قروب التماسيح..!؟!
* انتشرت ظاهرة قروبات الواتساب.. هي رسائل سريعة الغرض منها التواصل.. وذلك فكرة (مجموعة) التماسيح في عمل (قروب) ذو شفرة خاصة.. لا يمكن الوصول إليه إلا هم.. وذلك لتبادل المعلومات والمنفعة.. وفي كوكب (عجبستان) تم إجراء اللازم بواسطة الخبير الوطني.. التقني.. المهندس (أبو المعاعيط) والذي اشتهر (بمعطه) لحقوق الكثيرين من المتعاملين معه.. مسؤولين كانوا أم مواطنين..؟!
* ضم (القروب) الكثير.. من أهل السياسة وتجارها.. والفتاوى وأنصارها.. وكبار التجار.. من كبار المسؤولين في (عجبستان).. ومن الذين نبتوا كحشيش ما بعد المطر.. وصاروا مليونيرات زمانهم.. وبدأت الاتصالات.. ودائماً كانت تتم في هدوء وسكون الليل..؟!!.. تعالوا نسمع ونقرأ..!؟!
* يا مدير شركة (م).. الزيبق وصل.. وناس التعدين محتاجين.. الكيلو (4) ألف.. وصلت خمسين أسطوانة.. كل واحدة عبوتها 34.5 كيلو.. أكتب الشيك وأديهو (للمنفاخ).. وإذا ما صرفوا (كاش) ما بديك ولا جرام.. السوق داير..؟!!
* شيك شنو يا عمك..؟.. عرفت إنو بضاعتك محجوزة.. لأنو (الولد الأسد) دخل في الصورة.. وجاب بضاعة في كونتينرات مليانة أسطوانات وداير يحتكر السوق.. وهي قاعدة في محطة (سوبستان).. يعني أعمل حسابك من (الزحلقة).. الولد ده مسنود.. وأصبح مليونيراً فجأة.. بجانب الوظيفة الحكومية..!!
* طيب (كبير المحطات) عمل شنو..؟!
* ما يقدر يعمل أي حاجة.. وإلا طار من الموقع.. الولد إيدو لاحقة.. رغم أنهم أقارب..؟
* لا حول الله.. يعني نبطل شغل وتجارة.. وكل زول جايب قريبو ودايرين يلهطوا..؟!
* ملحوظة:
* هذه المادة محرمة دولياً.. إلا بتصاريح خاصة.. وهي تدخل مع اليورانيوم في الصناعات النووية.. أهالي (عجبستان) مساكين.. رغم أن كبارهم يعلمون ذلك..!؟!
*****
* لقطة أخرى: يا ميدو.. كلم ميمي بسرعة.. المبنى داك اكتمل ولا لسه..؟!
* يا أخوى إنت قاعد في إمارة (….) ومرطب.. وسايبنا للشغل الكعب والسخانة.. بتسأل مالك..؟!
* لأ.. بس عشان أشحن باقي التجهيزات للمبنى..!؟!
* تجهيزات شنو يا سيد.. وقف أي حاجة.. القروش العندك على القروش البنرسلا ليك من هنا.. تسافر بيها للصين.. السوق هنا محتاج أدوات كهربائية (مضروبة).. وملابس.. وأدوات سباكة.. والعيد قرب.. المبنى الكبير (طاير).. خلينا نطلع لينا بي مليار.. مليارين.. ينفعونا.. (حليل أيام قرش.. قرشين)..؟!!
*****
* لقطة أخرى: يا عبده (عجبستان) دي.. بقت وسخانة شديد.. ما تشوفوا لينا طريقة للنظافة.. وشيل القمامة.. والخريف جايي.. والناس أكلت لحمنا..؟!
* ها ها ها.. ما يأكلوا لحمكم.. ما سمان وغلاد.. أسمع في بطاحات كبيرة في شركة (….) في جدة.. سبق أن تعاملنا معها في (20) حبة.. ممكن نجيب منهم تاني.. بس تطلعوا لينا حقنا..!؟!
* ما في مشكلة.. بس ما تتعطل لينا زي الفاتو..؟!
* يا خي ما تتعطل.. إنتو دافعين حاجة من جيبكم.. ما تخلونا (ساكتييييين) يا سعادتك.
*******
* لقطة أخرى: (ومهمة)..؟!
* أها يا سمعة.. قلت لي العمارتين وين؟!
* أيوة.. شايف شارع السواحلي شرق (عجبستان).. تدخل يمين وتخلي أكاديمية (عجبنا) على شمالك.. ظاهرات جنب بعض.. صاحبك بتاع العصير أبو مصاصة اشتراهم بي (18) مليون الاتنين..؟!
* اشتراهم من منو..؟..
* اشتراهم من الاشتراهم.. إنت مالك.. داير تجيب لينا الهواء..؟..
* خلاص طيب أنا عندي زبون جاهز موية ونور وداير يشتري؟!
* بشرط تطلعوا لينا حقنا كاش.. وكمان حق مزرعة السليت.. وما يعمل لينا (حركات) زي بتاعة السمسار.. (داك)..؟!
* أعوذ بالله.. الناس دي بتلقى القروش الكتيرة دي وين..؟!
* تماسيح.. مسؤولة.. خليك ساكت يا عمك..!؟!!
* نواصل بعد فاصل رمضان.. والفاصل المداري..!؟!!
