الفاتح جبرا

قم بجس (ضنب) الخروف للتأكد من إكتنازه وبالمرة وإنتا رافع الضنب عاين إذا كان هنالك بقايا لأي إسهالات وكده


كلنا يعلم ان مسالة شراء الخروف أبو (كم وكمين) أصبحت في مصاف الإستحالة للمواطن العادي .. ولكن بما إنو المسألة كما قلنا من قبل أصبحت في حكم العادة الإجتماعية و(المرا) ممكن تكون (بتنقنق) لأنو أخواتا (رجالهن) قاعدين يضحوا ليهن والأولاد كل دقيقة (الخروف وين يا بابا) .. ويكون (بابا) عندها في حالة نفسية يحسد عليها فيقوم بعمل المستحيل لشراء الخروف !
عزيزي القارئ .. أها بعد عمل المستحيل ده الخروف يطلع مضروب؟ دي تكون حكاية ،عليه وحتى أنقذك وأنت تقوم بإختيار الخروف وعشان قروشك ما تروح (شمار في مرقة) فقد قمت بسؤال عدد من الخبراء الذين قاموا بإسداء هذه النصائح في كيفية إختيار الخروف (الصاح) .. وقبل ما نقول ليك النصائح عاوزين ننبهك لبعض الأشياء ..
أول حاجة لمن تكون ماشي تشتري الخروف أبعد عن الشياكة والأزياء البتخلي البائع يطمع فيك .. يعني أمشي ليك بي (جلابية وشبشب) مثلاً ..
تاني حاجة يستحسن تمشي مع جماعة عشان ناس الخرفان ديل ما ينفردو بيك لأنو لمن تكونو مجموعة بيكون في أكتر من رأي ناهيك عن الدعم اللوجستى منهم وممكن ممارسة بعض الضغوط على البائع .. (على بالطلاق ما تقول حاجة) … (يا زول خلاس أرفع الخروف بالسعر القلناهو ليك ده) … !

طيب نجي لمرحلة فحص وإختيار الخروف :

عندما تقف عند قطيع الخراف قم بإختيار الخروف نشيط الحركة الواقف على حيلو ذو القوائم السليمة (مافيهو عرجة) ، وعندما يحضره أمامك البائع أطلب منه أن يضعه على الأرض (يختو في الواطة) لأنو معظم البائعين يرفعون الخروف إلى أعلى من قوائمة مما يعطي إنطباعاً للمشتري إنو ده (حارس مرمى) ما خروف .
• أفحص الرقبة جيدا للتأكد من خلوها من الدمامل مع خلو الفم والأنف من أي إفرازات غريبة .
• عاين لعيون الخروف ما يكون فيهم أي أفرازات أو (إحمرار)
• لو عاوز تعرف (كم اللحم) في الخروف أتحسس بأيدك (ضهر الخروف) فهو يمثل (الشاسيه) الذي يوضح الحجم الحقيقي للخروف .. قم بتمرير يدك من عنق الخروف وحتى ذيله وأنت تضغط بيدك على الصوف وتتبع السلسلة الفقارية للخروف والعضلات التي حولها فهي دليلك إلى حجم الخروف وكمية لحمه ! فإذا كان الخروف (أبو لحم) فسوف تشعر بالعضلات وإذا كان (أبو من غير لحم) فسوف تشعر بالعظام .
• قم بجس (ضنب) الخروف للتأكد من إكتنازه وبالمرة وإنتا رافع الضنب عاين إذا كان هنالك بقايا لأي إسهالات وكده
• الأسنان أهم حاجة لمن تجي تشتري خروف لأنها ذي العداد في العربية بتوريك الخروف (قطع كم) … يعني عمرو كم؟ .. قم بفتح فك الخروف يمكنك أن تعرف عمر الخروف التقريبي من فحص قواطع الأسنان التي توجد في الفك السفلي .. يقول الخبراء في هذا الشأن أن الخروف المناسب من كانت أسنانه تترواح بين 2-4 أسنان .. الأول يسمونه أهلنا (تني) والثاني يسمونه (رباع) وكلما كثر عدد الأسنان بعد ذلك كلما كان لحمه قويا عسير الهضم ..
• الناس البتفتكر إنو الخروف لازم قرونو تكون كبيرة بنقول ليهم لا توجد حقيقة علمية تقول بأن كبر القرون دليل على جودة وأصالة وعراقة ومعدن الخروف ، هي مجرد سلاح يستخدمه الخروف دفاعاً عن النفس فقط لا أكتر .. (إنتا حقو تركز على اللحم بس !!) والحاجات الشرعية .
• عزيزى المواطن لا تنخدع بكثافة صوف الخروف ولا يغرنك (الفرو) الجميل والشكل (المبغبغ) فالكلام (على اللحم) فربما يكون وزن الخروف (بالصوف) 20 كيلو .. وبعد أن يسلخ ما يطلع ليهو 12 كيلو .. في النهاية الفرو بتاع الخروف ح يشيلو الضباح وما ح تستفيد منو حاجة فلا تنشغل بفرو الخروف وركز في اللحم !

ما بعد الشراء:
• لا تنسى يوم (الوقفة) أن تكثر للخروف من السوائل وتقلل من الأكل تخليهو (شبه صائم) عشان يكون سهل نضافة الأحشاء والمرارة (تطلع سريع) وكده
• بعد قراءة هذا المقال لا تنسـى عزيزي القارئ أن تدعو لنا بظهر الغيب وتذكر هذه النصائح الثمينة عند تذوقك (الشية) !

كسرة :
عزيزي المواطن قم بإختيار خروفك بعناية … قروشو ما جات بالساهل !!
• كسرة ثابتة (قديمة) :أخبار ملف خط هيثرو العند النائب العام شنو؟ 81 واو – (يعني ليها ستة سنوات و 11 شهر) ؟
• كسرة ثابتة (جديدة): أخبار تنفيذ توجيهات السيد الرئيس بخصوص ملف خط هيثرو شنو؟ 40 واو (يعني ليها ثلاث سنوات وستة شهور)
الجريدة


تعليق واحد

  1. السلام على الجميع ، وكل عام والسودان والأمة الإسلامية بخير. أستاذنا الفاتح جبرا أعتقد إنك نسيت حاجة مهمة جداً أثناء فحص الخروف ، وأحب أذكِر الجميع عندما تم فحص خرفان الصادر قبل سنوات و أثناء الفحص وجدوا خروف أصلاً هي “اُنثى” والجماعة مزوِرينها على أنها خروف ذكر، وكانوا ملِبسينها جلد خروف ذكر حول الثديين!!!!!!!!!! ودي من مصايب الزمن ونوع جديد من الغِش والنصب نعوذ بالله منهم. هذا ما لزم التذكير به ، وكل عام والشعب السوداني يُضحي بخراف أصلية سودانية مية المية.