جدو مجكّس.. في حبيبي مفلس

من الأمراض السخيفة.. بالرغم من إنو أي مرض سخيف.. والعافية دي زيها مافي.. لكن ما بتتلقي طوالي.. من أسخف الأمراض مرض السكري.. تتعطل خلايا بيتا في البنكرياس وتحرن وتحلف ما تشتغل.. ويتجهجه السكر اللافي في الدم.. ويطش.. وما يعرف يسوي شنو.. في النهاية يقعد يسوط.. في الجسم.. والدكاترة يمنعوا سيد السكري من الشي الحلو.. أي حاجة حلوة ما يقرب لها.. ويعيش باقي عمرو زول مسيخ.. وحكمة ربنا زول السكري أول ما يشوف حاجة حلوة حيلو يبرد ونفسو تدخل فيها.. وفيهم ناس بعد مرات ياكلو بالدس..!!!!!.. سكريهو يرتفع تسألو يقول لك أبدا.. بس نص كيلو حق باسطة نفسي دخلت فيهو وخفت الباسطة ما تنفع الناس كان ما أكلت منها!!.. ويا زول غايتو الله يغفر لي، أكلت منها..!!!!!
ورحمة بالإنسانية وخصوصا ناس السكري.. كانت في بدايل للأنسلوين.. دا ياهو القاعد يجيّه السكري في الجسم.. ويطعن حقن.. إلا بس الطعين اليومي دا ياهو الحار لكن الزول إن اتعود يبقى لو زي شراب الشاي.. ومن اكتشافات السنة الفاتت المهمة هي (اكتشف العلماء طرقا تجعل الجسم ينتج خلايا الأنسولين اللازمة للجسم بدلا عن الخلايا التالفة لدى مرض السكري من النوع الأول).. يعني الجسم منو وفيهو ينتج أنسولينو.. وناس السكري البريدو الباسطة ينبسطو.. وياكلوها علي عينك يا تاجر ومافي زول يلومهم واللا يقول لهم تلت تلاتة الباسطة بكم..
من الأشياء البتخوف البني آدم برضو الكبر والشيخوخة.. لأنو بحس إنو مهمتو في الحياة انتهت.. وبقى زيادة عدد ساكت.. ومركون في ركين.. ما في زول بيتذكرو إلا لما يقح واللا يتنحنح.. والدنيا كدا لازم تستمر كدا.. يكبروا ويموتوا ناس عشان يدوا فرصة للبعدهم.. البعدهم يبقوا شباب وينططوا ويا دنيا مافيك إلا أنا.. بعد كم سنة الكريعات ما يشيلنهم. وأجهزة الجسم تكبر وتفتر.. ويتركنوا كما ركن الذين من قبلهم.. أها الإنسان بقى وقتو كلو كايس لي شي تخليهو شباب طوااااالي.. عشان يبرطع..
برضو من أهم اكتشافات السنة الفاتت 2014.. إنزيم معين.. إسمو (جي دي إف 11) لقو إنو الإنزيم دا بجدد الشباب.. شالوهو من فيران شابة وادوهو فيران عجوزة لقوا إنو الفيران العجوزة دي إتمغت واتحنفشت وبقت تكاتل في الشابة واتملت قوة وشباب.. قال العلماء إنو الإنزيم دا بجدد خلايا المخ والعضلات وبساعد في علاج الزهايمر وإنهم ح يحاولوا يطوروا أبحاثهم دي عشان يطيروا الشيخوخة لي ديمة.. وفي سنتين ممكن يبقى منتج تجاري.. وتاني ما أظن نشوف لنا زول عجوز حايم.. وعادي تشوف الولد وجدو مجكسين ومتبطحين في حدائق حبيبي مفلس ويزعطوا في النجيلة.. وممكن الجد يشوكش ود ولدو ويخليهو يبكي وينوح ويصيّح ويغني “كلو من جدو.. جدو الله يهدو”!!!!!