لو عندو فكك !
لا حول ولا قوة إلا بالله .. نطقت بها لا شعورياً مثنى وثلاث وأنا أتابع الخلاف الذي دار بين إدارتي (مستشفيين حكوميين) وهما إدارة مستشفي النو وإدارة مستشفي البقعة والذي للمرة الأولى أعرف أنه مستشفى أم درمان ولا أدري ما سر هذا الوله في تغيير الأسماء فمستشفى أم درمان( مما قمنا) ياهو ده إسمها .
كل فريق من المستشفيين يتنصل من أي تقصير قام به و (يدرع) القصة في الفريق الآخر ، القصة وبإختصار كالآتي :
• الساعة الثامنة صباحاً : جيئ بشخص وهو في غيبوبة كاملة إلى مستشفى النو بعد إصابته في حادث مروري .
• الساعة 12 (بعد 4 ساعات) كتب مدير مستشفى النو خطاب تحويل إلى للمريض لمستشفى البقعة يوصي فيه بعمل صورة مقكطعية للمريض مجانا لعدم وجود مرافقين معه حيث أن هذه الصورة غير متوفرة في مستشفى النو
• الساعة 4:10 عصراً ( بعد 4 ساعات تاااني) تحرك الإسعاف من مستشفى النو يحمل المريض
• وصل المريض بالإسعاف إلى مستشفي البقعة وهنالك قام المدير الطبي بالسؤال عن تقرير حالة المريض فإتضح أن المريض خرج من مستشفى النو دون تقرير وعند سؤال طبيب الإمتياز المرافق عن الحالة قال أنه لا يعلم عنها شيئاً .
• الساعة 8 مساء : (بعد أربعة ساعات تااااالت) : تم عمل صورة الأشعة للمريض (بعد أجاويد) !
تعليق :
عليكم الله ده إسمو كلام؟ المريض ده لو عندو (فكك) في كراعو مفروض يكون مات !!
من فوائد حدوث القصة الفوق دي (كان فيها فوائد) إنو عرفنا إنو علاج الحوادث (ما مجاني) وإنو لو الزول عمل حادث وما معاهو أهلو (أو مرافقين ليهو) دي مشكلة لأنو المستشفيات ما ح تقدر تعالجك وتقوم باللازم ، عشان اللازم ده عاوز قروش وإنتا جاي براك مافي زول ح يدفع ليك … يعني إذا حصل ليك حادث ورجلينك إتكسرو (مثلا) يجب أن تمشي بي رجلينك (المكسرات) ديل ذاااتم وتكلم أهلك عشان يمشوا معاك المستشفى …
• ليه ؟
• شنو ليه؟ إنتا هسه لو مشيت تطلب بت براااك أهلها بيدوك ليها؟
• لا طبعن .. إلا يكونوا معاي أهلي
• خلاس المستشفي كده .. كان مشيت ليهو براك عامل حادث ما بسعفك إلا يكونو معاك أهلك !!
• يعني قبل ما أعمل حادث أكلم أهلي أقول ليهم تعالو أنا ح أعمل حادث؟
• لا طبعن مااا تبالغ .. لكن بعد الحادث ما يحصل ومهما الضرر والإصابات الحصلت ليك لازم تمشي تكلم أهلك يرافقوك !
الحاجة التانية (العرفناها) إنو ولاية الخرطوم دي كووووولها فيها جهازين بتاعين أجهزة مقطعية لخدمة المواطنين ، يعني لو قلنا ولاية الخرطوم دي فيها عشرة مليون مواطن فالعشرة مليون قصاد الجهازين ديل بس !! (هسه دي ولاية عليكم الله يتحللوا فيها) !!
الحاجة التالته عرفنا مما دار في الصحف والفضائيات بشأن هذا الأمر بأن المريض المذكورإحتمال كبير يكون قد حدث له قطع بالنخاع الشوكي وذلك من طريقة حمله وتحريكه والعبدلله يضيف لذلك (الإسعاف ذاااتو) و (نقالات الحديد) المستعملة في معظم مستشفياتنا فمعظم عربات الإسعاف (فاضية) لا فرق بينها وبين (بكاسي السوق الشعبي) التي ينقل عليها (الخضار) أما (نقالات الحديد) فلو كنتا محظوظ وطلعتا من حادث ممكن (يجيك تيتانوس) !
كسرة :
جهازين أشعة مقطعية (بس) في ولاية فيها ستين ألف حرامي (أنظر تقرير النائب العام) … !
• كسرة تصريح النائب العام : (لا حماية لفاسد ولا كبير على القانون) … في إنتظار ملف هيثرو (ليها شهر)!
كسرة جديدة لنج : أخبار كتب فيتنام شنو(و) يا وزير المالية ووزيرة التربية والتعليم شنو(و) … (ليها ستة شهور)
• كسرة ثابتة (قديمة): أخبار ملف خط هيثرو العند النائب العام شنو؟ 94 واو – (ليها سبع سنوات وحداشر شهر)؟
• كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو؟ 53 واو (ليها أربعة سنوات وستة شهور)
ساخر سبيل – الفاتح جبرا
صحيفة الجريدة
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة
العم الفاتح جبرا كل مقال يومي منك وما يحويه من النماذج والوصفات من البهدلة والمعاناة.. مش تقول ياولد جيب الحبوب. نروح نأجر جنب صيدلية بشرط ملاصقة لمقابر عدددديل كدا…أشياء مؤلمة شديدة.. لا حول ولا قوة الا بالله العلي العظيم..
ياسعادة الاستاذ جبرا … خليك من ده كلو … محلية كررى التى يتبع لها مستشفى النو (و الما موجود فيه جهاز اشعة مقطعية) بمساحتها الجغرافية الكبيرة بداية من الثورة الحارة الاولى جنوبا وحتى الريف الشمالى شمالا ومن غرب الحارات غربا( وأعتقد بان هذه المحلية غربا وصلت حدود ولاية شمال كردفان ) حتى نهر النيل شرقا … هذه المحلية اذا ما كنت ببالغ عدد سكانها يوازى سكان البحرين وقطر والامارات …. فيها كم مستشفى ؟؟؟؟ .
يأستاذ فى السودان اذا ماكنت دفيان بتدفن
ألم … ألم … ألم
والله يا استاذ جبرا انا بالجد خايف عليك الجماعه ديل يلحقوك امات طه. امات طه شنو والله يغتسوا حجرك ويتحللو !
تبا لهم وتب
هذه سياسة مقصودة حتى يهرع اي مريض او مصاب الى المستشفيات الخاصة. سياسة الكرباج لتوجيه القطيع..افهموها.