أم وضاح

قوموا إلى أعمالكم يرحمكم الله


لا شك أن الأيام الماضيات بكل ما فيها من توتر وشحن وترقب وحالة انتباه لكل الأجهزة الأمنية، أنها قد خصمت كثيراً من ناتج الحراك الطبيعي للدولة وانشغل الجميع على المستوى الرسمي والشعبي بهذه الحالة الاستثنائية مما خصم الكثير جداً من الوقت والجهد والمال بطبيعة الحال، وهذا في مجمله سيؤثر على مجمل المشهد الاقتصادي الذي هو أصلاً ما ناقص والفيهو مكفيهو، وبالتالي أعتقد أن الحكومة عليها أن تعود وبشكل سريع إلى محاولة تعويض الأيام التي ضاعت في الأخذ والرد، والشد والجذب، وهذا الفعل هو مسؤوليتها بالدرجة الأولى، لأنها هي المسؤولة عن أسباب الحراك الشعبي والناس ما خرجت للشارع إلا لأن الحكومة أخفقت في أهم الملفات وهو الملف الاقتصادي المتصل مباشرة بأحوال الناس، والآن الحكومة مسؤولة عن لملمة هذه الجراح أو على الأقل عليها أن تعمل على تضميدها وتبدأ في معالجات للواقع المأزوم وتعويض الخسارة التي تكبدتها الخزينة العامة في الأيام الماضيات، وهي خسارة ستضاف إلى خسائر الملف الاقتصادي، مما يشي بأن توتر الأوضاع الداخلية وعدم الاستقرار الأمني والاجتماعي سيعمق الأزمة ولن يسهم في حلها بأي حال من الأحوال ليكون الحل والفيصل والبديل فقط صندوق الانتخابات بشكل راقٍ ومحترم وسلس، وأعتقد أن جموع المحتجين الذين نظموا صفوفهم وخرجوا للتظاهر ما ح يغلبوا في أن يجمعوا صفوفهم ويختاروا من يشاءون عبر انتخاب حر وديمقراطي، والقوى المعارضة نفسها التي تدعي أن لها وجوداً وتأثيراً على الشارع، عليها أن تستعد ومنذ الآن لانتخابات ٢٠٢٠، وحق لها أن تقدم من تجتمع وتتفق عليه رئيساً في مواجهة مرشح الحزب الحاكم الذي هو الآخر أحسب أنه لا بد أن يغير تكتيكه للانتخابات القادمة، لأن موجة الاحتجاجات العالية خصمت منه الكثير جداً، وعليه مراجعة حساباته والتفكير بشكل منفتح بعيداً عن فكرة ترسخت لدى منسوبي حزب الحكومة أنهم قفلوا شفرة الشارع السوداني في علبة ورموها في البحر، وبالتالي على الحزب الحاكم أن يطرح نفسه من جديد والشهور القادمة يمكن أن يستفيد منها في استعادة بعض من أراضيه بثورة إصلاح حقيقية وجبارة، أما أحزاب المعارضة، فمسألة الهتافية ورفع شعارات الحرية والانعتاق وما إلى ذلك من الشعارات البراقة، فهي ليست كافية لإقناع الناخب السوداني، عليهم أن يتنزلوا إلى واقعه ببرامج وإستراتيجيات وأفكار وأشخاص هم وحدهم الفيصل بين الجد واللعب في انتخابات لا أظنها ستكون سهلة على كلا الطرفين والشارع السوداني دائماً يدخر المفاجآت ولديه القدرة على صناعة خيار ثالث.
في كل الأحوال أرجو أن تكون هذه الاحتجاجات بداية لمرحلة جديدة في تاريخ هذه البلاد، لأن المهر الذي دفع فيها، مهر غالٍ وهو دماء شباب خرجوا إلى الشارع ليست لهم من مغانم أو مصالح سوى رفعة هذا الوطن واستقراره، بالله عليكم قوموا جميعاً إلى أعمالكم يرحمكم الله.

