مقاطع

(1)
وينك.. فقدتك.. مسجل غياب؟؟!!!
وسايب قلوبنا وراك للعذاب..
نسوق ذكرياتنا ونبارى الرهاب
نفتش طريقك برغم الضباب
ونسأل عليك البعاد والقراب
متين يا حبيبنا.. متين الإياب؟؟؟
(2)
يا زول خرافي ومختلف
ما قادر أكتب فيك حرف
انا ياخىي كاتلني الولف
وانا جد بحبك ومعترف
وداير اقول للما عرف
قصة هوانا من الألف
(3)
الريد جوه قلبي معجون بالأسى..
والزول البريدو من تبيت.. قِسا..
اتجاهل هوانا وللأحلام نسى..
نام صبح التمني في حضن المسا
(4)
انا ذاتي ما جاياك..
جابني الدرب بالريد.. جدد عليْ ذكراك
شفتك صباح اليوم.. في حوش أخوي بهناك
نفس المكان الكان.. انا فيهو بستناك
في الحيطه ديك حرفين.. ناحتنهم يوم داك
والصوره حتى الآن.. في خاطر الإدراك
مع إني قلت أكيد.. يومين وحا أنساك
لكن لقيت الشوق.. جواي بيتحداك
وتلقاني رغم البين.. يوماتي بتمناك
ساسقت بين حوشين.. كان مرة بس ألقاك
واتجاهل الإحساس.. واعملني ما شايفاك
وكان قلت جابك إيه ؟؟!.. أنا ذاتي ما جاياك
(5)
الدنيا دار ما بتستحق..
بيبانا فاتحا غرب شرق..
كل زول دخل فيها ومرق..
جاري ويكابس في الخلق..
وجبينو يتصبب عرق..
وما خلى ذكرى سوى ورق.
تلويح:
الشعر يكتبنا بماء الياسمين..
ويعمدنا بالوجد والحنين.