فيسبوك

حملة شعبية على فيسبوك لمقاطعة منتجات شركات اسامة داؤود


أسامة داؤود زمن البشير لمن الدولار حصل قريب 100 زاد أسعار منتجاته زاد سعر الدقيق من 25 لي 40 العملة نزلت لي 76 ما نزل أسعاره تاني لمن الدولار زاد من 76 لي 100 برضه رفع أسعار منتجاته خصوصا الدقيق من 40 لي 60 يعني باعتبار سعر الدولار ثابت في المية زاد 20 جنيه بدون أي داعي.

حاليا رفع سعر منتجاته مرتين خلال الأيام الفاتت والدقيق وصل قرابة ال80 جنيه ده جشع مبالغ فيه في سلع إستراتيجية.
السلعة التانية اللبن أسامة داؤود عشان يشغل مصنع كابو جاب كمية بسيطة من الأبقار ما بتكفي لتشغيل المصنع عشان كده إتعاقد مع معظم مزارع الأبقار بقى يشتري إنتاجهم بالكامل.
الخطير انه بديهم العلف “كافي” وكل فترة وفترة برفع سعر العلف رغم إنه معظم تركيبته من الردة البحصل عليها كمنتج ثانوي من طحن القمح المدعوم.
رفع سعر اللبن على المواطنين المساكين مسؤول هو منه لدرجة وصل قرى الجزيرة بقى يشتري اللبن منهم.
المصيبة إنه كل شركات المواد الغذائية بتتبعه كل ما هو يزيد هم يزيدوا يعني متحكم في كامل إقتصاد البلد وسبب أساسي للجشع.

الآن كل المطلوب من الناس مقاطعة منتج واحد لي أسامة داؤود “زبادي كابو” لمدة إسبوع واحد فقط عشان يعرف إنه نحن رافضين لجشعه وإستغلاليته وعشان نكسر دائرة الزيادة بغير مبرر دي.

يا ريت تدعموا حملة المقاطعة وتشاركوا الهاشتاق

#مقاطعة_كابو
#مقاطعة_منتجات_دال
#من4إبريل_حتى9إبريل
#معاً_لمحاربةة_تجار_الجشع..✌
انسخ وانشر
#منقول من صفحات فيسبوك


‫2 تعليقات

  1. هذا الشخص لا يهمه السودان والا ألسودانين..كل منتجاته تذهب لدولة قطر هو وهم لا يريدون الخير لنا..لا تهمه المقاطعة لان المنتج يذهب إلى قطر ..على الاعلام والحكومة مسائلته اذا كان الاعلام والحكومة يهمهم السودان والمواطن السوداني.

  2. حل المقاطعة فعال جدا، وهناك شركات ومنتجات بديلة في السوق وذات جودة في رأيي أفضل بكثير من منتجات مصانع دال.
    هل تعلم ان منتجات دال كالزبادي والمش ومعظم أصناف الحليب مضاف اليها لبن بودرة وليست حليب صافي %100 !