شركة زين.. لو قاصدين تطردوا صغار الزبائن فانتم ماشين فى الطريق السليم

نشطت شريحة بيانات زين كونكت بتاريخ 30 ديسمبر. و قبل كم يوم رفض يدخلنى الشبكة و يقول التوصيل قطع من الخادم البعيد remote server. قلت احاول بكرا لكن نفس الحكاية. انا شغال بال 5 قيقا فى الشهر لاكتر من 5 سنين و ما حصل كملت قبل الشهر فما فى زول يقول لى تكون الحزمة كملت.

و بالصدفة عرفت انو اسعار الحزم حا تتغير و كلام فارغ زى دا. طيب يا زين انتو شلتو قروشى و دخلتو معاى فى اتفاق على الخدمة قبل 20 يوم؛ اقل حاجة تكلمونى بسبب الحركات البتعملوها و ما تعطلو مصالحنا. و بعدين من ابسط بديهيات التعامل انكم تخلونى اتم الشهر بتاعى و بعدها تواجهونى بالتغيرات.

و مافى زول يقول لى ما مسجلة لانى اشتريتها فى الوقت داك من مكتب زين و اديتهم كل البيانات و اثبات الشخصية.
و انا ما فاضى افتش مكاتبكم وين و بعدين و ما تقولو لى اضرب لخدمات الزبائن لانى متابع مشلكة طالبة معاى اتموسرت فى شريحة و انتو بتشيلو قروشها يوميا لانكم بتفعلوا ليها الاشتراك اليومى و هى ساكاكم توقفوا الحركات دى بعد تغيراتكم دى و ما شغالين بيها.
و لو قاصدين تطردوا صغار الزبائن زينا فانتو ماشين فى الطريق السليم.

د. شريف فضل بابكر