الى حمدوك في قصره العالي

الى حمدوك في قصره العالي
سمعناك تكذب في خطابك الأخير بخصوص الكورونا حين قلت انكم جهزتم لموجة الكورونا الثانية اكثر وافضل من الاولي الا تعلم انها تحصد ارواح أبناء شعبك بالمئات كل يوم الا تعلم الا المئات بل الالاف ينتظرون سريراً في مشافي الدولة من اجل اوكسجين ، يمر موكبك المهيب بسياراته الفارهه كل يوم بجوار مركز العزل بمستشفي يونفيرسال ألم تسمع عويل وصراخ الثكالى علي موتاهم ، ففي هذا المركز توفي40 من أبناء شعبك ألف رحمة ونور تنزل عليهم في فترة أسبوعين داخل مركز واحد ووزارة صحتك تكذب وانت أيضا تتمادي في كذبك، ألم يخطر ببالك او استوقفتك حشود الأهالي امام مراكز العزل بانتظار سرير لمريضهم ليلقي حتفه داخل مشفي … تبا لك يا حمدوك ، دعك من صفوف الخبز والوقود فهناك ازمة اوكسجين ، انت اتيت علي دماء شهداء اشرف منك واشرف منا جميعا ، لكنهم لو كانو يعلمون انهم سيطيحون لفساد ليأتي من هم افسد من الكيزان لما فتحو صدورهم للرصاص، الا تعلم ان امجد فريد مستشارك المقرب يتعامل مع مركز يونفيرسال كانه ملك خاص ويرسل زوج الوزيرة هبة وجدة الوزيرة دون تنسيق مع ICC وقالت الطبيبة المرافقة لزوج الوزيرة ان امجد فريد قال ليهم امشي هناك عندكم جناح خاص وسرير جاهز وح ينادو ليكم دكتور قلب وبعملو ليكم كل المحتاجنو ، والمريض فعليا كجانب كورونا ما محتاج مستشفي وبس محتاج عزل منزلي وفي اليوم داك تحديداً كان في 200 مريض حقيقي داخل ولاية الخرطوم بحوجة لاسرة عزل …لكنها دولة الفساد والمحسوبية دولة سرير عمر مانيس محجوز وسرير زوجة الشيخ خضر محجوز وناس تعبانة جد جد بتموت منتظرة سرير … الشي التاني قصة حوجة المراكز نفسها ، المركز الانا فيهو تحديداً يفتقر لاي شي من الدواء وادوية منقذة للحياة ومافي معمل وكانت ABG machine متعطله في العناية ووزارة الصحة والدولة بتعمل احتفال بالسلام في زمن الكورونا وتصرف مئات الملايين وغالبها تصلح جهاز مهم زي ده لحدي ما صلحوهو اولاد واحد من الناس الكانو راقدين في العناية المرحوم فتحي ابراهيم ربنا يرحم والدهم ويعظم اجرهم ، والشي الكعب جدا انو التكييف متعطل في العناية واي زول مرقد في العناية اهلو لازم يجيبو مروحة عشان السخانة ما تكتلو قبل الكورونا وطبعا المراوح توزع العدوى داخل العناية وتزيد ازمات الناس التعبانة بالكورونا وتجيب ليهم عدوى بكتيرية وحاجات تانية مافي ليها علاج الا فى قصور اهل السلطة …وكل مرافق يجري طول اليوم عشان الفحوصات والعلاجات والعيانين ما متحسنين لسوء بيئة العمل وندرة الخدمات العلاجية ..ولا شكر اليوم الا للكادر الطبي أطباء وممرضين وكل العاملين بمراكز العزل وشكر كمان لاهل وذوي المرضي وفاعلي الخير .. الكادر الطبي ناس يونفيرسال الشغالين في اسوء الظروف الممكنة في بلد ما بتوفر ليهم ابسط معينات الوقاية واغلبهم اصيبو بالكورونا وطبعا بتمر عليهم ايام وجبات ما بوفروها ليهم وبتجيهم وجبات من فاعلي الخير وكتيييير مواهيهم وحوافزهم تتاخر …ناهيك عن انو عاوزين يطردوهم من السكن ولسة الحكومة الموقرة ما رتبت ليهم سكن بديل …طبعا الدولة واعلام السلطة بكذبو في الأرقام واعداد الوفيات رغم انو ابسط مواطن حاسي بالكارثة …الحاجة المهمة الشعب البموت ده يا ريت يا حمدوك تنزل ليهو من قصرك العالي وتجي تمر علي مراكز العزل دي وتشوف بي عينك الوضع البقتلنا كل يوم
الشي المهم جدا انو المراكز بالضغط العليها ده ممكن تقيف في أي لحظة عشان كدة لازم وقفة شعبية وضغط علي السلطة عشان تتحرك شوية فوق صحة الناس وعافيتهم الفضلت ليهم، فيا حمدوك ووليداتك من جنيات المنظمات هذا الشعب العظيم لا يستحق فسادكم ومؤامراتكم واهمالكم له .. تبا لكم ولكل من في السلطة الان وهو يهمل صحة هذا الشعب العظيم

من صفحة
بري أهل واحباب