د/ عادل الصادق المكي

شركة تأجير المشاهير


الشاب الياباني.. وياباكم.. (تاكانوبو نيشيموتو).. دا اسمو.. شفتو الاسم دا مجيه كيفن؟.. وموسيقي؟
يظهر الجماعة ديل في السماية بيلصقوا أي حروف مع بعض كيفما اتفق ويسمو بيها المولود.. ونحن نسمع اسم زي دا ونقعد نضحك.. خلو بالكم هم برضو قاعدين يضحكوا في أسامينا.. اسم زي الزين.. يموتوا من الضحك فيهو.. ويعلقوا “والله غايتو جنس اسم؟. وجنس بخل.. حسي لو سموهو زيناموتو.. مالو؟.. “أو واحد يعرف واحدة يكون اسمها “مي”.. ويردد اسمها مي.. مي.. ويموت من الضحك.. “دا شنو دا؟.. اسم فار عديل”.. عشان الاسم صغيروني.. ويقعد يسالها “مي.. ؟ بس؟.. ماعندو اي زيادة؟”.. ويتبرع ويخت زيادة هو من راسو ويقول ليها يكون “ميتاكاشي”.. اسمك يكون ميتاكاشي عشان تقدري تحومي في اليابان دي وتقضي مصالحك.. لكن “مي” كدي براها ما بتقضى لك اي غرض..!! تاكانوبو دا عمل شركة جديدة.. شركة لتأجير الأصدقاء.. يعني تكون زول ما عندك صاحب.. يكوس ليهو صاحب.. ويأجرو ليهو.. الساعة بعشرة دولارات.. والأصحاب البيأجرهم دائما من علية القوم.. فيهم أساتذة جامعات.. صاحب يتونس معاك.. ويباريك..
الفكرة عجبتني جدا.. وفكرت أعمل شركة تأجير مشاهير السودان.. فيهم مشاهير قاعدين سااااااااكت.. لا شغل لا مشغلة.. بدل يقعدوا ساكت أأجرهم ونتقاسم الإيجار.. والشغالين فيهم زيادة الخير خيرين.. وبخت من نفّع واستنفّع.. وأكيد في ناس كتاااااار بيتمنوا يقعدوا ويتونسوا مع المشاهير ديل.. نأجر المشهور الساعة بمئة جنيه “خالية من الضرائب”..
والمشاهير أخير لهم شركتي دي.. بدل يمشوا القنوات الفضائية ويونسوا الناس ساعة وساعتين .. وبعدين ناس القناة ياكلوهم وما يدوهم قروشهم.. واللا يقعدوا يلاووا فيهم سنة للحول في مئة وخمسين جنيها..
اسم العمل: شركة تأجير المشاهير
(شركة سودانية قابضة).. قبض جد
رأس المال المبدئي: (حنـك)
نوع العمل: ونسة.. و.. قرقراب..
أهداف الشركة: أي زول داير يتونس مع مشهور من مشاهير بلادي.. الساعة بي مئة جنيه بالجديد.. نكوس ليك المشهور.. ونحدسو ونحنسو يتونس معاك.. الوقت الداير تتونس معاهو فيهو..
فنانين.. وفنانات.. مذيعين.. ومذيعات.. ممثلين وممثلات.. لاعبين كورة.. سياسيين.. صحفيين وصحفيات.. نجوم مجتمع!
الأولو شرط.. آخرو نور:
الشركة غير مسؤولة عن ونسة مع أي زول تمتام. أو يكون بيقول “أأأ.. أأأأأ.. أأأأأ”.. قد يكون سببا في ضياع الوقت المؤجر..
على المؤجر.. تنقيط الحروف بطريقتو لو كان بيتونس مع مشهور ألجن.. وأيضا مسح النقط لو كان بيتونس مع مشهور ألسن.. “النوع البيمد لسانو في أي حرف يلاقيهو” يعني ممكن يقول ليك كنت مثافر.. وهو يقصد كنت مسافر.
الشركة غير مسئولة عن أي كضب يحصل أثناء الونسة..!!!!
عزيزي المشهور وداعا لونسة القنوات الفضائية البي ساكت..
عزيزي المواطن حقق حلم حياتك بأن تتونس مع مشهور تتمنى أن تتونس معاهو..!!!!
والله الموفق