أنا كنت قايلاك صاحبتي
أهديتك الحب والحنان.. خالص وفاي ومودتي..
وفتحت ليك قلبي الحزين.. وسردت ليك سر وجعتي..
شافوك معاي في كل مكاني.. لازمتي دربي وسكتي..
سألوني يا ما كتير عليك.. وأنا قلت إنك (فردتي)..
أنا كنت برتاح لي مجيك.. بنداح معاك بي فطرتي..
نضحك من الأعماق كتييير.. وجرت أمامك دمعتي..
أنا كنت مؤمنة بيك شديييد.. ونبيلة كانت فكرتي..
بسمع كلامك وبصطفيك.. في كل تفاصيل دنيتي..
شاركتك الزاد والوداد.. وقسمت ليك من لقمتي..
كم (توب) لبستي وما رجع؟.. وكم يوم مرقتي (بجزمتي) ؟!
حاجات كتيرة بتعجبك.. وقروشها كان من (شنطتي)..
وأنا كنت شايلاك للظروف.. خاتاك سلاح لي محنتي..
وبقول عليك ست البنات.. صادقة وأصيلة ودرتي..
تاريك أكلتي لحمنا زيييين.. وحكيتي للناس قصتي..
شهّرتي بي للناس عموم.. ونسيتي فضلي وعشرتي..
مخدوعة فيك تاريني ياخ.. خذلتني عفواً حكمتي..
يا حاسدة بان حسدك تماااام.. وصحيت خلاص من غفوتي..
نفسك مريضة على العموم.. وأنا نيتي كانت زاملتي..
أنقذني ربي من الخداع.. ونصيبي كان زي نيتي..
مطرودة يلا على الطريق.. وبقفل وراك باب صحبتي..
أنا ياخي جد ما مستواك.. . ولا إنتِ تشبهي أسرتي..
شكراً وعيت درس النفاق.. وأخدت في الحال حصتي..
كيد النساوين ما بيدوم.. والفرجة صارت لعبتي..
وخسارة أكتب فيك حرف.. أو أذكرك في صفحتي..
كل الحكاية باختصار.. (أنا كنت قايلاك صاحبتي)!!
لكن أتاريهو الحسدي.. جواك يقول: (ياغربتي)!!
*تلويح:
إلى كل امرأة طالها غدر النساء وكيدهن وحسدهن المؤلم.
