فيسبوك

نزار العقيلي: (وجدي طرمبة)


> في اي منطقة في السودان ده بيكون فيها شخصية معروفة و مشهورة بي حب ( العضة )
> النوع البتلقاهو في اي مناسبة قاااعد منتظر صينية الاكل
> و النوع ده ما بيخجل و عينو قوية ممكن يدخل البيت توووووش يلقط باقي الاكل الفي الصواني
> لا بيعرف سماية ولا طهور ولا ظااار
> و في حلتنا كان في واحد اسمو ( طرمبة )
> اتذكرت شخصية ( طرمبة ) وانا بقراء في الاخبار تصريحات وجدي صالح عضو لجنة ازالة التمكين
> وجدي قال انهم بيجمعوا المعلومات من بيوت البكيات و الأعراس و خجل انو يكمل و يقول بيوت الظار و الجمبات
> زمان ناس المباحث بجمعوا معلوماتهم الجنائية من بيوت الدعارة و الجمبات و معلوماتهم الامنية من الكليات و الجامعات و الداخليات و المساجد
> لكن معلومات من بيوت البكيات و الاعراس دي ما لاقتنا
> ناس وجدي ديل تكون عجبتهم شغلة ( طرمبة ) دي ساكت
> الا يكونوا جمعوا بواقي الاكل
> معلومات شنو البجمعوها من بيوت البكاء ؟
> غايتو الا تكون معلومات عن الميت
> او تكون معلومات عن ام العروس
> العالم اتطور و اصبحت مصادر المعلومات في البطاقات البنكية و التطبيقات الخدمية و شرائح الهواتف و النشاطات الاسفيرية .
> الا عندنا في السودان حكومة كفاءات جابت ليها لجنة كفاءات و بدات تجمع معلومات بي طرق و اساليب عفى عنها الزمن و اندثرت تماما.
> و في الحقيقة احنا كنا متوقعين شنو من مجموعة احزاب كانت مركونة في المخازن ٣٠ سنة
> لازم يطلعوا يفكروا لينا بنفس العقلية و الاساليب الكانت قبل ٣٠ سنة
> احنا ايقظنا مومياءات من ثباتهم العميق و طلبنا منهم انو يعبروا بينا للاخرة
نزار العقيلي



تعليق واحد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *