نزار العقيلي: (الشرطة ح تختفي فجأة)

لو في زول اتبرع لينا و عمل كاميرا خفية يظهر فيها زول منتحل صفة رجل شرطة و يقوم يوقف بتاع كارو و يوقف بتاع ورنيش و جزار و سواق ركشة و يطلب منهم انو يمشوا معاهو قسم الشرطة تاكدوا انو الشريحة دي من المجتمع ح تحترم الشرطي و تمشي معاهو القسم عشان تشوف الحاصل شنو بدون تذمر او اعتراض .
و بالمقابل كمان يعمل نفس الحركة مع دكتور و مهندس او اي زول مرطب سايق ليهو عربية فخمة و يلا اتفرجوا على كمية التعالى و الاستفزاز و التنمر و الرفض .
ح يسألوا الشرطي اسئلة منكر و نكير ، ليييه عملنا شنو ؟؟ وين امر القبض بتاعك ؟؟ و الاشتكانا منو ؟؟؟ و انت ما عارفنا احنا منو ؟؟ والله انا افصلك ، و هكذا .
اوعك تفتكر انو الشريحة الاولى شريحة خوافة عشان كده انصاعت لتوجيهات الشرطي ، ابدا والله ، بس الشريحة الاولى دي شريحة عندها درجة عالية جدا من الوعي و المعرفة ، دي شريحة الناس البتفهم و ما بتحفظ ، دي شريحة عارفة كويس انو الشرطي ده بنفذ تعليمات و انو القانون بطلب الانصياع للشرطة و بمنح الشرطي حق توقيفك و استجوابك استجواب اولي و انو القانون بخول للشرطي ده انو يسوقك للقسم و يقدمك للضابط الاعلى او وكيل النيابة او القاضي ، دي شريحة عااارفة كويس انو الشرطي ده ممكن يكون جاي ينفذ تعليمات احضارهم بس و انو ممكن ما يكون عندو خلفية عن اسباب استدعائهم .
في كل الدنيا من امريكا لحدي الصومال و من روسيا لحدي اليابان لو وقفك شرطي و طلب منك انك تمشي معاهو القسم ما عندك حق انك تتكلم معاهو ابدا” ولا حتى تناقشوا او تسألو عن السبب و اي كلام يمرق منك يعتبر جنحة تعاقب عليها و تتخذ ضدك ، إلا عندنا في كوكب السودان في ناس شايفة انها اكبر من القانون و انها بتعرف حقوقها كويس في حين انو الحقيقة هم اكبر ناس جاهلة جهل شديد جدا” .
البوليس في السودان بالرغم من ضعف رواتبهم و ضعف امكانياتهم و سوء بيئة العمل عندهم و ضعف تدريبهم إلا انهم متفوقين على اعظم و اغنى الدول من ناحية الشجاعة و البسالة و الذكاء و قادرين انهم يحافظوا على النظام العام في ظل كل الظروف الصعبة جدا جدا لكن اذا استمرت موجات السخرية و التنمر و الإساءة تجاههم بالصورة الشايفنها دي تاكدوا انكم ح تصحوا في يوم من الايام ما تلقوا ليكم شرطة لا في الشارع ولا في القسم .
نزار العقيلي