يكتبوك في جناح حِديّة.. تطير وتقول الله ليّ

سبق وأن ذكرت كتاب الكواديك والعمل.. كتاب شمس المعارف.. الكتاب دا عشان الكادوك يكون كادوك ماركة.. ومعتمد.. ويسجم ويرمد الزول المكودك.. قسم الناس من حيث الطباع إلى اربعة أنواع.. زول ناري.. وزول هوائي.. وزول مائي.. وزول ترابي.. وكل واحد عندو أوصافو.

الناري دا تلقاهو في نضمو اهتمامو كلو بالنار.. يعني لو جا وقعد جنب ست شاي.. أول حاجة يلاحظ لي نار الكانون.. وممكن يقول ليها نارك دي مالا باردة كدي.. زيدي الفحم دا شوية.. وأي حاجة ليها علاقة بالنار يهتم بيها.. يجي من الشارع وطوالي علي التكل ويرفع أنبوبة البوتجاز ويشوفها قربت تكمل واللا لسه.؟ ولو مرتو ضربت ليهو تلفون قالت ليهو الغاز كمل.. يزهج جدا وتغلبو القعدة.. وجري علي البيت عشان يملا الانبوبة.. ومن الاغاني البتهيجو وتخليهو يقوم يعرض غنية (النار ولعت)..

اها زي دا لو عملو ليهو عمل العمل لازم يتحرق في النار ويكون في شكل بخور.. عشان يمشي فيهو ويبقى نعجة..

أما الزول الهوائي دا.. وااااضح.. مكجّن القعاد في الأوض.. طوالي في الحوش.. وديمة تلقاهو يتهبب بجريدة لو مرا تلقاها صيف شتاء تتهبب بطرف توبا.. لو ما لقى حاجة، يتهبب بايدو ساكت.. في ايام الخريف يعاين بعيد ويقول ليك الليلة شكلها دايرة تجيب ليها كتاحة.. والله الكتاحة اخير من المطر..

زي دا يتعمل ليهو عمل ويفكوهو عكس الهواء ولو دايرين العمل يكون تمام يكتبوهو في جناح حِديّة تطير وتقول الله ليّ..

أما الزول المائي فدا واضح مع الأمطار.. يجي ماشي كويس ويشوف ليهو بركة موية.. طوالي يشيل نعلاتو في أباطو ويعضي جلابيتو في خشمو ويدخل يخوض في الموية عشان يقطع الشارع.. شوف عيني في مسعول زماااااان كان مائي جدا.. يشوف الفيضان وين؟ والناس الغرقانين وين.. ويركب طيارتو.. ومن سلم الطيارة يكفكف بنطلونو ويخوض في الموية.. ويكبّر.. وهو فرحاااان!!!.

اها زي الزول المائي دا.. يسووا ليهو العمل ويصوطوهو ليهو في موية أو في شربات ويشربوهو ليهو.. تاني يوم الباسويرد بتاعتو تكون عند صاحب الكادوك.. يسوي الداير يسويهو فيهو..

أما الزول الترابي فدا.. واضح من اسمو.. زول بيحب التراب.. تلقاهو يحب يتفن في الواطا.. ولو في كوم رملة تلقاهو طوالي قعد فيهو من غير ما يشعر. وبعد مايصلي تلقاهو اتوسد ايدو واتبطح ورقد في التبروقة أو البرش. تقول ليهو قوم علي العنقريب يقول ليك لا لا كدي مرتاح.. خليهو لأنو فعلا بيكون مرتاح!.. وفي ايام الخريف عكس الزول المائي.. يتلفت من بعيد كايس للمكان الناشف ويلف اتنين كيلو عشان يقطع مسافة خمسين متر في ايام الجفاف وتلقاهو ينطط من حتة ناشفة لي حتة ناشفة لحدي ما يقطع الشارع..

أها الزول الترابي دا يتعمل ليهو العمل أو الكادوك ويدفنوهو في مكان.. ويكون في حوشو.. ويا ريت لو يكون تحت عنقريبو مباشرة..