يوم المطاميس

تلقى الواحد متردد يسوي شي في يوم معين.. مثلا يوم اللحد يقول ليك والله يوم اللحد دا انا مكجنو وما بسوي فيهو أي حاجة.. أقعد أربِّع إيديا.. لحدي ما يمشي.. لانو أي حاجة سويتها يوم اللحد ما نجحت.. وبعدين اللحد دا يوم شوم.. أول ماهية صرفتها يوم اللحد ونشولوها مني.. النتيجة حقت الشهادة كانت يوم اللحد وسقطت فيها.. والحرامي نطّ وسرق التلفزيون والرسيفر الجبتهن جداااااد يوم اللحد.. ويا مؤمن يا مصدق من يوم الجمعة أشيل هم للحد واخاف تقع فيهو نصيبة.

الأيام كلها واحد.. واليوم هو دوران الأرض حول نفسها.. واليوم مدتو تلاتة وعشرين ساعة وستة وخمسين دقيقة وأربعة ثواني.. أي يوم من الأيام من السبت للجمعة..

قالو العرب زمان ما قسمت الأسبوع لأيام وما كانت بتعرف الاسماء الحسي دي (السبت الأحد الاثنين الثلاثاء الأربعاء الخميس الجمعة).. كانت بتقسم الأيام بشكل القمرا كل تلاتة يوم من أيام القمرا عندها اسم.. التلاتة الأوائل اسمها الغُرر, البعدها النُفُل.. والبعدها التُسع.. والبعدها العُشُر.. والبعدها البيِّض.. والبعدها اسمها الدُرُع.. والبعدها حنادس.. والبعدها دُهُم.. والبعدها دآدئ.. والبعدها محاق.. ولي حسي في اسماء منهن ماشات معانا زي التلاتة البيِّض والتاسوعة.. والتاسوعة هي مقصود بيها تسعة من ذي الحجة وهي تاسوعة عيد الضحية لكن بقت تتقال للعيدين الضحية ورمضان.. بعد كدي قالوا النضم دا ما يبقى سموها كل يوم بيومو.. بدل اللخبطة والخربطة الممكن تبقى.. أها قاموا قسموها لسبعة أيام وسموها الأسامي التحت دي وقصاد كل يوم من أيامنا البنعرفها اسم :

الأحد = أول

الاتنين= أهْوَن

الثلاتاء= جُبّار

الأربعاء= دُبّار

الخميس= مؤنس

الجمعة= عرُبة

أما الأسماء الحسي دي من الاحد لحدي الخميس فماخودة من العدد واحد اتنين تلاتة اربعة خمسة.. والجمعة من الجمع واجتماع وكانوا في الجاهلية بيجتمعو فيها.. والسبت من السبات أو الانقطاع بتتقطع عندو أيام الأسبوع.. وتبدا تاني من واحد (اللحد).. حق زولنا الفي بداية المقال وقال مكجنو.. وشوفوا يوم الخميس من زمان يوم مطمايس “الخميس صفقة ورقيص للمطاميس.. اسمو مؤنس(من ونسة.. ونسة شديدة).. !!