طقم بهارات

ما أن يهل رمضان حتى تمتلئ الفضائيات والإذاعات ببرامج المسابقات (ليه ما تعرف) فيتسابق المعلنون لوضع إعلاناتهم قبل بث (المسابقة) حرصاً على مشاهدة أكبر عدد ممكن من المشاهدين والمستمعين ترويجاً لبضاعتهم ويتم إستقطاع وقت أكبر للإعلان لتلك الشركة أو الجهة المانحة للجوائز .(إذاعة الخرطوم) شأنها شأن بقية الإذاعات والتلفزيونات قامت بعمل مسابقة لمستمعيها ذات جوائز تمنحها إحدى الشركات التي تقوم بالإعلان عن أدوات كهربائية (ثلاجات ومكيفات وشاشات وخلافه) وكذلك أثاث (غرف نوم وغرف جلوس وسفرة.. إلخ) مما يعني ضمنياً أن الجوائز مما يضمه الإعلان من (بضاعة)! .. قام عدد كبير من المستمعين بمتابعة المسابقة أملاً في الفوز بإحدى هذه الجوائز (الثمينة) التي يتم عرضها والإعلان عنها ومن ضمن هؤلاء المستمعين بتنا (مودة) التي كان يحدوها الأمل في الفوز، وقد فوجئت بالفعل بفوزها وإذاعة اسمها بعد انتهاء الشهر الكريم وفرز المسابقة وإجراء القرعة وقد قامت (الإذاعة) بالتنويه على الفائزين التوجه لمبانيها لاستلام قسيمة الفوز للتوجه بها إلى مبنى الشركة المانحة للجوائز .

عم الفرح الأهل والجيران والأصدقاء وأخذوا يشاركون (مودة) فرحتها :

والله لو الجايزة بقت مكيف بختك مع السخانة دي
لو أوضة جلوس تكون موباااالغة عشان الضيوف
التلاجة تكون جات في حتتا ما تقولى تلاجتنا دي بقت قديمة وما بتبرد
العجب لو شاشةLCD تاني تشوفي المسلسلات بي مزاج
أخذت (مودة) وشقيقتها الكبرى عربة أمجاد (بالشي الفلاني) وتوجهتا نحو مبني الإذاعة
أنا (مودة) الفائزة بي جايزة رمضان
مبروك.. لكن الزول العندو (قسيمة الفوز) المفروض تمشوا تستلموا بيها الجائزة من الشركة ما جا الليلة ممكن تجوهو (بعد) بكرة !
وعادت (مودة) وشقيقتها للمنزل (أمجاد مرة تانية)، وفي اليوم المحدد (بعد بكره) أخذن (أمجاد للمرة التالتة) وذهبن للإذاعة حيث وجدن (الموظف) وأخذن منه (قسيمة الفوز) وعنوان الشركة و(أمجاد للمرة الرابعة) وعلى مباني الشركة لاستلام الجائزة .
جلست (مودة) وشقيقتها في استقبال الشركة في انتظار الموظف فإذا بشاب ومعه رفيقه يدخلان وما أن جاء الموظف حتى قام الشاب بتسليم الموظف الإيصال وأخبره بأنه (برضو فائز) في المسابقة وجاء لاستلام الجائزة.. غاب الموظف لحظات ثم عاد وهو يحمل (ثيرمس شاي) :

(في استغراش): ده شنووو؟
دي جائزتك
جائزة شنوووو؟
جائزتك الفائز بيها في الإذاعة
ثيرمس شاي؟
والله ده حظك كده
يا أستاذ أنا جاي ليكم من (النيل الأبيض) تذاكر ساااكت بي 600 جنيه (مشية وجية) غير أي حاجة تانية.. تقول ليا ثيرمس .
والله ده العندنا ممكن تمشي تشتكي للحتة البتعجبك !!

ما أن انتهى الشاب من حديثه حتى خاطبت (مودة) الموظف وهي تسلمه الإيصال :

أنا (مودة) برضو فايزة في مسابقة إذاعة الخرطوم وجاية أستلم الجايزة
غاب الموظف لحظات ثم عاد وهو يحمل في يده (كرتونة) صغيرة
(في استغراش) : ده شنوووو؟
دي جائزتك
جائزتي ياتا ؟
الفُزتي بيها طبعاً…
اللي هي شنووو؟
(وهو يفتح الكرتونة): طقم بهارات ّ !!
القصة حقيقية.. نهديها لإذاعة الخرطوم (صاحبة المسابقة).. دون تعليق منا غير (حسبنا الله ونعم الوكيل)

كسرة :
مش كويس الجائزة ما طلعت (ضفارة) !!!

• كسرة ثابتة (جديدة لنج) :
أخبار إجابة رئيس الجهاز القضائي بالخرطوم على (الاستئناف أبو يوم) شنو (و) !

• كسرة ثابتة (قديمة): أخبار ملف خط هيثرو العند النائب العام شنو؟88 واو – (ليها سبع سنوات و4 شهور)؟

• كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو؟ 47واو (ليها ثلاث سنوات وحداشر شهر)

ساخر سبيل – الفاتح جبرا
صحيفة الجريدة