}كلمة عزيزة
منذ أن جاء الفريق “أبو شنب” إلى محلية أم درمان، والرجل كما النحلة لا يهدأ، صحيح أن الحريق المفاجئ لسوق أم درمان الكبير شغله وربما عطل كثيراً من المفاجآت التي كان يدخرها، لكن لزاماً علينا أن نقول للسيد المعتمد إن شارع النيل أم درمان، يحتاج لعمل كبير وجبار لا سيما وهو الشارع الرئيسي لمؤسسات إعلامية ضخمة في المدينة الكبيرة، خاصة سيدي المعتمد العربات الصغيرة التي تقف على طول الطريق تحمل الخضر والفواكه لعرضها في الشارع مما يتسبب في زحام مروري واختناق لا لزوم له، إضافة إلى أنه يخصم من المظهر السياحي والحضاري لشارع مهم كشارع النيل، فهل تقوم باتخاذ إجراء حاسم وقرار فوري بمنع هذه العربات من ممارسة هذه الفوضى بشكل حاسم ونهائي؟

}كلمة أعز
لا أرى أي داعٍ أو مبرر لتسيير موكب تأييد للحكومة أو للرئيس كما أعلن عنه في اليومين الماضيين، مثل هذه الأفعال تقسم البلد إلى فريقين أو إلى خصمين، نحن لسنا في حالة تحدٍ ولا معركة، نحن بصدد معالجة مشاكل وطن، الحكومة نفسها اعترفت بها، بالله عليكم قليل من الحكمة، قليل من الهدوء.

أم وضاح – عز الكلام
صحيفة المجهر السياسي


‫9 تعليقات

  1. تقوم قيامتك بركة الله ، هو لو في عمل ولا انتاج كان وصلنا للحال دا
    انتخابات شنو البنتظروها الناس
    اذا كان الناس تطالب بحقوقا سلمي بضربو نار واساتذة اعرق جامعة اعتقلوهم من دارهم مش من الشارع كمان عشان رافعين شعارات ومطالب كفلا ليهم الدستور ، الدستور البنص انه البشير ما يترشح في 2020
    كمان قالت ما تقسمو البلد البلد اتقسمت زمااان وحسا الباقي قعد يضيع بسبب امثالك لأنه كل الشعب فقد أدنى أمل في خير من الناس ديل وانتو مصريييييييييين تقعدوهم يكملو مسيرة التدمير

  2. انتخابات منو يا مرا يا مخرفة…هو اابلشير داير يعدل الدستور ما حيزور انتخابات…
    بطلي تلون يا حربويه اقيفي مع النظام عديل احسن ليك

  3. أتفق معاكي 100% يا أم وضاح..

    من ناحية الحكومة.. فالحكومة قصرت وبالغت عديييييييل كده في موضوع الازمة الاقتصادية وصفوف العيش والجاز والبنزين وحتي صفوف البنوك.. بالغت وشذت وقبيحة منها للدين.. لكن الان هم بدأوا يصلحوا الامور بفعل التظاهرات دي يعني الرسالة وصلت كما إعترفوا بأنفسهم.. هسع معظم الصفوف إختفت والعيش توفر بعد الحكومة زادت دعمه وكذلك البنزين وقريباً ستختفي صفوف البنوك وموضوع السيولة بالورقة النقدية الجديدة 100 جنيه خلال أسبوع أسبوعين من الان.. يعني الحكومة شغالة في حلول.. هي حلول أزمة مش حلول طبيعية يعني الحلول ذاتها حيكون ليها آثار ذي التضخم وغيره.. لكن في النهاية أهو ده حالنا.

