امير عبدالماجد: قلنا مليون مرة ان حمدوك فاشل

عندما طرح الحلو في جوبا الحكم الذاتي قال انه البديل عن العلمانية… يعني لو ما اديتونا العلمانية نمشي للحكم الذاتي وحتي هذه اعتبرها كثيرون مزايدات ورفع لسقف التفاوض.. ورفضها الوفد المفاوض لانها مطالب خطيرة وهو وفد يمثل حكومة انتقالية وليست منتخبة.. ولايملك حق الموافقة علي مثل هذه المطالب ووقع الاتفاق مع الثورية علي علاته بحثا عن مايمكن تسميته بالانجاز.. عايزين يقولوا المهم حققنا اتفاق سلام.. مكسب للبلد خسارة مامهم المهم عملناهو.. الامور مع الحلو كان واضح انها مابتمشي لانو السقف كان اما علمانية ودي حاتدخلنا في متاهة او حكم ذاتي.. يعني الموضوع ماعندو علاقة بي حميدتي رئيس الوفد او لا.. الموضوع عندو علاقة بي مطالب الحلو المامعقولة.. لانو ماممكن نرهن مستقبل البلد للحلو.. في الوقت ده ضربت في راس حمدوك يعمل حركة يظهر بيها كبطل سلام.. ركب الطيارة مشي اثيوبيا قابل الحلو قال ليهو عايز شنو… قال ليهو علمانية وحكم ذاتي.. قال ليهو ابشر.. اديناك الاتنين.. صدق الحلو ذاتو يكون لي هسي مامصدق… الراجل اداهو حاجة في التفوض والمنطق مستحيله اداها ليهو في خمسة دقائق.. ده زول مسؤول ده.. الظريف في الموضوع انو ادانا خازوق وادي اتفاق جوبا ذاتو خازوق لانو الحلو وعرمان وعقار مابتلاقو.. وديل الان بفتكروا الحلو حقق انتصار علي حسابهم… الفشلوا يختوهو في طاولة التفاوض الحلو مش ختاهو الحلو جابو.. شفت كيف.. ومايقولوا ليك ده اتفاق مبادئ ساي لانو اتفاق المبادئ بحدد الخطوات الجاية اعترفنا الان بان البلد علمانية وان المنطقتين عندهن حكم ذاتي.. الاتفاق النهائي حايجي يقنن ده ويفصلوو.. يعني اتفاق المبادئ دستور للاتفاق النهائي وعندكم اتفاق سد النهضة.. مشكلتنا فيهو انو نحنا قفلنا الباب وقفلنا روحنا لما وقعنا اتفاق المبادئ 2015 بغض النطر الوقعو منو.. في النهاية السودان هو المتضرر.. الان اتورطنا في اتفاق جوبا مع الثورية والاخ حمدوك ورطنا الان في اتفاق مع الحلو اداهو فيهو اعتراف مايحلم بيهو.. قلنا مليون مرة ان حمدوك فاشل وانه السبب الرئيسي للفشل الذي نعانيه الان والانهيار الذي وقع علي راسنا.. النظام السابق كان كارثي لكن حمدوك برايي لايقل عنه.. رجل كارثي بمعني الكلمة.

امير عبدالماجد