جن الحيشان التلاتة
(الحيشان الثلاثة الإذاعة والتلفزيون والمسرح زائدا تلفزيون ولاية الخرطوم لا حديث لهم إلا عن مملكة الجن التي تقع فيها مؤسساتهم خاصة بعد ظهور جان في برنامج إخباري بالتلفزيون القومي وحادثة إطفاء أنوار الاستديو أثناء تسجيل حلقة في تلفزيون الولاية..
الخبر غير المتداول هو إعلان مذيعتين بالخرطوم والقومي عن نيتهما لإجازة مفتوحة حتى ينجلي أمر الجن ومملكته)
هذا ما ورد في إحدى الصحف الخرتومية.. زي ما شايفنو.. جان جا التلفزيون.. في برنامج إخباري.. أعتقد ـ والله أعلم ـ دي وقفة احتجاجية.. ويا جماعة الخير الجان دا إن بقيتوا ماكلين حقو أدوهو ليهو.. حسي بيقيف وقفة احتجاجية علا بعد كدي ما مضمون يسوي شنو؟.. الشي ناس التلفزيون ديل ياكلوا في خلق الله لا خلوا إنس ولا خلو جن؟.. هيع..!!! غايتو أنا من شفت ولاحظت لقناة الخرتوم دي.. الزول ينضم الشلاليف في جيهة والنضم في جيهة.. شكيّت إنو القناة دي مسكونة..!!!.. ونبهتهم كم مرة يا جماعة ألحقو شلاليف ناسكم حلجت.. مافي زول هببو لي.. أها خموا وصورو.. أها تراهو قام يطفي في الأنوار.. بعد شوية حيطفي النور ويدي أقرب زول كف..!!!!.. دا لو كان مهذب وما أداهو شلوت.
فهمي ليكم تشوفوا بلة الغائب.. سمع أضاني في قناة الشروق قال بيعرف ملوك الجن السبعة.. وقال علاقتو بيهم سمن علي عسل وشكرهم قال طيبين.. جيبوهو يتفاهم معاهو واللا يكلم ليهو الملك حقو.. ويدق ليهو خروج نهائي.
أيها السادة.. كل ما ورد في الخبر قبال ما نجري علي الجن ونبهتهم.. وقبال ما مذيعاتكم يلفحن تيبانن.. ويحلفن تاني ما يعتبن خشم باب الحيشان التلاتة. إلا بعد إجلاء الجان وتدمير مملكته.. واخذ الأسرى والغنائم منو.. أيها السادة حقو تكونوا علميين وعمليين.. نفتش أول حاجة للحاجات الفنية.. يعني النور دا الطفاهو شنو؟.. أو ممكن يكون هناك خلل في الكهرباء وطريقة توصيلها.. وعندكم مهندسين ما شاء الله ممكن يحلوا الفزورة دي.. وبرضو يشوفوا حكاية الظل أو الصورة الظهرت في البرنامج الإخباري “شخصيا لم أحظ ولم يكن لي الشرف أشوف الجن علي الهواء مباشرة في يوم البرنامج الإخباري”..
إن غلبو حيلة تب.. بعد داك يمشو علي الجن.. ويتهموهو رسمي.. وإن فعلا طلع جن يبقى جن مطرطش ساكت وغبيان وضهبان.. داير شنو من تلفزيون السودان.. وعينو في الإم بي سي..؟.
في إحدى القرى.. كانت تخاف من الجن.. يوم بالليل دخلت أوضتا الشباكها فاتح في الشارع.. الشباك كان فاتح.. عاينت علي الشباك.. وضربت السكلي.. الناس جوها جارين.. قالت لهم: “الله يسعلني الجن واقف في الشباك ويأشر لي.. ويقول لي تعالي.. تعالي..” مشو برا جنب الشباك لقوهو دحيش كان مسيكين لابد جنب الحيطة وهي شافت راسو وهو يحرك في إضنيهو وافتكرت الاضنين إيدين بيأشرن ليها.. جو كلموها لكن لأنها مقتنعة إنو جن قالت لهم لا لا بس يكون اتقلب حمار اول ما شافكم!!!!
