البي يجي من الله كلو سمح

كان يوم أول أمس يوما طويلا.. حيث ذكرت هيئة الارصاد السعودية انو ح يكون أطول يوم وأحر يوم خلال هذا العام.. ح يكون طولو طلطاشر ساعة ودرجة حرارتو تلامس الخمسين “ما عارف تلامس دي كيفن”.. تكون هي خمسين بس ما دايرين يخوفوا الناس.. دا كان كلام ناس الارصاد السعودي لكن برضو نحن بيأثر علينا.. الله يعين السنة دي شمش حارة ويوم طويل وموية مافي.. يعني صيام فاخر خمسة نجوم.. الله يعظم الأجر..

كعادتي.. وبعد الإفطار.. مصاقرة قنواتنا التي ابتلاني الله بها.. ودا يدل على حب الله لي,,, إذا أحب عبده ابتلاه.. عجبتني جدا عودة سعد الدين للنيل الأزرق.. لكن للأسف عاد من الباب الغلط.. سعد الدين ما شبه البرامج اللات الحوامة والدواحة دي.. صراحة يا سعد أخير لك تقعد في أستديوهاتك وترجع لبرامجك العرفناك بيها وطريقة إدارتك الرائعة ليها.. كما عجبني عزومة المذيعات لي بعضن.. تعالي لينا في قناتنا ونحن نجيكم في قناتكم ونقعد مع بعضنا ونتونس في الخربانة دي.. عادت نسرين سوركتي للنيل اللزرق ضيفة على نجود.. علا والله اللكل القامن عليهو قدر ما اجتهدت ما قدرت أعرفو شنو.. لكن باقي لي أكلاً زين سمح..!!!!.. سلمى سيد كانت ضيفة في قناة الخرتوم لكن كبيبية موية ما قدموها ليها.. معقول مقشطين للدرجة دي؟.. برنامج مع سلمى من أنجح البرامج الى الآن.. وسلمى نادرا ما تقدم ما ليس ناجحا.. ود ساب والمبدع عوض شكسبير تطويع لأدوات الاتصالات الحديثة لخدمة الفن.. والكوميديا تحديدا.. برافو يا شكس..!!!!.. لاحظت أن بعض الأشخاص شغالين (جواكر) في برامج رمضان تفتح أي قناة تلقاهو مغزوز!!!!؟؟؟؟.. غياب فرفور عن أغاني وأغاني ترك مقعده شاغرا.. ويحسسنا إنو البرنامج ناقص حاجة ويخلينا نقعد نكوس.. المطربة هدى المغربي صوتها وحضورها فرضن نفسن فكانت الإضافة إلى برنامج أغاني وأغاني إضافتين مع مكارم بشير.. غنت هدى “بشكو ليك يا ربي.. من حبيبي الاترسم في قلبي” كان أداؤها رائعا.. علا الشكية لي الله الزول ما بيقولها إلا لما يتغبن ويضايق تب.. يرفع إيديهو فوق راسو ويرفع السبابة من كل يد و”شيكتك لي الله”.. إن صادفت ساعة استجابة، المشكي وا سجمو ووا رمادو.. إحدى المطربات المشاركات في البرنامج في أثناء غنية الشكية لي الله دي دنقرت وقعدت تبكي.. غايتو إن بقى البكاها زول بتحبو وشاكياهو لي الله.. دا يصبح لا إيد لا كراع.. شكية بي بكاها!!!.. والله يا جماعة أنا من بدا رمضان أشحد في الله مافي زول يبكي في قناة ونشوفو.. نحن على الهبشة ومغبونين وإن لحقنا اتقدينا بكا ما بنسكت بي هينة نبكي لمن رمضان ينتهي.. دحين يا إخوانا اصبروا واحتسبوا أي نصيبة.. وبعدين نحن قاعدين نصبّر بيكم.. إنتو تبكو؟. نحن نسوي شنو؟ نتفن في الواطا ونشيل ونتكشح بالتراب؟!!.. الرابع من رمضان.. سهرة في التلفزيون القومي رائعة وزادتها سميرة دنيا ألقاً..