فارس النور: بيت خور النفق.. ياريتني كان ماجيت
بعد مافطرنا مع (اطفال الشوارع) يوم الثلاثاء بمطعم اولاد امدرمان
فجأني الاطفال بسؤال : ليه مازرتنا في بيتنا في خور النفق لحدي الان ؟
لازم تمشي معانا تشوف عملنا سبورة في الحيطة وعندنا كلب وجداد و….كانوا بتكلموا بحماس الزول العندو حاجة سمح داير يوريها .
قلت ليهم عندي شغل امسي اقضيهوا واجيكم بعد ساعتين
وياريتني كان ماجيت…
والله ياريتني كان ماجيت ..
ماكنت قايل الوضع بهذا السوء…
والغريب هم مبسوووووطين!!!
واي واحد داير يوريني حاجتو محمود قالي:
يااستاذ دي السبوره عملناها عشان نراجع كلام استاذه علياء واستاذه كوثر .
وادم قالي : يااستاذ دا كلبي عاينو لبستو فنلتي وشوف ممكن يديني حضن (وفعلا) قالي لمن يكون في كشة بينبح بطريقه بنعرف دا انذار انو في كشه جايه.
صالح : قال لي دا غرفتي لكن ضرسي واجعني كم يوم مابقدر انوم .
هم بيتكلموا وانا مذهووووووول ليه كل الانتهاك دا لي أدميتهم؟
وبقيت اشوف (بئر معطله وقصر مشيد مكتوبه في كل زاويه ودخلتا في حاله تانيه بقيت سامع الكلب بينبح بقول(بئر معطله وقصر مشيد).
وهم بيحكوا عن حاجاتهم لكن اصواتهم كلها تحولت لي (بئر معطله وقصر مشيد).
بقيت ماقادر استحمل جرييت العربيه دورتها قدامي عربيه ضربت ليها بوري صوت البوري بتاعي بقول (بئر معطله وقصر مشيد).
موبايلي ضرب نغمتوا بقت (بئر معطله وقصر مشيد).
انا شكلي شميت السلسيون وسطلت.
وبما انو نحنا ماعطلنا البئر ولابنيننا القصر خلونا في شمعتنا العايزين نولعا في النفق اقصد في الخور
والله المستعان
ياجماعه والله اي زول يساهم بحاجه بسيطه ممكن تعمل فرق.
فارس النور
منظمة مجددون السودان
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة
انتو شنو البتسوا فيهو دة ؟؟؟!!.. كدة انتو بتدعوا وتساعدوا في انتشار التشرد والاجرام !!!.. كلهم ديل خلايا نايمة للمتمردين .. شنو يعني العاصمة كلها .. بتاعين درداقات وستات شاي وبتاعين ورنيش وبتاعين ترمس ومتسولين ومشردين ؟؟.. وكللهم شغالين بيعملوا قروش ؟؟!!.. والله مفروض الشرطة تمسك بتاعيين المنظمات ديل تحاسيبوم في البسوا فيهو دة !!.. بتهمة المساعدة في الاجرام والتشرد والتسول والتهرب من دفع الضرائب ومساعدة المتمردين ..
إستحي بس
ديل حإقاضوك يوم القيامة على بؤسهم وسوء حالهم
ما داير تنزل عليهم رحمة من الناس العدها ضمير وإحساس بحال الناس
نايم ماكل شارب أحمد ربك كم دول لم تحمد الله وشعوب تطاولت وفسدت قولا مثلك وأفعال إنتهى بهم الأمر مضطهدين مطرودين
أعرف أنك لست أكرم على الله منهم لكنه حكيم عليم يختبر هذا بهذا وأراك ربما والله أعلم فشلت في الإمتحان.
ربي إوفقنا وإياك لشكره وحسن عبادته ورحمة خلقه أو أقلاها نخلي الناس تحسن إليهم
ألا يكفيهم ما هم فيه يا إنت
انت شنو البتسووا فيهو دا!!!
سبحان الله.. ربنا ينور بصيرتك.
اما انت يا فارس النور.. جزاك الله خير عننا وعن الصغار وعن كل ضعيف مستضعف ساعدته،، حتى لو بابتسامة تبعث فيهو الامل خليك من لقمة او اولاد امدرمان او هدمة او زيارة لمحلهم جبراً لخاطرهم.. وفقك ربي انت وكل اللي معاك.