    من ناحية المعارضة.. فالمعارضة نوعين.. النوع الاول هي الاحزاب المعارضة ودي ما عندها أفكار ولا برامج ولا زفت طين.. دي أحزاب طيور بس.. أحزاب هتافية ساي.. أحزاب لو مسكت البلد دي ح تخربها بالجد.. حتوصلنا سوريا وليبيا واليمن وفنزويلا كمان.. كل الاحزاب كده من الأمة بتاع المهدي وحتي اليسار والشيوعي.. كلهم طير × طير.. والطير تعريفه العلمي هو أنو لا يضع خطط ولا برامج لكنه يهتف ويكورك بس.. أما المعارضة التانية فهي الشعب.. المواطن الغلبان المغلوب أمره.. أنا وأنتي.. كلها كده تعبنا تعب الويل في 2018 دي تحديداً.. عشان كده الناس أحتجت وتظاهرت ووصلت صوتها للحكومة.. صوتها كان قوي جداً لدرجة الحريق والخراب.. أنا من ناس عطبرة وشاهد علي حريق دور المؤتمر الوطني والحكومة.. فالنتيجة هي أنو الحكومة سمعت وإعترفت بالمشكلة وبدأت فعلياً في تنفيذ الحلول.. أساساً من أول يوم طلعنا عشان العيشة بقت 3 جنيه.. ثاني يوم طوالي رجعوها 1 جنيه.. لكن.. لكن.. لكن.. إستمرار المظاهرات لحدي الان في بعض أحياء ومناطق الخرطوم وكل يوم يومين يطلعوا يكوركوا فده كلام غير سليم.. دي إستهتار بمصالح البلد.. المدارس قافلة.. الحياة العامة تأثرت.. ما ينفع كده.. والمشكلة أن المظاهرات دي كلها كرور ساي.. أيوة كرووووور.. شوية عشرات أو مئات من المتظاهرين.. شد وجذب ومناطحات.. ديل مسيسين بدرجة قف تامل.. ديل ما طلعوا عشان الوضع الاقتصادي.. ديل طلعوا عشان السياسة.. عشان التغيير.. وأنت يا شاطر ومنطط عينيك لمن تكون داير تغيير بالفوضي والمظاهرات يبقي أنت غير ديموقراطي بالمرة.. أنت زول خمجان ساي.. أنت جاري وراء الحركة الشعبية وزراعها الفيسبوكي الجديد المسمي تجمع المهنيين السودانيين.. عارفين مؤسسي التجمع ده بأسمائهم وكلهم حركة شعبية جناح الحلو الحاملين للسلاح.. ديل لا في الدستور ولا في القانون يحق ليهم التظاهر… المهم أنا متفق مع أم وضاح أنو المؤتمر الوطني مفروض ما يعمل المسيرة والمظاهرة المليونية دي في الساحة الخضراء بكرة.. أنا متفهم كلام أم وضاح أنو ده ممكن يفهم كأنو تقسيم للبلد وتحدي وووو.. لكن في ذات الوقت مع هؤلاء الرعاع الفوضجية مافي حل غير كده.. مافي حل غير نوضح ليهم أنو البشير ظل لـ 30 سنة ومازال حتي اليوم يتمتع بشعبية مليونية وليس هناك زعيم عربي أو أفريقي يتمتع بالشعبية بتاعة البشير.. وبالتالي.. لو هي بالديموقراطية والمنطق والعقل مفروض المتظاهرين يقيفوا ويشوفوا شغلة تانية.. اما لو بقت عناد وتحدي وغباوة فالحكومة لم تستخدم كل أسلحتها حتي الان .. حتي الان معظم من قبضوهم أطلقوا سراحهم في ذات اليوم بتعليمات البشير.. قال ما دايرين معتقلين سياسيين كتار.. حتي أساتذة جامعة الخرطوم الأفاضل تم إطلاق سراحهم بعد ساعات فقط.. لكن لو المتظاهرين مصرين علي الغباء والديكتاتورية والهرجلة ممكن نملأ السجون ذي مصر.. مصر فيها 20 ألف معتقل سياسي معتقلين منذ سنوات طويلة جداً.. السعودية كذلك فيها معتقلين بعشرات الالاف.. أثيوبيا قبل شهور أطلقوا سراح آلاف المعتقلين.. وهكذا.. السودان فيهو حرية ما تقدروا أساساً تتخيلوها.. هي حرية أكثر من اللازم كمان.. السودان في ظل حكم البشير لم يكن هناك أكثر من 100 سجين سياسي علي الاكثر.. وفي كتير من الاوقات يكون السودان خالي من المعتقلين السياسيين.. المهم.. المراهقين الطيور العاملين الفوضي والكواريك والفليق بالحجارة ديل لو دايرين الإعتقال ممكن يشرفوا في سجن كوبر كم سنة عشان يعرفوا أن الله حق.. رفعت الاقلام وجفت الصحف.

    1. حلول شنو يا متذاكي
      دي ياها بوخة المرقه بتاعت الصادق زاااتا دايرين يمرقو من الزنقه دي بس شهر واحد وتاني الازمات حترجع لانه دي كلها شغلة تلتيق وشحده من الخليج الاقتصاد ما بيمشي كدا يا استاذ انت ما عندك انتاج حقيقي داير تضحك على نفسك ولا على منو يا اخوي الناس بقت واعية وفاهمة كل حاجة
      قوم استحمى بالله جداده وهمانه سجن كوبر راجيك انت وامثالك يا حرامي

    2. يا Gasef.. أنا أصلاً ما بحب أعلق عشان ما أقع مع الجهلاء أمثالك..

