بالغتو يا ناس الجمارك

المواطن السوداني (محمد الصديق) المقيم بمدينة لندن بعث لي برسالة ساخطة ومستغرشة وسوف تسخطون وتستغرشون تماماً عندما تلموا بالتفاصيل التي تقول :
قام المواطن المذكور بإرسال طرد بريدي صغير عبر شركة (DHL) المعروفة ببوليصة رقم 606826060 وذلك في يوم 15 /7/2015 ، محتويات الطرد يا سادتي الأفاضل كالآتي :
عدد 2 فتيل دواء شراب أطفال ، عدد 1 صندوق شاي زنة 180 جرام مع (ورقة) تحتوي على (إقرار) وورقة أخرى تحتوي على (توكيل) ..

وصل الطرد إلى مخازن ((DHL بالخرطوم م وقامت الشركة بإخطار المستلم (شقيق زوجة المواطن) ولكن عند ذهابه للإستلام في الساعة العاشرة يوم الثلاثاء 4/8/2015م أخبرته الشركة بأن الطرد (حجزوهو ناس الجمارك) فتوجه في الحال للجمارك حيث أخبروه بأن الضابط المسؤول (مشى ليهو فاتحة) وعليه الإنتظار حتى يعود, إنتظر صاحبنا حتى الساعة الثانية ولم يحضر الضابط من الفاتحة (يكون خرم على البيت) فقالوا ليهو (الضابط بعد ده ما بجي تعال بكرة) !
جاء صاحبنا تاني يوم للجمارك قالوا ليهو الضابط في الفطور ، وعندما عاد الضابط شرح له الموضوع وأعطاه (البوليصة) قال له الضابط :
– شوف قيمة الظرف ده 50 جنيه إسترليني فيهو شاي حب وفتيلين دواء شراب فلازم (نجمركو) وتشوف ليك مخلص
– (في إستغراش) : يا جماعة جمارك شنو ومخلص شنو .. وخمسين جنيه إسترليني بتاعت شنو؟
ده شاي (حب) ودايل فتيلين دواء أطفال وديل ورقتين واحدة توكيل والتانية إقرار لإستخراج جواز لي طفل ماشي القاهرة يتعالج !
– يا شيخنا ده (قانون) ولازم تدفع جمارك على الحاجات دي ما يعادل 50 جنيه إسترليني زي ما مكتوب على الظرف !
– يا جماعة المكتوب على الظرف ده دي قيمة الرسوم الإندفعت في السفرة للتوكيل والإقرار دخلها هسه شنو في الموضوع !
– شوف أنحنا ح نشيل 50 ألف جمارك لصندوق الشاي ، و 280 ألف للورقتين (التوكيل والإقرار) و 50 ألأف لي فتيلين الدواء و 20 ألف رسوم أرضية .. والمخلص بيشيل ليهو 220 ألف جنيه يعني الموضوع كدة 620 جنيه !
– (أعصابو باظت وجاب ليهو كوز فاضي) : مش الشاي ده أهو كبيتو ليكم في الكوز .. ما عايزو .. ومش فتيلين الدواء ديل برضو ما عاوزهم … بس أدوني الورقتين ديل !
– يا شيخنا مافي كلام زي ده .. يا تدفع وتشيلهم كوووولهم يا تخليهم كوووولهم !
لم يكن أمام صاحبنا إلا الإنصياع (للحكومة) ، وكسباً للوقت قام بدفع المبلغ الذي حددته (الحكومة) حتى يستلم الورقتين (التوكيل+الإقرار) ليتمكن الطفل المريض من السفر ..
نقول للمواطن السوداني (محمد الصديق) ياااخ جات سلامة فقد كان من الممكن أن تتم (جمركة) الإقرار والتوكيل عن طريق عدد الأحرف أو الكلمات أو نوعية الطباعة (ليزر ، عادي، خط يد) أو نوعية الورق (مصقول شفاف عادي) أو وزنه (80 جرام ، 90 جرام، 100 جرام) وكمان أسود وللا ملون !
بالطبع هذا مبلغ خرافي لطرد صغير قد لا يصل وزنه (نص كيلو) ولا يحتوي علي أغراض ثمينة وهذا المبلغ بالفعل يدعو للإستغراش ولكن ما يدعو للإستغراش الشديد هو إنو الورقة بتاعت الإقرار والورقة بتاعت التوكيل عليهم جمارك؟ شئ فعلا يدعو للإستغراب والتأمل ؟
دعونا نتساءل وريالة الأطفال في (أفواهنا) ما هي الأسباب المنطقية التي تجعل السلطات تاخد جمارك 120 ألف على ورقة مطبوعة واااحدة ؟ … غايتو يا ناس الجمارك بتباااالغو !!

كسرة :
سؤال غبي : الحكومة بتشيل (جمارك) على الدواء عشان ترجعا للمواطن في شنوووو يعني أحسن من صحتو ؟؟

• كسرة ثابتة (قديمة) :
• – أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و)+و

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و)+و