د/ عادل الصادق المكي

عالـم عجيـب


*حكمت محكمة قبلية باكستانية بالرجم على سيدة باكستانية “أم لطفلين” عشان عندها “موبايل”.. المصيبة يكون 3310.. تكون ماتت فطيس ساكت.. القبيلة دي الرجمت المرا عشان الموبايل.. قالوا في عرفهم الموبايل قلة أدب شديدة.. غايتو الله لا سهل لهم يجوا الخرتوم.. ما بتفضل انتاية حايمة.. وفي واحدات عندهن اتنين وتلاتة.. تفتح الشنطة جنبك.. يجن ناطات ويكوركن كمان، زي الجريوات..!!!!!!.. وقالوا نسوان القبيلة دي.. بيتفرجن في التلفزيون حق باكستان بس.. وإن جا راجل يقرأ النشرة ساكت في التلفزيون.. كلهن يضايرن ويتغتغتن.. والمتشددات قاعدات يقبّلن على الحيطة ويدن التلفزيون قفاهن.. لمن الراجل ينتهي من نشرتو ويفوت.. ذكر لي أحد الأصدقاء السعوديين أن التلفزيون لما دخل السعودية كانت بعض النسوان السعوديات يستعملن نفس التكنيك الباكستاني!!!!!!.. وقد كانت نساؤنا.. في زمن الحقيبة، يكونن قاعدات في الحفلة.. لكن مقبلات على الحيطة ما بي عاينن للحفلة.. وحكمة ربنا كل مرة يزغرتن.. فوق كم؟ وفوق شنو؟ ما بعرفو!.. أحيانا ممكن يجي راجل ويقيف قريب منهن في ضهرن ويرفع عكازو ويقول لهن “يا نسوان أبشرن” ويقومن هن يزغرتن.. والأغرب تلقى الفنان مبسوووووووط.. ويغني “الله لي أنا من ديلا.. والسادة لي أنا من ديلا”.. وناس ديلا البيغني ليهن مقبلات على الحيطة!!!!.. برضو في بعض القبائل في جنوب السعودية.. المرا ما بتوري وشيها لي راجلها.. إن جنّ.. راجلها القاري فاتحتو عليها.. من يعرسها ويكشح فوقها الفاتحة لمن يموت ما بيكون شاف وشي النصيبة الحايمة قدامو دي.. ممكن يشوف أي حاجة تانية في جسمها ويتصور معاها لو داير، إلا الوشي يحرم عليهو.. (الله يقدرني خشمي)!!!!
*محلات في اليابان تبيع الفواكه بأسعار خرافية.. باعوا عنقود عنب في مزاد علني بي تمانين ألف يورو.. وحبة منقة بي سبعة آلاف دولار.. وبتيخة باتنين ألف دولار.. خمس حبات منقة تجيب ليك كورلا آخر موديل برااااااحة.. النجيض يشيل ليهو كرتونة منقة ويمشي اليابان.. يجيب كورلا.. وحق جماركها.. بدل كل يوم فاتح خشمو وحاقص جنب التلفزيون ومستني جوائز شركات الاتصالات..!!!
*وأخيرا.. بالرغم من تناولها حبوب منع الحمل أنجبت قردة شمبانزي في إنجلترا تيمان.. وقالوا كانت بتبلع الحبوب.. علا جاتها نزلة وأدوها مضاد حيوي.. قوم يا المضاد الحيوي وقف شغل حبوب منع الحمل.. وقومي يا الشمبانزية احملي.. وجيبي تيمان كمان، بدل واحد.. كية ليهم.. أصلو الربنا قاسم ليهو يمرق على السهلة ويعيش مافي شي بي يحوشو.. قالوا ناس مركز رعاية القرود في بريطانيا كانوا بيدوها حبوب منع الحمل يدوها هي، ومعاها أناتي كتاااااار.. خايفين من الانفجار السكاني القرودي في المركز.. أها اليضوقو.. تراهن بقن يجيبن اتنين اتنين..!!!!