      أولاً أنت كيف تصفني بالأستاذ وتاني تقول جدادة وهمانة وحرامي؟؟ علي الأقل أثبت علي حاجة واحدة لو عندك منطق أو موضوعية.

      ثانياً لو الحكومة رجعت الازمات بعد شهر يبقي أرجع إتظاهر تاني، لكن هسع وقف الفوضي دي لو عندك منطق.

      ثالثاً كل الدول من حولنا بما فيها مصر وأثيوبيا شغالة علي الشحدة والمعونات والمليارات الجاية من برة، فنحن ما الدولة الوحيدة في الشحدة.. والمهم نحن أقل ناس في المحيط بتاعنا بنشحد.. ما قاعدين نشحد كتير ولا قاعد تجينا قروش كتير.. حكومتك معتمدة علي ذاتها ولولا الحكومة دي أنا وأنت كنا بقينا شحادين بجد.. في الملاجئ.

      رابعاً: أمشي أتعلم منطق بعدين تعال صارعني أنا.. ناهيك عن الحكومة الأنت ماااااااا بتقدر عليها لأنها حكومة ضراعها قوي.

      1. اتفق معك اخي ان نلتزم ادب التعليق..
        ولكن يا اخي الدول التي ذكرتها شغالة شحدة لا تمتلك ما يمتلكه السودان من أراضي زراعية وماء .. او على الأقل السودان افضلها … فبالانتاج والأخلاق يقتدم السودان والملاحظ انعدام الاخلاق والإنتاج …

        ثانياً قولك ان i لولا الحكومة دي لكنا شحادين وفي الملاجيء؟؟؟ يا راجل اتق الله … صحيح ليس هنالك شحدة في الطرقات ولكن كل واحد عنده قريب خارج السودان فالتكافل موجود يا اخي ولو رجعتها لاصلها لوجدتها شحدة.. أما الملاجيء دي كثيرة والله فالذين يمسكون بزمام الامر هم من تسببوا في ذلك وليس العكس..

        يا اخي ما دمر هذا البلد الا سوء الاخلاق والسرقات واكل أموال الشعب بالباطل وتدمير المشاريع بدل تطويرها فما تشكر الراكوبة في الخريف اخي اسامه.

        تحياتي وودي

      2. والله انت الجهل يمشي على قدمين (استاذ) دي للتريقة لانك عامل فهيم وكلامك ما بقنع شافع وياريت فعلا ما تعلق تاني وتتعب نفسك ، انت لو تعرف منطق وموضوعية تقول قاعدين (نشحد شويه ما كتير) ههههههه ما بتخجل ؟ دولة زي السودان تشحد ولا مفروض يشحدو مننا ؟؟؟ بعدين انت مشيت اثيوبيا ولا تتكلم ساي الناس دي كلها عبرت ونحن كسيحين بسبب النظام الفاشل ومصر السيسي يشحد لأنه هم المعيننو رئيس وبصرفو عليهو يا استاذ (تاني) ثم تانيا نحن مالنا بيهم نحن ربنا ادانا اي شي في بلدنا بجبرنا على كدا شنو؟؟؟؟ حكومة ما قادرة تقوم بدورها تقول ما قدرت بس تجي كفاءات سودانية تدير البلد
        قال شنو لو الأزمات رجعت بعد شهر اتظاهر تاني هههههه والله انت ترفع الضغط
        30 سنة حاكمين ولسه ازماتنا عبارة عن عيش وبنزين وداوء وكاش وكهرباء وموية وصحة وتعليم يعني اساسيات الحياة
        ولا يوم تاني زول بصبر عليكم ليه مافي غيركم ولا البلد دي ماخدنها مقاولة او امكن ورثتوها من حبوبتكم
        #تسقط_بس
        لو هي اصلا دمقراطية ما بتحتاج ضراع شابكننا ضراعنا قوي وامرقو ضراعكم
        والله الشعب دا لسه بقول سلمية وما مرق ضراعو اخير تعيدو حساباتكم