من كل بلد سجم.. ومن البلد الجنبها رماد

من مصر:-
الزوج 86.. الزوجة 80
قضت محكمة بتطليق الزوجة 80 سنة من زوجها 86.. حسب طلب الزوجة لأنها “قالت الزوج ماشي على حل شعرو.. وما جايب خبرها وهي خايفة من الفتنة”.. وخالت القاضي في أضانو.. غايتو ما بعرفا قالت لو شنو؟ أها القاضي قبال ما تتم النضم في الأضان رفع راسو موجهاً الكلام للزوج المتهم و قال لو” يا راقل انت طاليئ”!!
الحق حق.. والحق ما يزعلش حق
………………………………….
ومن ارض الفرنجة:.. ثرية ألمانية في السادسة والتمانين من عمرها “من الرايخ التالت”.. تطلب الزواج من رجل يقدس الحياة الزوجية.. رومانسي (شرط مهم جدا).. و”بحب الأطفال”.. بعني ناوية تملاهو شفع.. الحول بي زول.. وح تتنازل وتورثو كل ثروتها!. رومانسي دي قالت مهمة.. ومن حقها دايرة تدلع.. مش بي قروشا؟..
وبرضو الحق حق والحق ما يزعلش حق..
الناوي يمشي ويعرس.. نساعدو شوية..شيل دلوكة معاك. دلعها وعلمها رقيص رقبة…وخليها تتني رقبتها قدر ما تقدر.. واحفظ غنية “عينيا.. يا عينيا.. عينيا سمحة المقدّرة”.. اتفرجخ وخت الدلوكة بين كرعيك .. ورقصها عليها.. بعد اسبوع ح تكون ورثتَ كل شي.. بالتوفيق!! “انت عارف.. فرجختك بالدلوكة براااا ها بتجيب خبرها”!!
…….
ومن بلدة (العشكبو):..
رومانسية.. (سوعال مستحرج):-
تفرتق في التوب الجديد الجابو وفاجعها بيهو زوجها البلال.. وهي مبسوطة قالت لو
(جيد لي.. يا يمة.. البلال انت إن شاء الله ربنا يخليك لي.. وحات الله ما قايلاك بتريدني كدي؟.. حسي آآآآآآآ البلال أنا كان متّ بتسوي كيفن؟)
!!! “بعرس”
………….
من قرية (زنقوهو اهلو):-
مجلس صلح..
(مطلق المرا دي في شنو.. يا جلال؟)
“أها عاد النحدسكم.. في عرس نجلا بت خالتها.. قالت دايرة توب باتنين مليون جنيه.. ما جبتو ليها.. أتاريها زعلت واتحرقت.. وحفضتها لي.. أها يوم الطلاق.. قاعدين في العوضة.. وهي شايله ولدها تلعب فيهو.. تنقزرو ترفعو فووووق وبي خشمها تلكلكو في بطنو وتقول ليهو:- “حمودي الشين.. يا ربي الشنا دي جايبها من وين؟”.. الشافع فووق مشبح ايدهو وبي خشمها تلكلكو في بطنو وميت من الضحك ويريل ويأشر علي “بااااااااابا”.. تاني ترفعو “حمودي الشين…. يا ربي الشنا دي جايبها من وين؟” الشافع رافعاهو فوووق وبي خشمها تلكلكو في بطنو ومشبح ايديهو وميت من الضحك ويريل وياشر علي “بااااااااااابا”… أها باقي لكم الشافع دا ما مدرّب علي النضم الزي دا؟..
ختامه رغيف:-
قال لها زوجها المثقفاتي للطيش وهو واقف يبّرم في شعرو.. بعد أن استمع إلى نقنقتها في الأكل:-
( يا هادية يا حبيبتي… “ليس بالخبز وحدو يحيا الإنسان”)
قالت ليهو وهي قاعدة في الكرسي وتهوزز في كريعاتا:-
!!! ” قلت كدي؟… خلاص، جيب لنا معاهو لحم”..