ضرائب العازفين
ضحك العبدلله حتى استلقى على قفاه وهو يردد عبارة (يا هو الفضل.. يا هو الفضل) وهو يطالع على إحدى الصحف إعلاناً من رئاسة الضرائب تخاطب فيه كما جاء في متن الإعلان أصحاب المهن الغنائية والموسيقية بشقيها الشعبي والحديث وفرق الإنشاد والمدائح وكل من له علاقة بالفن بمختلف مسمياته أن يقوموا بتوفيق أوضاعهم الضريبية.
والأمر هكذا لابد من إنشاء إدارة في الضرائب تسمى (مباحث ضرائب الفنانين والمادحين) مهمتها متابعة نشاط المادحين والمطربين والعازفين وإخضاعهم للجلوس داخل (المظلة الضريبية).
مشهد (1):
ليلة ذكر ومديح في منزل مواطن بمناسبة ختان أنجاله، تعشى القوم وضربوا (الزلابية) باللين وجاء دور المادح الذي قام بفتح شنطة (الطار) وإخراجه بينما فعل (الكورس) المكون من ستة أشخاص نفس الشيء إيذاناً ببدء الجلسة الروحية.
• المدينة يا النورك يلالي .. أنا قلبي ليك نط من شمالي
• (الكورس): نط من شمالي
وهنا يدق الباب بعنف فيتوقف الجميع، يفتح صاحب المنزل الباب فيفاجأ بأربعة أشخاص يرتدون بدلات سفاري بيجية وأمامهم عربة بوكس ذات أرقام صفراء:
• ده بيت محمد زين؟
• أيوة.. أنا محمد زين
• اتفضلو معانا ..
• لا شكراً شغالين والله
• إنتو منو؟
• نخنا بس بنسأل، معاكم المادح قمر الأصفياء؟
•آآي مالو …
• متهرب من الضرائب وعندو أمر قبض
• اتفضلوا..
• (رئيس المجموعة يتجه للمادح الذي أخرسته المفاجأة):
• كمان بتضرب في الشاي والزلابية وعليك خمسين ألف؟
• والله كنتا جايبا ليكم بس عملتا ليا عملية بواسير أخرتني كدا
• (وهو يأمر الأفراد الذين معه): أرفعوه في البوكس هو والكورس المعاهو ده
• (واحد من الكورس): أنحنا عملنا شنوو؟
• عملتا شنو كيف.. العداد ده ما قاعد تشيل منو؟
• والله أنا متبرع للشيخ ده سااااي
• الكلام ده قوولو في القسم..
• (أحد الحضور): خلاس يا جماعة خلوهم بس يمدحو لينا (يا شفيع الأمة)
• (المادح وهو يلمام حاجاتو): عليكم الله دي أمة يشفعوا ليها؟
مشهد ثاني:
في صالة (النسر الذهبي)، المعازيم يتناولون في العشاء والبارد بينما الفرقة الموسيقية تأخذ في أماكنها في انتظار الفنانة (علوية باغات)، ما أن أخذ العازفون أماكنهم وأمسكت (علوية باغات) بالمايك لتحية الصالة إيذاناً ببدء الحفل حتى اتجه على المسرح شخص يمسك بيديه (دفتر) يتبعه عدد من الأشخاص:
• (وهو يوجه حديثه لمعاونيه): أي عازف ما يوريكم (إيصال ضرائب) الحفلة دي على البوكس طوالي
• يتجهون لأول عازف (بتاع البنقز) الذي ما أن رآهم حتى أخذ في وزن البنقز بتشكيلات إيقاعية.. طرررر طرت طرر.. دوم ددوم دوووم.. تررر ررر تترم
• يا زول وقف حركاتك دي وورينا إيصال شغلك في الحفلة دي
• يا جماعة حركات شنووو.. والله دفعتا ضريبتي بتاعة الحفلة دي
• ورينا الإيصال..
• (يبحث في جيوبه): والله الظاهر لمن غيرتا هدومي وأنا جاي نسيتو في جيب القميص
• دي علينا.. (أرفعوهو)
• (تحين منه التفاتة نحو بقية أعضاء الأوركسترا الذين يحاول بعضهم الزوغان): ما تعملو لينا مفتحين.. كل زول يمسك آالتو ويقعد في كرسيهو وما يتحرك هنا وللا هنا
.. يتجه للعازف الملاصق لبتاع البنقز:
• أها أنتا معاك إيصال وللا برضك نسيتو؟
• لا … أنا عاوز أدفع هسسه هنا
• إنتا بتعزف شنوو؟
• البيز جيتار الشايفو ده..
• طيب (ينظر في الدفتر) …
• (ينظر في القائمة التي معه … 150 .. كمنجة .. 200 .. أوكورديون 180 أهي أهي لقيتا..طبلة 180 .. بيز جيتار .. بيزجيتار .. بيزجيتار أهو 200 جنيه)
• (يخرج العازف 200 جنيه يعطيها لرئيس الحملة الذي يخاطب معاونه): أوهو إيصال وعندو باقي 20 جنيه !!
• وهنا يصدح صوت المطربة علوية باغات عبر الساوندسيستم:
زي ده ما شفنا …
بري بري .. زي ده ما شفنا
القلع ده ما شوفنا !!
مشهد تالت:
شخص يسير بالقرب من (نادي الفنانين) ويحمل (عود):
• أقيف يا زول عندك
• (بخلعة (في شنووو؟)
• معاك مباحث الفنانين
• وأنا مالي ؟ لا فنان وللا حاجة
• طيب والشايلو ده شنووو؟
• ده عود بتعلم فيهو سااااكت.. لسه ما بعرف أعزف
• بتتعلم فيهو.. مقددا… لازم تدفع (ضريبة العازفين)
• يا جماعة قلتا ليكم أنا ما عازف ..
• خلاص أدفع تحت الحساب ولمن تبقى عازف ح نخصمها ليك !
كسرة:
عقبال مباحث ضرائب المتسولين !!
• كسرة ثابتة (قديمة): أخبار ملف خط هيثرو العند النائب العام شنو؟ 88 واو – (ليها سبع سنوات و4 شهور)؟
• كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو؟ 47 واو (ليها ثلاث سنوات و حداشر شهر)
ساخر سبيل – الفاتح جبرا
صحيفة الجريدة
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة
عسل يا جبرا عسل.
هههههههة ضحكت حتى بانت نواجزي في زمن عز فيه الضحك …… وحقا شر البلية ما يضحك
وليه ما يدفعوا ضريبة مش أي مهنة عليها ضريبة بتاعين الدرداقات وستات الشاي فالفنانين عدادهم رامي وهو اللي يحدد التسعيرة ويقبض في الحفلة الواحدة ملايين.ويجب أن تكون بطريقة مقننة خاصة وأن الحفلات تقام باستخراج تصريح، يعني ممكن ضبط الموضوع دون أي تهرب.
هههههههههههههههههههههههههههههههه…. دي هي أمة يشفعوا ليها…هههههههههههههههههههههههههههههههههههه
اذا كانت هناك دولة حضارية كما يقولون فهو امر عادي انها مهنة ككل المهن بل ولهم اتحاد يسمي لتحاد المهن الموسيقية لكن ناس الانقاذ ديل طبعا مبدعين في التظاهر بالحضارة وهم ابعد ما يكون عنها ليس الدهشة في ضرائب المهن ايا كانت ولكن الدهشة في عدم وجود دولة بالاساس نا هيك عن كونها حضارية فالمثل بيقول عريان …. ولابس له صديري … هذا ما تدهشنا به الحكومة والقائمة تطول في فقدان الناس ثقتهم في الحكومة ام جلدا اتخن من جلد التمساح والناس كمان جلدا اتخن من الحكومة ما في شي بجرحه ولا بحركه
فالحكومة ابتدعت تحصيل الكهرباء مقدما في بلدا تقطع فيه الخدمة رغم وجود رصيد وعندما وجدت ان الناس لا تشعر ربطتها بالمياه وعندما لقت الناس نايمة الزمتهم بتوفير الاعمدة والاسلاك والتنازل عنها للصالح العام وعندما لقت الناس متخنة جلدا زيادة جابت ليهم ضريبة للمهن الموسيقية في عنوانها القانونية وفي باطنها السفسفة
لما تعملو بلد صاااااح انا اول زول بدفع ضرائب لاني بكون مقتنع انها راجعة لي تاني حتي لو كانت ضريبة نوم