فيسبوك

نزار العقيلي: (عشان نفهم بس)


تعال نفترض انك مدير مباحث و جاكم بلاغ بتاع جريمة قتل و المشتبه فيهم ممكن يكونوا سافرو الولايات ، السؤال هنا ، من وين ح تجيب قروش بي سرعة عشان الأتيام بتاعتك تتحرك للولايات و تتحرك لمسرح الحادث ، من وين ح تجيب قروش للمصادر ؟؟
طيب خليك من جريمة القتل ، نفترض انو في معلومات عن شبكة مخدرات او معلومات عن كمية دقيق و جاز في طريقها للتهريب بره البلد او معلومات لخلية بتخطط لاحداث فوضى في المنطقة ، السؤال ، من وين ح تجيب قروش لأتيامك عشان تشتغل و تجمع المعلومات ، قروش إسكراتشات للرصيد و قروش مصادر و قروش لنثريات الاتيام و إعاشتهم و قروش لوقود العربات ، من وين تجيب القروش ؟؟
كذلك الحال بالنسبة للجيش و الامن ، و دي مؤسسات معظم عملياتها العسكرية و الامنية بتحتاج قروش كاااش حااااضرة و سريعة و ما بتستحمل اي تأخير و انت ك قائد ما عندك قروش ح تتصرف كيف ؟؟
دي كلها مبااالغ خرااااااافية خارج ميزانيتك المعروفة ما عندها علاقة بي بند المرتبات و لا بند التسيير ، اها ح تعمل شنو ؟؟
دي كلها مبالغ ما بتقدر تحدد ليها سقف عشان وزارة المالية تتفق مع وزارتك و تديك ليهو شهريا” لانو انت ما بتعرف الراجيك الشهر الجاي شنو ؟؟
هل وزارة الداخلية ح تكتب تقرير لوزارة المالية تطلب فيهو حوجة عاجلة لمبلغ عملية امنية ؟؟
ولا الجيش ح ينتظر وزارة المالية تصدق ليهم مبلغ لعملية عسكرية او استخباراتية ؟؟؟
هل منصرفات العمليات الامنية و الاستخباراتية بتقدر تراجعها وزارة المالية ؟؟؟
عشان كده في كل دول العالم بنلقى انو المؤسسات العسكرية و الامنية و الشرطية في امريكا و فرنسا والهند و مصر و ثيوبيا و حتى جيبوتي عندها إستثمارات خاصة بيها بتتم مراجعة اموالها داخليا” .
خلونا نفترض انو ناس الجيش و الشرطة ديل طلعوا غنم ساكت و سلمو حمدوك كل شركاتهم الاستثمارية ، انت عارف انو المواطن هو اول زول ح يتضرر ؟؟
عاااادي جدا تسمع انو ناس مكافحة التهريب عندهم مأمورية عاجلة ليها اسبوع ما قادرة تطلع عشان الشيك بتاعها ما طلع من وزارة المالية .
عادي جدا ممكن بلاغ بتاع جريمة كبيرة تقعد عينات الفحص بتاعتو في المعامل الجنائية لامن تتلف لانو وزارة المالية ما صدقت ليهم قروش يشتروا بيها مواد الإختبارات المعملية
يااااخ المؤسسات العسكرية و الامنية دي رغم كل اموال إستثماراتهم الكبيرة دي بنلقى عندهم تساقط في القوة و الأداء بتاعهم ضعيف لضعف الامكانيات و الموارد
فكيف ح يكون الحال لامن وزارة المالية تسيطر على قروشهم ؟؟
و في الحقيقة مشكلتنا الاقتصادية ما بسبب شركات المؤسسات العسكرية ، مشكلتنا واااضحة و معروفة لحمدوك و جماعته لكن عاملين رايحين ، مشكلتنا في شركات الرأسمالية الكباااااار المتحكمين فعلا في الدولار و في الاقتصاد و كلهم خمسة ولا ستة رجال اعمال ماااافي زول بيقدر يعاين ليهم ساي
هسه بكرة دي لو الجيش سلم حمدوك كل شركاتهم و مشاريعهم الاستثمارية هل حمدوك و هبه ح يقدرو يدفعو قروش نثريات الاستعداد الشهري بس للبوليس الحارسهم ده ؟؟؟
خليكم من نثريات الاستعداد
ح يقدروا يدفعوا إلتزامات الخدمات الاجتماعية بتاعت القوات دي ؟؟
حمدوك بيلعب لعب والله بعقولنا .
نزار العقيلي



تعليق واحد

  1. حمدووك راضع من ثدي الشيوعية الاشتراكية لما ينعصر معرووف نظرية علي وعلي أعدائي.

    شابك الناس نعمل في تناغم والله من اول يوم عرفة العمبوووك دا كيسوا فاضي.
    صلاح قوش عينوا وعارف مقدرات الرجل ضعيفة. وقوش عارف العمبوووك لا يقدم ولا يؤخر عبارة عن لستك ازبير و مبنشر.لا فائدة منه.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *