شايفك في الجنينة تحومي

طرطشة:-
قال النعام آدم وبعدو محمد النصري ومعاهم كم فنان شايقي:-
(مر علّي ما سلّم *** منو وليهو بتظلّم
يا عيون ابكي دمع الدم)
والله يا جماعة، هو متلوم متلوم متلوم.. لوم الحجار والجبال.. فد زول فيكم.. سلم عليهو مافي؟ والله تغا شديد.. ورفع نخرة
علا يا جماعة البكا والطرشطة مو سمحة.. ومافي داعي ليها!!
أقول لكم قولة:-
انتو زاتكم إن لاقيتوهو ما تسلمو عليهو ولا تهببو ليهو!!
لكن أووووووعكم تجيبو طاري اسمي فوق خشومكم.. سمح؟
مكجّن القوالة والفتنة واللخبتة في بلد الله
دايرين يجننوها:-
آسيا كانت سمحة وفنجرية.. قالو فيها وهي مسافرة لكسلا عشان تزور ضريح سيدي الحسن:-
آسيا بابورك في اللراك…
لزيارة كسلا راحن
التاكسي اتبرعّن
والضرايح ذاته رزّن
“وكان داير يقوم سيدي الحسن”
الحمد لله.. الما اتنفض وقام من ضريحو سيدي الحسن.. نان باقي لكم إن قام، وآسيا واقفة فوق راسو بتجيكم راجعة نصيحة؟
شايفك في الجنينة تحومي:-
أكتر من أسبوع.. وأكتر من اربعة فنانين.. ديل السمعتهم باضاني غير الغنو من وراي.. يكوركو:-
(شايفك في الجنينة تحومي
ليه يا الوزة
ما بتعومي).. بالله دي بلد دي؟.. حتى الوزة مبارينها ودايرين يعرفو شماراتها شن؟ ما لكم ومالا؟.. تحوم.. تعوم.. تنوم.. خلوها في حالها.. الحوامة في واطة الله دي، ما دايرنها تحومها؟
اسمعي يا الوزة.. يا زولة حومي زي ما عاوزة.. وباكر دي.. كية عليهم.. حومي في جنينة القصر الجمهوري ظاطو!!
مخانقة:-
علي لسان اب داوود في غنية فينوس.. قال عوض حسن أحمد:-
تعالي نقضي العمر عناقا
واسقنها خمرة السهر دهاقا
المحيرني.. الناس ديل دارين ياكلو عيش من وين؟.. عمرهم كلو يقضوهو مخانقة وسَكَر؟
واسطة:-
السادة القاعدين تكرمو في الفنانين الليام دي.. والله الكرمتوهم والدايرين تكرموهم يستاهلو.. علا وصيتي ليكم.. ما تنسو:
أبو عركي البخيت
البلابل..
إدريس إبراهيم
ترباس..
عبد الوهاب الصادق
النور الجيلاني
الموسيقار حمدية
(عارفكم ما ترضو زول يدخّل خشمو معاكم.. لكن غايتو تراني اتوكلت على الحي الدائم ودخلتّ خشمي)