عويس سعيد: واحدة من مشاكلنا .. إننا متصورين ذكاء شديد في قيادات ومنسوبي النظام السابق

واحدة من مشاكلنا .. إننا متصورين ذكاء شديد في قيادات ومنسوبي النظام السابق
مقتنعين أنهم أذكياء .. وبيخططوا لبعيد .. لدرجة أنه عديد الناس بتشك في الثورة ونجاحها لأنها شايفة أنه الحكومة مستحيل تكون انهارت رغم أسطوريتها المتوهمة !!
لما حصلت المفاصلة .. عديد الناس قالوا أنه المفاصلة مسرحية .. لأنه الناس ما عايزة تقتنع أنه النظام ده في حالة ضعف .. الحقيقة أنه حصلت مفاصلة لأنهم أصلا طالبي سلطة ومناصب وكل صراعاتهم حول المال والسلطة ..
–
لما عدد من الصحفيين أصحاب الخلفية الإسلامية يهاجموا النظام .. زي عثمان ميرغني والطاهر ساتي يطلعوا نفس الناس يقولوا أنه دي تمثيلية وأنه ديل جزء من النظام .. وأنهم متفقين على أداء الدور ده .. بدون ما يسألوا أنفسهم طيب النظام يستفيد شنو من تشويه صورته على يد إعلامييه ؟؟ .. وإعلامي زي عثمان ميرغني يستفيد شنو لما يعتقلوه ويضربوه ويوقفوا جريدته ويخسروه أموال طائلة ؟؟
–
حتى ناس زي عثمان ذو النون .. رغم الخلاف حوله .. هو واحد من الناس اللي ساهمت في الحراك ده .. كتيرين كانوا بيرددوا أنه ده مجرد أمنجي !! .. طيب جهاز الأمن ليه يخلي شخص منتسب ليهو يحمس الناس للخروج ضد النظام ؟؟
–
كان في هالة من الغموض بتحيط بشخصيات زي صلاح قوش .. الناس فاكراه فلتة زمانه الزمن ده كله .. جا بأول تصريح أثبت أنه مجرد ((طيرة)) حصل على منصبه في زمن أغبر .. صلاح قوش مجرد مغفل .. يقود مجموعة مغفلين في جهاز الخراب اللاوطني .. رغم الصرف المهول عليهم عجزوا عن تطوير مهارة الكتابة عند الجداد الألكتروني ناهيك عن المهمات الأكبر ..
–
حسين خوجلي .. اللي كنا فاكرينه حكيم زمانه .. دخل معركة مع الثوار في الوقت اللي كانت الثورة ماشية تنتصر .. لو كان عنده أدنى عقل ما كان راهن على نظام في أخريات أيامه .. لكنه أصر يظهر وبطريقة مضحكة .. والنتيجة أنه الصورة المرسومة ليهو تتمسح بأستيكة .. ويظهر للناس انه مجرد شخص عبيط وأهبل ..
–
الحاصل هسه ده إمتداد لنفس الفكرة الفاتت .. الناس فاكرة الإنقلاب مجرد تمثيلية .. وأنه البشير أتفق مع فلان وعلان .. في حين أنه الفبشير اللي كلنا عرفناه مستحيل يترك السلطة من أجل حركة إسلامية أو غيرها .. هو كان مستعد يبيع حجة هدية عشان يستمر سنة تانية في السلطة .. كونه يترك السلطة معناه انه مرغم ..
–
هم ما كانوا أذكياء .. ولا عملوا دولة عميقة يتخاف منها .. الحاصل الفترة الفاتت ما كان شغل شبكات مصالح إنما نتيجة فوضى .. الفساد ما كان ممنهج بقدر ما أنه كان نتاج أنه الشغلة جاطت .. في حالات كتيرة هم كانوا متحيرين زيهم زي باقي الشعب .. ومافاهمين يعملوا شنو أو يسدوها كيف .. في الغالب كلهم حاليا بيفكرو في تهريب الأموال للخارج .. أو بيع الأراضي عشان يطلعوا المصاريف .. اللصوص الأغبياء اللي حتى ما عملوا إستثمار ناجح داخل أو خارج البلد ..
–
الخوف الزايد من عودتهم في رأيي ممكن يضر بالثورة .. تصويرهم أنهم أصحاب دهاء وفكر وتخطيط يجعلنا نديهم أكتر من حجمهم .. الخوف حاليا في رأيي أبدا ما من عودة فلول النظام السابق .. الخوف حاليا أننا نفشل في تجربتنا الوليدة فتكون السلطة مرة تانية فريسة للطامعين ..
–
في مقولة بتقول ((عندما تطيل النظر للجحيم .. يبدأ الجحيم في النظر إليك))
الخوف الزايد والهواجس الزايدة والشكوك الزايدة هدامة وضارة .. وتصوير عدوك أنه داهية لا يقهر من أسباب هزيمتك أمامه ومن أسباب تشجيعه على محاربتك .. وده يمكن السبب في إستمرار نظام قوامه عدد من الحمقى لمدة 30 سنة ..

⁦✍️⁩ عويس سعيد أبوزيد
فيسبوك