فيسبوك

موظف حكومي في السودان يشتكي: مرتبي 11 ألف جنيه وتكلفة المواصلات للوصول لمكان عملي للشهر 10 ألف جنيه


شي من الجدية.. المركزية الثالثة المغتربين والمهاجرين ستنهار قريبا..
نعم ستنهار مثلما انهارت مركزية الأطباء التي ذبحها اكرم ثم من بعدها مركز جامعة الخرطوم التي حطمت قدسيتها فدوى.
الباقي امدرمان فقط..😁
القاسم المشترك بين المركزيات الأربعة هو الصلف والعجرفة، والاعتداد والانفراد بالقرار ..
لماذا ستنهار مركزية المغربين والمهاجرين!؟
بسبب القرارات غير السليمة التي يتخذها ممثليهم في حكومة الفترة الانتقالية بدأ من رئيس مجلس الوزراء.. مرورا بكل طاقمه الوافد ..
يبدوا واضحا أن هنالك انفصال وانفصام بين المجتمع وقادته الجدد.. ويبدو أن القادة الجدد متنازعين ما بين المستوى العالي للترابط الأسرى والتعايش الاجتماعي وانفتاح المجتمع والثقة العالية بين مكوناته من جهة.. وما بين اسلوب الحياة المريح المتقدم والمتطور في البلدان التي هاجروا إليها واغتربوا فيها..
عشان كده بحاولوا يعملوا ليهم حاجة هجين.. حنينة واسرية ومترابطة وفي نفس الوقت متقدمة ومتطورة بأسلوب حياة عصري..
عاوزين يعملوا الكلام ده رب كده..
ينوموا بالليل يصحوا الصباح يلقوا العالم العاوزنة قام..!!
وفي سبيل ذلك بتخذوا في قرارات هبتلي غير مدروسة.. أو درست وقتلت بحثا في زمان آخر ومكان آخر واناس آخرين..
قرارات نبعت من ثقافات وبيئات أخرى لذلك نجحت.. وهم يعتقدون أنها ناجحة عشان اتخذت فقط.. ومفروض تنجح في أي حتة تانية.. ولو فشلت السبب في فشلها هو انسان تلك المنطقة الجديدة..
وغلطان العمود 🤣
المهم اتضح أن أصحاب الدرجات العليا والخبرات الكبيرة في مجتمعات أخرى.. لا يصلحون بشهاداتهم تلك وخبراتهم هذه أن يديروا لجنه فريق رابطة بعد تمرين سخن لجمع شلن العقوبة وريال آخر الشهر..
هذا لا يعني أنهم غير جيدين بالمرة..
لكنهم بكل تأكيد انهم كذلك بالنسبة لحالة السودان الان في هذا المكان وهذا التوقيت..
وده السبب البخلي حميدتي رغما عن اللغط والاتهام بقتل الناس في دارفور والاعتصام.. تصريحاته الأقرب لجموع الناس والأكثر تقبلا وبتشبهنا.. لغةً ومضمونا.
سيفشل الوافدون الجدد لا محالة لأنهم متنازعين متازمين ومشتتين بين الحنية واللايف استايل..
عاوزين حاجة فيها حنية قرية فنقوقة بشمال كردفان ولايف استايل فلاديفيا.!
وممكن الكلام ده يحصل.. لكن ما هسع الان.. ولا بطريقتهم دي.
بالجملة كده..
بعد زيادة البنزين مواصلات الثورة بالشنقيطي السوق العربي بقت بالصباح بي ١٥٠ جنيه وبعد المغرب بي ٢٥٠ جنيه
ومواصلات النيلين الصينية بري بقت بي ٣٠ جنيه ماشي جاي ٦٠ جنيه
يعني عشان امشي الشغل ساااي عاوزي لي ٤٦٠ جنيه يوميا.. ده من غير فطور.. وكمان اول ما اركب الحافلة اغطي راسي بالكنبة القدامى عشان ما اشوف زول بعرفو.
المهم مجموع قروش المواصلات ٤٦٠ x ٢٢ يوم = 10.120
والمرتب ١١ الف وشوية
!!!
بالتالي الزول الاتخذ قرار رفع الدعم من الوقود ده عايش في واقع تاني غير واقع البلد دي وبتخذ قراراته على هذا الأساس..
لكن صدقوني حا تطرشق ليه في وشو!!
حتى لو طبع مع الاسباط* ذات نفسهم موش مع إسرائيل المسكينة دي
_______
* الأسباط هم: روبين، وشمعون، ويهوذا، ويساكار، وزبولون، وبنيامين، ودان، ونفتالى، وجاد وأشير، واثنان منهم أبناء سيدنا يوسف عليه السلام منشى وإفرائيم، وقد كان أكثر ما عرف عن الأسباط الإيمان القوى بالله تعالى والصلاح

بقلم
وليد محمد المبارك



‫2 تعليقات

    1. الظاهر هو مادسي حاجة من ايام الراحات لكن الظاهر انت الجداد ادوك حاجة تصبرك
      يا سوداني اصيل (واشك في ذلك). لانك خليت اصل الموضوع وانه بالحساب الاسعار
      الجديدة غير منطقية هذا طرح اصل المشكلة , فإن كنت غير ذلك كان الواجب عليك ان
      تسهم بحل او نصيحة او حتى دعوة بان يفرجها الكريم من فضله.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *