د/ عادل الصادق المكي

غايتو جنس هوايل


يختلف رد فعل الزوجة باختلاف.. وضعها النفسي.. المادي.. العاطفي.. عندما ينزلق راجلها في نص الحوش ويقع على قفاهو.. أربع حالات مثالا لا حصرا
(1)
الإحباط:
جا من برا.. اتزلق وقع.. هي جوا سمعت الـــ(رررررب) جرت.. وقفت في خشم باب البرندة وعاينت ليهو وقالت ليهو “سجمي!!!!.. دا إنت.. خلعتني قايلاهو واحد من الولاد وقع”. ثم دخلت.. ثم طرم ثم زعل ثم حلف ثم خاصمها ما بينضم معاها ليهو حسي تلاتة شهور..!!!!!
(2)
الاندهاش:
جا من برا.. اتزلق وقع.. هي جوا سمعت الـــ(رررررب).. جرت.. وقفت في خشم باب البرندة وعاينت ليهو ورفعت حواجبيها وقالت ليهو “واي.. عان دا وقع؟” ثم أردفت بعد أن غزت كوعها “غايتو قصة!!” ثم وقفت تعاين ثم وهو يحاول يقوم يدو اليمين في نص ضهرو ويدو الشمال يحاول يترفع بها ويعاين لها وقال لها “تقع لهاتك.. و.. يقص رقبتك”!! ثم لم يخاصمها.. لأنو عارف دي قدر قدرتها..!
(3)
الإحراج:
جا من برا.. اتزلق وقع.. هي جوا سمعت الـــ(رررررب) جرت.. وقفت في خشم باب البرندة وقالت ليهو “وقعت؟ أصلي عارفااااك بتقع.. نان إنت مشيك دا قدر ما قلت لك غيرو ما غيرتو.. ماشي خفج خفج خفج ومشلق تعاين فووووق..”
ثم دخل ثم دخلت وراهو ووقفت فوق راسو ومدت إيدها “كدي املص الجلابية دي نغسلها قبال ما الضيوف ديل يجو يشوفوها كدي” ثم يملص الجلابية ثم يطنطن بعد مشت من جنبو.. “أنا وقعت لي الليلة. من يومي العرستك واقع”!!!
(4)
الهيلمانة:
جا من برا.. اتزلق وقع.. هي جوا سمعت الـــ(رررررب) جرت.. وقفت في خشم باب البرندة وقالت ليهو وهي مخلوعة جد جد “لا حولاااااا.. وقعت؟ إنا لله.. جيب إيدك.. قوم.. قوم.. نعل مافيك شي اتكسر.. في حاجة موجعاك؟”.. ثم رفعتو.. ثم قادتو.. ودخلتو جوا ثم جابت ليهو عصير ثم جابت ليهو توب يتغطي بيهو وقالت ليهو “ارقد” ثم اتصلت بأهلو وأهلها ومعارفو ومعارفها.. وكلمتهم بالوقعة.. ثم العصر الحوش اتملا ناس.. ثم جات أختها بي شفعها تواسيها وتقيف معاها.. بي هدومهم!!! ثم تكونت لجنة برئاستها.. وكل ما يجي وفد يوروهو المحل الاتزلق فيهو في الحوش.. وبعدها تعقد ورشة عمل لمناقشة الأسباب.. واستعانو بأحد المهندسين من أقاربها.. ووراهم الخلل وين.
ثم كمل شوال السكر.. والشاي.. ثم منها بقى يمشي لو ما اتأكد كراعو ثبتت.. ما بيحرك التانية!!! ثم اتلحتو.. كل ما ينزل من العنقريب لو ماشي يبصق سفة ساكت.. تقول ليهو “برااااااحة ما تزلق تقع تاني.. تقوم المرة دي تتكسر فيك مخروقة..”! ثم كانت.. تلوم أي زول ما جا شاف الوقعة.. وأي مرا ما جات حلفت في بكا أبوها ما تقيف!!!! علما بأن الراجل ما جاتو أي حاجة زي الحصان!