بابكر سلك

وطنا الباسمك كتبنا ورطنا


] أحبك.
] أحبك ياوطن وأنت فرحان ومنتصر.
] أحبك وأملك في شمس بكرة الطالعة كبير .
] كبير برغم الأحن والمحن والفتن.
] برغم جنيهك الدخل الإنعاش .
] برغم العيش الحير الناس.
] برغم العدم وبرغم الكاش.
] لأول مرة الكاش يكتر النقاش.
] لأنو الكاش ماعاد هو الكاش.
] والباش ماعاد زولاً باش.
] برغم أمل الأوباش .
] أحبك ياوطن لأنك مأمل شديد .
] برانا غلبنا غانا.
] بلغت الروح الحلقوم قبل هدف النصر من فرط الإفراط في ضياع فرص مضمونة.
] ولكن الوطن كان على موعد مع النصر.
] والنصر كان على موعد مع (الغربال).
] والغربال كان على موعد مع عكسية رمضان.
] ونحنا بنلعب للسودان.
] لا لجماعة ولا لكيان.
] لازم يسود علم السودان.
] والجهوية الإنتمائية والقبلية الرياضية كانت أهم أسباب تخلف الرياضة حقتنا.
] موش الرياضة وبس.
] القبلية والجهوية هن أس بلاء الإبتلاء المحطم البلد دي.
] ولأن الرياضة دورها المجتمعي رائد.
] فهي ليست غاية .
] ولكنها وسيلة لتحقيق أهداف ومصالح مجتمعية.
] يجب علي أهل الرياضة تبني القومية .
] ننسى كل الألوان أمام علم السودان.
] ننسى القبلية أمام مصلحة السودان .
] ننسى الجهوية عند بناء السودان.
] فالسوباط أقصد السودان غني جداً بثرواته.
] أسي الجاب سيرة السوباط شنو؟.
] المهم.
] الراحل قرنق قال سودانويتنا هي مخرجنا نحو بوابة الدول العظمى.
] وهي التي تميزنا.
] سودانويتنا تعني يا أخوانا.
] أن تذوب كل العناصر المكونة للوطن في قالب واحد ينتج أجمل وأحلى وأغلى وطن في الدنيا .
] إنتصر السودان برأسية (الغربال) نعم.
] ولكن بمجهود البقية .
] الكل شارك في النصر.
] وآن للوطن أن يفرح.
] ففي هذا النصر أمل في التأهل.
] والوطن العايش على الآمال غير وطننا ده ياتو وطن بس!.
] أيها الناس.
] كلامي ده ما للمشجعين بس.
] أعني به أيضاً ناس المنتخب.
] إداريين وفنيين.
] لأنو بعض مرات في حاجات كده بتشكك.
] ويقوم الزول يسرح بخيالو.
] ويقوم الخيال يفرقنا .
] أبقوا عشرة على المباديء.
] فالمباديء هي المباديء.
] المهم .
] سوداكال ماورانا الحاصل شنو.
] يكون ياربي هو ذاتو ماعارف الحاصل شنو.
] ولا يكون داير ينوم لينا في الخيرة حتي يجيب خبرنا؟.
] فمن غير الممكن أن تكون الأسئلة حائرة حتى بالنسبة لأعضاء المجلس .
] شخارم.
] أقصد خشارم.
] المدرب .
] موضوعو فيهو شنو؟.
] أيها الناس.
] رابطة قطر عودتنا على الإدهاش.
] وهاهي تقود أغلى عمليات المريخ في العهد الحديث.
] سجلها عامر.
] المعسكر الإعدادي والبايرن.
] علاج (الغربال) وصناعة نجم من جديد.
] ولسسسسة .
] تحية لتلك الرابطة العملاقة عبر رئيسها المشرف دوماً مولانا مجذوب.
] وتعظيم سلام للرابطة من خشم الباب للشيخة موزة.
] أيها الناس.
] إن تنصروا الله ينصركم.
] أها
] نجي لي شمارات والي الخرتوم .
] أنت جادي ياوالينا!.
] المدارس داير تفتحها لينا؟.
] لو مصر يا والينا.
] رسوم الدفن أعفيها لينا.
سلك كهربا
ننساك كيف والكلب قال بركة الماقرينا .
وإلى لقاء.
سلك

بابكر سلك – صحيفة الانتباهة



تعليق واحد

  1. انت ياسلك بدل يسو سلك التاني داك في مجلس السياده هسه ما انت اولى بي مجلس السياده …………..
    ولا شنو ياجماعه ؟؟؟؟؟؟ ولا السلوك اتلخبتت عليكم …
    السلك ده ياهو سلكنا زاتو لكن سلك التاني داك ماياهو سلكنا ……………

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *