تحصين فكري

لم يجف حبر المقال الذي نشرناه مؤخراً والموسوم بـ(خبير نفائس) والذي استهجنا فيه كثرة الهيئات والمؤسسات الهلامية من شاكلة (الذكر والذاكرين)، (أهل القبلة)، (دار النفائس للإبداع) و(هيئة ترقية السلوك الحضري) و(مركز الجاليات) وغيرهم من هذه الأسماءالشاذة التي ما أنزل الله بها من سلطان والتي تفصل تفصيلاً لترضع من ثدي هذا الشعب (المحتار) ليقتات شاغلوها (الأرزقية) من عرق مواطني هذا البلد المنكوب، حيث ترصد لهم الميزانيات الفخيمة من مخصصات وسفريات وأثاث ورياش في بلد يشكو مواطنيه لطوب الأرض؟

لم يجف حبر ذلك المقال إلا وهيئة لم نكن نعلمها قد صرحت بالصحف أول أمس بأن هنالك جهات تشجع على الإلحاد وهي هيئة تسمي نفسها (هيئة التحصين الفكري) أي والله (التحصين الفكري) ولما كان العبدلله يعلم (التحصين ضد الجدري)، والتحصين (ضد شلل الأطفال) والتحصين ضد (الحصبة) فقد وجد أن الأمر يحتاج إلى الاستعانة بالعم (قوقل) لمعرفة ماهية هذه الهيئة، ولم يخيب (قوقل) الظن حيث جاء (بالنجيضة) فقد قال إنها هيئة (تنبثق) من المجلس الأعلى للرعاية والتحصين الفكري التابع لرئاسة الجمهورية.

نعم هيئة ومجلس أعلى وأمين عام للهيئة وواحد تاني للمجلس ونائب أمين عام للهيئة وواحد تاني للمجلس وروساء لجان هنا ورؤساء لجان هناك وسكرتارية هنا وسكرتارية هناك وموظفين هنا وموظفين هناك وعربات هنا وعربات هناك وأثاث هنا وأثاث هناك ومخصصات هنا ومخصصات هناك.. فالمهمة خطيرة وتستوجب وجود أكبر عدد من الخبراء والفنيين كيف لا وهذه الهيئة ومجلسها الأعلى يعملون على تطعيم وتحصين المواطنين ضد (الإلحاد)..!!

(1)
• أقيف يا زول هنا
• في شنو ياجماعة وإنتو منو؟
• نحنا … ن ع ت ف
• يعني شنو؟ ما فاهم
• نحنا نظام عام تحصين فكري
• وعاوزين شنو؟
• إنتا موحد؟
• طبعن موحد.. هو فينا حيل لي مرا تانية وبيت تاني !
• لا ما بنقصد كده
• طيب بتقصدو شنووو؟
• إنتا موحد الله ..
• والله إنتو بتبالغو
• كيف يا زول
• على بالحرام الكان ما عارف الله واحد معاكم عرف الله واحد

(2)
– دقيقة النفتح ليكم الباب
– يا حاجة أنحنا الحملة القومية للتطعيم الفكري
– وده بتدوهو شراب وللا حقنة في العضل
– لا يا حاجة أنخنا عاوزين نحصن ليكم مخكم ده
– يا أولادي زحو من وشي هو إنتو خليتو لينا مخ؟

(3)
سيداتي آنساتي سادتي بمناسبة اليوم الوطني للتحصين ضد الإلحاد يسرنا أنا نستضيف السيد مؤمن عبدالواحد عضو مجلس الهيئة ليحدثنا عن هذا اليوم …
• بسم الله الرحمن الرحيم والصلاة والسلام على رسول الله الأمين .. الحقيقة أختي الفاضلة نحنا في هيئة التحصين الفكري آلينا على أنفسنا إنو نحارب الإلحاد والأفكار الهدامة التي بدأت تغزو عقول المواطنين، والحملة دي إن شاء الله تصل الناس في كل حتة عشان تحصنهم ضد الإلحاد و ……..
• معليش يا شيخنا معانا مكالمة … ألو ألو معانا منو
• معاك عوض من الكلاكلة
• اتفضل يا عوض إنتا على الهواء..
• عندي بس كلمتين (للزول) ده
• اتفضل ..
• قلتا ليا تحصنوا المواطنين ضد شنو؟ المواطنين مالهم؟ خلااااس إنتو ما لقيتوا ليكم حاجة يعني غير (تكفروا) الشعب ده وتقولوا عليهو ملحد؟ هو الإلحاد ده يفوتكم يمشي وين؟ تكتلو النفس التي حرم الله قتلها إلا بالحق، وتاكلو مال الشعب التعبان ده ومال اليتيم ذاتو، وتزنوا في نهار رمضان، وتعملوا السبعة وذمتا وبعد ده جايين تقولوا علينا ملحدين، هسه بدل الكلام الفاضي البتسووا فيهو ده كان شفتوا ليكم مشاريع للشباب العاطل ده بدل حاويات المخدرات دي، وللا شفتوا ليكم تحصين ليهو وحسنتوا ظروفو وعرستو ليهو بدل الاغتصابات الكل يوم دي مش كان أحسن؟ خلاااس يعني إنتو بتعرفوا الله؟ ….. والله إنتو …. (تيت تيت تيت)
• ألو ألو … الظاهر الخط إنقطع

كسرة:
أعملوا ليكم هيئة للبحث عن لصوص هيثرو ! (قال آيه تحصين فكري)!

تنبيه: توجد واو (جديد)

•كسرة جديدة لنج: أخبار كتب فيتنام شنو(و) يا وزير المالية ووزيرة التربية والتعليم شنو(و)… (ليها شهر)

• كسرة ثابتة (قديمة): أخبار ملف خط هيثرو العند النائب العام شنو؟ 90 واو – (ليها سبع سنوات وسبعة شهور)؟

• كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو؟ 49 واو (ليها أربع سنوات وشهرين)

ساخر سبيل – الفاتح جبرا
صحيفة الجريدة