشح للرياسة دا باين عليهو راجل طيب وزول فنجري.. غايتو نضم كتير وشرح برنامجو الانتخابي ونضمو كلو قروش وداير يدي الناس قروش.. وداير يخلي السودان (أب) بالإنجليزي يعني فوق.. وقال قابل كل أعضاء الكونغرس الأمريكي قبال يجي ولامهم، قال لهم ما تقاطعوا السودان والنضم دا عيب واعوج منكم.. ودي الكروت حقتهم دخل إيدو في جيبو ومرق ليهو كرت وااااحد.. فرد كرت، ورفعو لينا في وشينا.. وبعدين قال لنا الشنطة مليااانة كروت يقصد كروت أعضاء الكونغرس.. وقال التعليم في الواطا دي.. والطلبة ما مرتاحين لا طلبة لا معلمين وقال داير يديهم قروش برضو “ما قلت لكم الزول فنجري؟”.. ومن فنجرتو قال أول ما يبقى رئيس أي زول حيديهو تلاتة آلاف دولار في إيدو كااااااااش يبدأ بيها حياتو..

باقي لكم الزول دا، إن باصرناهو مافي طريقة يدينا ليها من حسي وبعدين يخصمها؟!