بمناسبة ترشح الشاب “أنور دفع الله” لرئاسة الجمهوية السودانية في 2020
بمناسبة ترشح الصديق Anwar Dafa-Alla لرئاسة الجمهوية في ٢٠٢٠
بغض النظر عن اتفاقي أو اختلافي مع د. أنور ..
لكن مجرد إعلان ترشحه للرئاسة دي حاجة كويسة جدا وبتعمل حِراك ممتاز جدا على الساحة (الشبابية) تحديداً ..
الناس تحاول تبطل شوية شغل الردم العشوائي والإنتقاد لمجرد الإنتقاد .. الحركة اللي بقت شائعة الفترة دي !
شاب في عمر الأربعين .. من الآن بيبدا حملته وبيتواصل مع الجمهور وبيعرف نفسه بكل شفافية ممكنة .. في الفيس
أنا مؤمن انو في شريحة كبيرة جدا من الشباب كافرين أصلا بالعمل السياسي والحزبي في السودان .. وانو ممكن يصل لمرحلة (الترف والرفاهية) ..
شباب كافرين بجيل النكبة كله على قولة د. أمين بانقا
وبرغم يقيني الشديد انو الجماعة (رَجَالة) حيفوزوا زولهم اللي ممكن يكون كبيرهم الذي علمهم السحر .. أو غيره .. إلا انو الحراك الشبابي في حد ذاته مطلوب ..
ولو الأحزاب اللي عندنا بتفهم يعني .. دا أكتر وقت مناسب لأنها تُظهر القيادات الشبابية في صفوفها . مع حال البلد اللي وصل مرحلة سيئة جدا
فلمن يجي زول مننا .. عنده خلفية أكاديمية محترمة وتطوع في ترجمة فيديوهات تيدكس وبلا بلا بلا .. ويُخضع نفسه امام الجمهور للمحاسبة والنقاش .. دي حاجة ممتازة في حد ذاتها
محتاجين نحن نعرف زاتو نعيش مرحلة زي دي !
انتخاب ومساءلة ومتابعة ونقد ودعم ..
المجتمع المدني شبه مات عندنا أصلا !
بعدها بيجي الكلام عن برنامجه الإنتخابي شنو .. ودا سؤال مهم جدا
عشان ما يجي زول يخمنا باسم الدين والأخلاق وانتو ناس كويسين وما بعرف شنو
برنامجك الانتخابي تحديدا شنو
وكمان ما ننسى انو الدعم (الفيسبوكي) قد يكون خدّاع مقارنة بالواقع السوداني إذا ما وضعنا في حسابنا انو السودان ما الخرطوم بس !
في القرى والأرياف اللي ما عندها علاقة بالتكنولوجيا وأحلامها في الحياة بسيطة خالص .. بل وحتى ممكن يتوجسوا خيفة من (الود المغترب) ده !
في لغة خطاب لازم يتم توجيهها لشرائح معينة في المجتمع مختلفة تماما في اهتماماتها عننا .. ويكون عند المرشح رؤية واضحة لكيف ممكن يخدمهم لو بقى رئيس !
الواحد يتمنى انو التاريخ ما يعيد نفسه .. لمن المتعلمين وقت الإستقلال اتحالفوا مع الطوائف الدينية فقط لضمان (الدعم الشعبي) الكبير .. وفي النهاية استحوذت الطائفة على الحزب !
كفاية اللي عشناه من الإستقلال لحدي الآن ..
في شعب بيسكن أرض .. مسكون سؤال الهوية (من أنا) .. والأرض دي ما بقت وطن زي العالمين لسة ..
في وطن محتاج إعادة بناء بالكامل ..
دا لو لحقناه قبل ما ينهار ..
#حملة_الأمل
بقلم
مبارك جعفر الحسن
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة
انا شخصيا حانتخبو بعيدا عن برنامجه…اكيد احسن من سياسيي الستينيات ديلك..
يشهد الله الزول ده عاشرته في كوريا الجنوبية سنين ,,, زول عندو جنون العظمة
ما يصلح الا رئيس جهمورية نفسه
الأمل إن شاء الله موجود والقادم بإذن الله أحسن لأن الشعب السودانى صبر صبرا” يستحق أن يسجل فى موقع جينيس
شعب صبر على البلاء والمحن وسوء الحكام وفساد القيادة من الغفير إلى الرئيس
إذا كان الرئيس لا يرى ولا يسمع ولا يعرف حال البلد والمواطن فهذا لا يستحق أن يكون رئيس
كلكم راعى وكلكم مسئول عن رعيته
والله إنها ندامة وخزىء يوم لا ينفع مال ولا بنون
يتبع لحزب حركة الاصلاح الآن وحركة الأصلاح الآن يرأسها صلاح العتباني وصلاح العتباني شريك أصيل للترابي وبقية الشلة في تأسيس حزب الجبهة الاسلامية الذي استولة على الحكم عام 1989م يعني من دقنو وأفتلو مشى بشير جا بشير في شكل جديد يعني من خازوق لخازوق نفس الأفكار والأيدولوجيات بس بأشخاص ووجوه مختلفة.